Vaefesu 2 - Bhaibheri Rakachena muChindau

Kubva muKufa Kuenda muKupona

¹ Imwimwi mwaiya vakafa muzvipaukwa nomuzvishaishi.

² Muneizvo zvemwakahamba pakati pazvo karetu, mwakateera mitoo yeiyi nyika, mukateera njira yomuzvare wesimba romweya womudenga, mweya uwo unoshanda zvino mukati mwevakororo vokusikapurutana.

³ Taigara teshe pakati pavo karetu, tiri mukuemura kwenyama yedu, techiita kuda kwenyama nokwemipinimidzo, ngechibarirwe taiya vana voushungu, kudai ngevanhu vamweni.

⁴ Asi Mwari, unenyasha dzakawanda, kubva murudo rwake rwakakura rwaakatida ndirwo,

⁵ kunyazwi apo taiya takafa kubudikidza ngezvipaukwa zvedu, wakaita kuti tipone pamwepo naKristu (mwakaponeswa ngenyasha.)

⁶ Wakatimusa pamwepo naye, akaita kuti tigare pamwepo naye mundau dzomudenga munaKristu Jesu,

⁷ kuti ngenguva dzinouya aonise kuwanda kukurutu kwoupfumi hwenyasha dzake norudo rwake kwetiri ndiKristu Jesu.

⁸ Ngokuti mwakaponeswa ngenyasha kubudikidza ngokugonda; izvi zvisikaitwi ndimwi, asi chipo chaMwari;

⁹ azviitiki kubudikidza ngemishando, kuti kusazoapo naumwe ungaganza.

¹⁰ Ngokuti isusu tiri mushando wake, takasikirwa munaKristu Jesu kuti tiite mishando yakanaka, yaakaemesa karetu Mwari kuti tihambe mukati mwayo.

Munhu Umwe munaKristu

¹¹ Ndizvo karakadzai kuti karetu imwimwi mwaiya vemadzinza ngokwenyama, mwaizwi kuti, “Vasikazi kuchekwa,” ngaavo vanozwi, “Vakachekwa,” izvo zvinoitwa munyama ngenyara.

¹² Karakadzai imwimwi kuti ngouwo mukuwo mwaiya mwakaparadzana naKristu, musikaiyani norudzi rwaIsuraeri, muri vapara kuzvitenderano zvechigondiso, musina negonda, musina Mwari munyika.

¹³ Asi zvino munaKristu Jesu imwimwi karetu mwaiya kuretu mwakwedzedzwa pasinde ngengazi yaKristu.

¹⁴ Ngokuti iye uri kunyarara kwedu, uwo wakaita kuti teshe tiite umwe naye, wakaputsa rukumbati rwougaa rwaiparadzanisa ngepakati,

¹⁵ aparadza ngomuiri wake mitemo yemipango nezviemeso, kuti adzisikire mukati mwake munhu umwe mutsva kuti vasaita vairi, kuti paite kunyarara,

¹⁶ kuti aiyanise zvikwata zveshe zviiri munaMwari mumuiri umwe kubudikidza ngomuchinjiko, auraye ugaa kubudikidza ndiwo.

¹⁷ Naye wakauya, akachumaira kunyarara kwomuri imwimwi mwaiya kuretu nokunyarara kwavari avo vaiya pasinde;

¹⁸ ngokuti kubudikidza ndiye isusu teshe tinokona kupinda ndiMweya umwe kunaBaba.

¹⁹ Ndizvo zvino amuchaiti vapara nevaeni, asi mwaita dzinza rimwe pamwepo nevakacheneswa, muri vemhuri yaMwari,

²⁰ mwakaakwa padera petsikiro revapostori nerevaprofeti, Jesu Kristu emene ndiye buwe guru repakhona.

²¹ Mwaari mhatso yeshe inonasa kushonganiswa pamwepo nokukura kuita temperi rakachena munaMambo;

²² mwaari imwimwiwo munoakwa pamwepo kuita ugaro hwaMwari muMweya.