Titosi 3 - Bhaibheri Rakachena muChindau

Kuita kwevaKristu

¹ Vakarakadzise kuti vapfaire vatongi naavo vane simba, kuti vapurutane vakanasirirwa kuita mishando yeshe yakanaka,

² kuti vasaereketa zvakashata ngomunhu, kuti vasaita hasha, vaite vakapfaa, vechionisa kupfaa kuvanhu veshe.

³ Ngokuti isusuwo ngekaretu taiya noupenzi, tisikapurutani, techichengedzerwa, tiri hloko dzokuemura nezvidakadziso zvenyama zvakaparadzana, takapedza mazuva edu tine khururu nendurumwa, techinyenya nokunyenyana.

⁴ Asi apo unaku norudo rwenyasha dzaMwari Muponesi wedu zvaoneka,

⁵ wakatiponesa, haiwa ngemishando yakarurama yetakaita isusu, asi kubudikidza ngenyasha dzake, ngokushambidzwa ngemvura yokubarwazve nokumusirirwa ndiMweya Wakachena.

⁶ Uwo wakadururirwa padera pedu ngokuwanzisa kubudikidza ndiye Jesu Kristu Muponesi wedu,

⁷ kuti isusu, techipembedzwa ngenyasha dzake, tiite vanogara nhaka kudai ngegonda rokupona kusikaperi.

⁸ Iri izwi rinogondeka. Inini ndinoda kuti ugwinyisise kuronza izvi zviro, kuti avo vakatenda Mwari vangwarire kuita mishando yakanaka; izvi zviro zvakanaka zvinodetsera kuvanhu.

⁹ Asi tiza mibvunzo youpenzi nokuerengudzwa kwemazina emadzibaba, hasha nokuphikisana ngendaa yeMipango, ngokuti izvi azvidetseri azvina shwiro.

¹⁰ Munhu unophikisana negwinyiso, ngesure kwokuronzerwa kamwe nokwechipiri, murambe,

¹¹ wechizia kuti wakadaro wakapauka, unoshaisha, unodzirasha.

Mazwi aPhauri oKugumisira

¹² Apo ndootuma Atemasi kwouri, nokuti Thichikusi, kasira kuuya kwendiri Nikoporisi, ngokuti ndakadziemesera kugarapo nguva yechando.

¹³ Ita zveshe zvounokona kudetsera Zenasi gweta naAporosi murwendo rwavo, uone kuti kusatamika chiro kwavari.

¹⁴ Vanhu vedu ngavadzidze kudzipira kuita mishando yakanaka kuti vaone zvinotamika, nokuti vasazoita vasina michero.

¹⁵ Veshe vendinavo vanokutambisa. Tambisa avo vanotida mukugonda. Nyasha ngadzigare nemwi mweshe.