Vaefesu 3 - Bhaibheri Rakachena muChindau

Mushando waPhauri kuneveMadzinza

¹ Ngeiyi ndaa inini Phauri, bhanditi raKristu Jesu ngendaa yenyu imwimwi vemadzinza,

² ngegwinyiso mwakazwa ngounhunge hwenyasha dzaMwari dzakapuwa kwendiri ngendaa yenyu,

³ ngenjira yakaziiswa chakafishika chakaitwa kuti chiziikanwe kwendiri ngokuoniswa, kudai ngezvendakambonyora ngemazwi mashomani.

⁴ Mukudzidza izvi mungazwisisa kuzia kwangu ngechakafishika chaKristu,

⁵ icho chisikazi kuziikanwa kuvakororo vevanhu mumibarirwana imweni, kudai ngezvechakaoniswa kuvapostori vake vakacheneswa nevaprofeti ndiMweya;

⁶ kuti vemadzinza vanogara nhaka pamwepo nesu navo vari venhengo dzomuiri umwewo pamwepo nesu vanokoanisirwawo chigondiso chiri kunaKristu Jesu kubudikidza ngevhangeri.

⁷ Ngeiri vhangeri ndakaitwa mushandiri waro, kudai ngechipo chenyasha dzaMwari chendakapuwa ngokushanda kwesimba rake.

⁸ Kwendiri, kunyazwi inini ndiri mudoko wokupedzisira wavo veshe vakacheneswa, nyasha idzi dzakapuwa, kuti ndichumaire kune vemadzinza upfumi husikatsvakiki hwaKristu,

⁹ nokuita kuti vanhu veshe vaone urongwa hwechakafishika chaiya chakafishwa kubvira pakutanga munaMwari uwo wakasika zviro zveshe;

¹⁰ kuti kubudikidza ngechiara uhwo ungwaru hwaMwari muzviemo zvakaparadzana zvino huziikanwe kuvatongi nevane simba mundau dzomudenga,

¹¹ kudai ngokuronga kwake kwemhera nariini, ukwo kwaakaita muna Kristu Jesu Mambo wedu,

¹² mwaari tinoshinga kupinda kubudikidza ngegonda rokutenda kwedu mwaari.

¹³ Ndizvo ndinomukumbira kuti musademera ngokutambudzika kwangu ngendaa yenyu, kuri uthende hwenyu.

Phauri Unokumbirira vaEfesu kuti Vazie Rudo rwaKristu

¹⁴ Ngeiyi ndaa ndinogwadama ngemabvi angu pamberi paBaba,

¹⁵ kubva mwaari mhuri dzeshe dzomudenga nedzomunyika dzinodaidzwa ngezina ravo,

¹⁶ kuti iye amupe, kudai ngouwandu hwouthende hwake, kuti mugwinyiswe ngesimba kubudikidza ndiMweya wake mumunhu womukati,

¹⁷ kuti Kristu agare mumwoyo mwenyu kubudikidza ngokugonda; kuti imwimwi, muane nzinde netsikiro zvakagwinya murudo,

¹⁸ muane simba reshe rokuzwisisa, pamwepo nevakacheneswa veshe, chiinyi kupamhama nokureba nokukwira nokudzama

¹⁹ nokukura mukuzia rudo rwaKristu runopinda ruziyo rweshe, kuti muzadzwe ngokuzara kweshe kwaMwari.

²⁰ Kwaari uwo ngesimba rinoshanda mukati mwedu unokona kakurutu kuita zvakawanda kupinda zveshe zvetinokumbira nezvetinopinimidza,

²¹ kwaari ngakua nouthende muchiara nomunaKristu Jesu kunemazero eshe mhera nariini. Ameni.