Sor. 8 - Bhaibheri Rakachena muChindau

¹ A, kudai iwewe waiya wakadai ngehama yangu, iyo yakaamwa mazamo amai angu! Dai ndakuona kubanze, ndaizokuchingamidza ngomuromo; akuna naumwe ungandishoora.

² Ndaizokutungamirira nokukuunza kumhatso yamai angu, nomukamera roumwe uwo wakandibara. Ndaizokupa kuti umwe vhini rakakurungwa ngemakha oudosvi womuphomegraniti wangu.

³ A, kuti nyara yake yokumuoshwe iwe pashi pesoro rangu, nenyara yake yokumudyo inozondifungatira.

⁴ Ndinomupanga, imwimwi vanasikana veJerusarema, musatsungudza nokuti kumusa rudo metsa rwooda kumuka.

Nduyo yeChitanhatu Vakadzi

⁵ Ndiani uyu unokwira echibva mushango, akatseyama pamudikani wake? Ndakakumusa uri pashi pomuti womuapura. Apo mai ako aiya mukupotwa ngenyoka yokukubara; apo uwo wakamubereka waiya mukupotwa.

Mukadzi

⁶ Ndiise kudai ngechioniso mumwoyo wako, kudai ngechioniso pamuoko wako; ngokuti rudo runesimba kudai ngorufu, ndurumwa dzinotyisa kudai ngeiba. Mirazvu yarwo yadai ngemirazvu yomuriro, mirazvu inobaka kakurutu.

⁷ Mvura zhinji aikoni kudzima rudo, kunyazwi ndambi aingarumwisi hotwe. Kudai munhu akanyapa zveshe zvemhatso yake ngendaa yorudo, zvingarambwa kakurutu.

Vakoma voMukadzi

⁸ Tine mukunda wedu mudoko, asi aana mazamo. Tinozoitenyi ngendaa yomukunda wedu ngezuva raanoroorwa?

⁹ Kudai ari rukumbati, tinozoaka padera pake ngome yesirivha; asi kuti ari musiwo, tinozomukwakwatidzira ngemapuranga omusedhare.

Mukadzi

¹⁰ Ndiri rukumbati, nemazamo angu akadai ngorusvingo; zvino ndaiya mumadziso ake kudai ngaumwe unounza kunyarara.

Mwamuna

¹¹ Soromoni waiya nomunda wemivhini paBhaarihamoni; wakapa munda wake wemivhini kuvangwariri; umwe ngaumwe wavo waisisira kuunza gumi remazana ezvigurwa zvesirivha zvemichero.

¹² Munda wangu wemivhini wangu wemene, ngewangu pachangu; iwewe, A Soromoni, gumi remazana ngerako, naavo vangwariri vemichero mazana mairi.

¹³ A, iwewe unogara muminda, vangani vangu vanopurutana izwi rako; ita kuti neniwo ndirizwe.

Mukadzi

¹⁴ Kasira, mudikani wangu, udai ngemhara nokuti kudai ngemhara itsva padera pemitunhu yemakha rakanaka.