Vaefesu 4 - Bhaibheri Rakachena muChindau

Kubatana kwoMuiri waKristu

¹ Ndizvo inini, bhanditi raMambo, ndinomupota kuti muhambe kudai ngezvinosisira kudaidzwa kwemwakadaidzwa ndikwo,

² ngokudzinaanisa kweshe nokupfaa nokusengerera, mwechisengerera umwe kunoumweni ngorudo,

³ mwechitsamwirira kungwarira kuiyana kwoMweya ngechisungo chokunyarara.

⁴ Uripo muiri umwe noMweya umwe, kudai ngezvemwakadaidzwa mukugonda kumwe kwokudaidzwa kwenyu,

⁵ Mambo umwe, gonda rimwe, rubhabhatidzo rumwe,

⁶ Mwari umwe, vari Baba weveshe, vari padera pavo veshe, vanoshanda kubudikidza ndivo veshe, naye uri mukati mwavo veshe.

⁷ Asi nyasha dzakapuwa kuneumwe ngaumwe wedu kudai ngechipimo chechipo chaKristu.

⁸ Ndizvo unoti, “Apo paakakwira mudenga, wakakweya vabatwa, akapa zvipo kuvanhu.”

⁹ (Mukuti, “Wakakwira,” zvinoronzenyi asi kuti wakadzakazve kundau dziri pashi munyika?

¹⁰ Uwo wakadzaka ndiyezve wakakwira ngepadera pematenga eshe, kuti azadzise zviro zveshe.)

¹¹ Naye wakapa vamweni kuti vaite vapostori, vamweni kuita vaprofeti, vamweni kuita vavhangeri, vamweni kuita vaushi nevadzidzisi,

¹² kuti vakacheneswa vanasirirwe kumushando wokushandira, kuaka muiri waKristu,

¹³ metsa teshe taguma pakutenda kumwekwo noruziyo rwoMukororo waMwari, kuita vanhu vakaperera, kuchipimo choukuru hwakaperera hwaKristu;

¹⁴ kuti tisachagara tiri vana vadoko, techizungunyiswa mberi nesure nokuvhuvhutwa ngemhepo yokudzidzisa kweshe, ngemazano akashata evanhu nourimbwi, kuti vatipause ngokuchengedzera.

¹⁵ Asi techiereketa gwinyiso murudo, tikure mwaari ngezviro zveshe, uwo uri soro, munaKristu;

¹⁶ kubva mwaari muiri weshe, unorimbanidzwa nokubatanidzwa pamwepo ngenhengo dzeshe dzinogwinyisa, nhengo yeshe inoshanda ngechipimo chayo, kudai ngomushando wakanaka wenhengo imwe ngaimwe, unoita kuti muiri ukure kuti udziake murudo.

Ndaramo yeKaretu neItsva munaKristu

¹⁷ Ndizvo ndinoronza izvi nokupupura munaMambo, kuti musachahamba kudai ngevemadzinza muupenzi wemipinimidzo yavo isina shwiro;

¹⁸ vari muchidima mukuzwisisa kwavo, vari vapara mukupona munaMwari ngendaa yokusikazia kwavo nendaa yokukonza kwomwoyo yavo;

¹⁹ vakarashikirwa ngounhu hweshe vakadzipira mukuemura, vechishanda zveshe zvine tsvina ngokuboka.

²⁰ Asi imwimwi amuzi kudzidza zvakadaro ndiKristu!

²¹ Ngegwinyiso mwakamuzwa mukadzidziswa ndiye, kudai ngegwinyiso riri munaJesu.

²² Mwakadzidziswa kuti murashe munhu wekaretu, kunoronza kupona kwenyu kwekaretu, uwo unooreswa ngokuemura kwokuchengedzera,

²³ kuti mumusirirwe mumweya womupinimidzo wenyu,

²⁴ mupfeke munhu mutsva, uwo wakasikwa akadai ndiMwari mukururama nomukucheneswa kwegwinyiso.

Mipango yoKupona Kutsva

²⁵ Ndizvo rashai kunyepa, “Ereketai gwinyiso munhu weshe kuno muakirwana wake,” ngokuti tiri nhengo umwe kunoumweni.

²⁶ “Tsenekai, musikashaishi.” Musatendera kuti zuva ripote mwakatseneka,

²⁷ musapa ndau kunaDhiabhorosi.

²⁸ Mbavha ngairekere kuba, asi paugaro peizvo ngaishande, yechishanda zvakanaka ngenyara dzayo, kuti ione zvokupa kwaari unotama.

²⁹ Musatendera kuti kuereketa kwakashata kubude mumiromo yenyu, asi kwega kwakanaka kunoaka, kudai ngezvinotamika, kuti kupe nyasha kwavari vanokuzwa.

³⁰ Musatsamwisa Mweya Wakachena waMwari, womwakaisirwa chioniso mwaari metsa kuguma kuzuva rokuripirwa.

³¹ Rashai kubva kwomuri kushata kweshe, ushungu, kutseneka, bope, kutuka nokhururu kweshe;

³² muitirane nyasha umwe kunoumweni, muano mwoyo yakapfaa, mwechirekererana umwe noumweni kudai ndiMwari wakamurekerera muna Kristu.