Titosi 2 - Bhaibheri Rakachena muChindau

Rudzidziso rweGwinyiso

¹ Asi iwewe, dzidzisa zvinosisira zvidzidziso zvine gwinyiso.

² Ronzera vamuna vakuru kuti vadzibate, vechiremeredzeka, vakangwara, vanogwinyisira mukugonda, murudo nomukusengerera.

³ Ronzera mbuya ngokudaro dzihambe kudai ngezvinosisira vakacheneswa, dzisikareyi, dzisikadi vhini rakawanda, dziite vadzidzisi vezvakanaka,

⁴ kuti dzidzidzise vakadzi vatsva kuda vamuna vavo nokuda vana vavo,

⁵ kuti vaite vakangwara, vakasukika, vanongwarira mizi yavo, vane nyasha, vanopfaira vamuna vavo, kuti izwi raMwari risazotukwa.

⁶ Ngokudaro panga vamuna vatsva kuti vaite vanodzibata.

⁷ Ngezviro zveshe wechidzionisa kuita chionero chemishando yakanaka, muzvidzidziso zvako wechionisa kugondeka nokuremeredzeka

⁸ nokuereketa kwakarurama, kusikashooreki, kuti gaa ritsveruke, risaane chiro chakashata cheringaereketa tisu.

⁹ Ronzera hloko kuti dzipfaire madzimambo adzo nokunasa kuvadakadza ngezviro zveshe, dzisikavaphikisi,

¹⁰ dzisikavabiri, asi dzechionisa kugondeka kweshe kwakanaka, kuti dzinemese zvidzidziso zvaMwari Muponesi wedu muzviro zveshe.

¹¹ Ngokuti nyasha dzaMwari dzakaoneka, dzinounza ruponeso kuvanhu veshe,

¹² dzechitidzidzisa kuti tirambe zvakashata nokuemura zvomunyika, nomumazuva aya tipone ngokungwara nomukururama nokudira Mwari,

¹³ apo techigarira iro gonda rakafumiswa nokuoneka kwouthende hwaMwari wedu mukuru noMuponesi, Jesu Kristu.

¹⁴ Ndiye wakadzipira ngendaa yedu kuti atiripire kubva mukushata kweshe nokuti adzichenesere vanhu vaite vake vemene, vanotsamwirira kuita mishando yakanaka.

¹⁵ Ronza izvi zviro; upange nokurambidza ngesimba reshe. Usatendera munhu kuti akushoore.