Vaefesu 1 - Bhaibheri Rakachena muChindau

Kuchingamidza

¹ Phauri, mupostori waKristu Jesu ngokuda kwaMwari, ndinonyorera kwavari vakacheneswa vari muEfesu, avo vanogondeka munaKristu Jesu.

² Mwari Baba edu naMambo Jesu Kristu ngavamupe nyasha nokunyarara.

Zvifumiso zvoMweya munaKristu

³ Ngaakudzwe Mwari naBaba aMambo wedu Jesu Kristu, uwo wakatifumisa munaKristu ngezvifumiso zveshe zvomweya mundau dzomudenga,

⁴ kudai ngezvaakatitsanangura mwaari ngorudo nyika isati yasikwa, kuti tiite vakacheneswa nevasina ndaa pamberi pake.

⁵ Wakatiemesa karetu kuti tiite vana vake kubudikidza ndiJesu Kristu, kudai ngebiningidzo rokuda kwake,

⁶ kuti tikudze Mwari ngendaa youthende hwenyasha dzake dzaakatipa pasina muripo kubudikidza ngoUnodikanwa.

⁷ Mwaari tinakwo kuripirwa kubudikidza ngengazi yake, ndikwo kukungurirwa kwezvishaishi zvedu, kudai ngouwandu hwenyasha dzake,

⁸ idzo dzaakapa ngokuwanzisa kwetiri. Muungwaru hweshe nokuzwisisa

⁹ wakaita kuti zviziikanwe kwetiri kushamisa kwokuda kwake, kudai ngebiningidzo rake raakaemesa munaKristu,

¹⁰ kudai ngourongwa hwokuzarisika kwenguva, kuti aunganidze zviro zveshe mwaari Kristu, zviro zvomudenga nezviro zvomunyika.

¹¹ Mwaari takaitwa nhaka, takaemeserwa karetu kudai ngebiningidzo rouwo unoshanda zviro zveshe kudai ngokuronga kwokuda kwake,

¹² kuti tiite kukudzwa kwouthende hwake, isusu takatanga kutenda kuna Kristu.

¹³ Mwaari imwimwiwo, mwakazwa izwi regwinyiso, vhangeri rokuponeswa kwenyu, nemwi mwakatendawo mwaari, mwakaiswa ruphau rwoMweya Wakachena womwakagondiswa;

¹⁴ uwo ndiwo chigondiso chenhaka yedu, metsa kuripirwa kwenhaka yemene, kuita kukudzwa kwouthende hwake.

Mukumbiro waPhauri

¹⁵ Ngeiyi ndaa neniwo, ndakati ndazwa ngokugonda kwenyu munaMambo Jesu norudo rwenyu kunevakacheneswa veshe,

¹⁶ andirekeri kubonga ngendaa yenyu, ndechimukarakadza mumikumbiro yangu,

¹⁷ kuti Mwari waMambo wedu Jesu Kristu, Baba vouthende, vamupe mweya woungwaru nowokuoniswa muruziyo rwake,

¹⁸ munemadziso omwoyo yenyu akavhenekerwa, kuti imwimwi muzie biningidzo regonda rokumudaidza kwake, neroupfumi hwouthende hwenhaka yake kwavari vakacheneswa,

¹⁹ noukuru hwakakurisa usina chipimo hwesimba rake kwetiri isusu tinotenda, kudai ngokushanda kwesimba rake guru,

²⁰ raakashanda munaKristu, apo paakamumusa kubva kwevakafa, akamugadzika ngokumudyo kwake mundau dzomudenga,

²¹ padera pokutonga kweshe noukuru hweshe nesimba reshe noumambo hweshe, nepadera pemazina eshe anodudzwa, haiwa omunyika muno mwega, asi neeiyozve inouya.

²² Uwo wakaisa zveshe pashi petsoka dzake nokumuita soro padera pezveshe ngendaa yechiara,

²³ icho chiri muiri wake, kuzara kwouwo unozarisa zveshe mune zveshe.