Titosi 1 - Bhaibheri Rakachena muChindau

Kuchingamidza

¹ Phauri, muranda waMwari nomupostori waJesu Kristu, kudai ngokugonda kwevakatsanangurwa vaMwari noruziyo rwegwinyiso rwokudira Mwari,

² mugonda rokupona kusikaperi kwaakagondisa Mwari, uwo usikakoni kunyepa, nguva dzisati dzaapo,

³ panguva kwayo wakaonisa izwi rake kubudikidza ngokuchumairwa kwaro kwendakapuwa inini ngomupango waMwari Muponesi wedu.

⁴ Ndinonyorera kunaThithusi, mwana wangu wegwinyiso mugonda redu. Nyasha nokunyarara ngazvigare kwomuri zvinobva kunaMwari Baba nokuna Kristu Jesu Muponesi wedu.

Mushando waThithusi muKrete

⁵ Ngeiyi ndaa ndakakusiya muKrete, kuti urongedze izvo zvakasara kuitwa nokuemesa vakuru mumadhorobha eshe, kudai ngezvendakakupanga:

⁶ munhu usikashooreki, wakaroora mukadzi umwe, anevana vanotenda, vasikaitirwi ndaa yokusikadzibata nokuti vasikapurutani.

⁷ Ngokuti kunosisira kuti mutungamiriri mukuru wechiara aite usikashooreki, kudai ngezvaari muranda waMwari, usina mutinini, usikakasiri kutseneka, usikadi vhini, usikaiti hohoho, usikadisisi pfuma,

⁸ asi unoashira vapfumba, unoda kunaka, wakangwara, wakarurama, wakacheneswa, unodzibata.

⁹ Unosisira kubatisisa izwi rinogondeka kudai ngezvaakadzidziswa, kuti akone zveshe kugwinyisa ngedzidziso yegwinyiso nokuvanyisa avo vanoita hasha.

¹⁰ Ngokuti varipo vazhinji vasikapurutani, vanoereketa zvisina shwiro, vanochengedzera, kakurutu avo vokuchekwa;

¹¹ avo vanosisira kuti miromo yavo inyaradzwe, ngokuti vanoparadza mhuri dzeshe, vechidzidzisa zvisikasisiri, ngendaa yokuda pfuma inetsvina.

¹² Waiya umwe wavo, muprofeti wavo emene, wakati, “VaKrete vanyepi nguva dzeshe, zvikara zvakashata, vanokara, vane nungo.”

¹³ Uchapupu uhwo hunegwinyiso. Ngeiyi ndaa varambidze kakurutu, kuti varurame mukugonda,

¹⁴ vasikapurutani kungano dzevaJudha nokuti kumipango yevanhu vanoramba gwinyiso.

¹⁵ Kunevakasukika zveshe zvakasukika, asi kwavari vakasvipiswa nevasikatendi apana chakasukika. Mipinimidzo yavo nemhumba yavo zvakasvipiswa.

¹⁶ Vanopupura kuti vanomuzia Mwari, asi ngemishando yavo vanomuramba. Vanonyangadza, avapurutani, vasikadetseri chiro kumishando yeshe yakanaka.