Vaefesu 5 - Bhaibheri Rakachena muChindau

Kupona muKujeka

¹ Ndizvo itai vaedzereri vaMwari, kudai ngevana vanodikanwa.

² Muhambe murudo, kudai ndiKristu wakatida, akadzipira ngepamusoro pedu, kuita mudiro nomubairo kunaMwari zviite gwema rakanaka.

³ Asi kuomba nezvinosvipisa zveshe nokuemura zvisazoereketwa ndizvo pakati penyu, kudai ngezvinosisira pakati pevakacheneswa.

⁴ Musatendera kuti kuapo tsvina nokuti kuereketa zvoupenzi nokuti kutsvinya zvisikasisiri, asi ngakuapo kubonga.

⁵ Muwe negwinyiso reizvi, kuti akuna muombi nokuti munhu wakasvipiswa nokuti unoemura (kuronza kuti mudiri wemiedzaniso), unodya nhaka muumambo hwaKristu nohwaMwari.

⁶ Musachengedzerwa ngomunhu ngemazwi asina shwiro, ngokuti ngendaa yeizvi zviro ushungu hwaMwari hunouya padera pevana vokusikapurutana.

⁷ Ndizvo musazwanana navo,

⁸ ngokuti imwimwi karetu mwaiya chidima, asi zvino muri kujeka muna Mambo; hambai kudai ngevana vokujeka,

⁹ (ngokuti michero yokujeka inooneka kunezveshe zvakanaka nokururama negwinyiso,)

¹⁰ mwechiedza kudzidza zvinonasa kudakadza Mambo.

¹¹ Musikaiyani nemishando yechidima isina michero, asi ngazvibudiswe pakujeka.

¹² Ngokuti zvinotsverudza kunyazwi kuereketa ngeizvo zvinoitwa ndivo mukufishika;

¹³ asi apo chiro cheshe pechinobudiswa pakujeka chinooneka,

¹⁴ ngokuti chiro cheshe chinooneka chiri kujeka. Ndizvo iye unoti, “Muka, iwewe unoata, muka kubva kwevakafa, naKristu unozokuvhenekera.”

¹⁵ Ndizvo nasai kungwara mukuhamba kwenyu, musikadai ngevanhu vasikazi kungwara, asi mudai ngevakangwara,

¹⁶ mwechitenga mukuwo, ngokuti mazuva ari akashata.

¹⁷ Ndizvo musaita mapenzi, asi mwechizia chiri kuda kwaMambo.

¹⁸ Musaradza ngevhini, iro rinopara kusikadzibata, asi mwechizadzwa ndiMweya,

¹⁹ mwechiereketa umwe kunoumweni ngenduyo nengoma nokuemba kwoMweya, mwechiemba ngokutetemba ngomwoyo yenyu kunaMambo,

²⁰ mwechibonga kunaMwari Baba ngezviro zveshe ngenguva dzeshe ngezina raMambo wedu Jesu Kristu.

Vakadzi neVamuna

²¹ Mwechipfairana umwe kunoumweni mukutya Kristu.

²² Vakadzi, pfairai vamuna venyu, kudai ngezvomunoita kunaMambo.

²³ Ngokuti mwamuna uri soro romukadzi, kudai ndiKristu uri soro rechiara, muiri uwo waari muponesi.

²⁴ Asi kudai ngechiara chinomupfaira Kristu, ndizvo vakadzi ngavapfaire vamuna vavo ngezviro zveshe.

²⁵ Vamuna, idai vakadzi venyu, kudai ndiKristu wakachida chiara, akadzipira ngepamusoro pacho,

²⁶ kuti achichenese, achisuka ngokushamba ngemvura neizwi,

²⁷ kuti adziisire chiara kwaari chiri chiara chinounaku, chisina ndemo nokuti kuonyana nokuti chiro chimweni chakadaro, asi kuti chiite chakacheneswa, chisina neara.

²⁸ Ngokudaro kunosisira kuti vamuna vade vakadzi vavo kudai ngezvevanoda miiri yavo. Uwo unoda mukadzi wake unodzida pachake.

²⁹ Ngokuti apana munhu wakambonyenya nyama yake, asi unoikodza nokuingwarira, kudai ngezvaanoitawo Kristu kunechiara,

³⁰ ngokuti isusu tiri nhengo dzomuiri wake.

³¹ “Ngeiyi ndaa munhu unozosiya baba ake namai ake, unozonamatira kumukadzi wake, naavo vairi vanozoita nyama imwe.”

³² Ichi chakafishika chikurutu, asi ndinoereketa ngendaa yaKristu nechiara.

³³ Asi umwe ngaumwe wenyu ngaade mukadzi wake kudai ngezvaanodzida pachake nomukadzi ngaangwarire kuti aremeredze mwamunawake.