Sor. 2 - Bhaibheri Rakachena muChindau

¹ Ndiri ruva romuSharoni, neruva regofa rebani.

Mwamuna

² Kudai ngeruva riri pakati peminzwa, ndizvo zvakaita mudikani wangu pakati pevanasikana varanda.

Mukadzi

³ Kudai ngomuti wemaapura uri pakati pemiti yegwasha, ndizvo zvakaita mudikani wangu pakati pemajaha. Ndakagara pashi pemumvuri wake ngokudakara kukuru, muchero wake waitapira mukuraira kwangu.

⁴ Wakandiunza kumhatso yedhiri, chidisiso chake kwendiri chaiya rudo.

⁵ Ndigutisenyi ngemavhini akaoma, ndiembedzere ngemaapura; ngokuti ndapera simba ngorudo.

⁶ Nyara yake yokumuoshwe iri pashi pesoro rangu, nenyara yake yokumudyo yakandifungatira.

⁷ Ndinomupanga, imwimwi vanasikana veJerusarema, ngezvinyamutai nemhara dzomushango, kuti musatsungudza nokuti kumusa rudo metsa rwooda.

Nduyo yeChipiri Mukadzi

⁸ Izwi romudikani wangu! Ringira, unouya echipembera padera pemitunhu, echitomuka padera pezvimitunhu.

⁹ Mudikani wangu wakadai ngechinyamutai nokuti kudai ngemhara itsva. Ringira, unoema apo sure kwerukumbati rwedu, unoringira mukati ngepamafasitera, echiringira ngepaburi.

¹⁰ Mudikani wangu unoereketa nokuti kwendiri, muka, mudikani wangu, iwewe unoringirika, uuye.

Mwamuna

¹¹ Ngokuti, ringira, nguva yechando yapinda, mvura yapera aichanayi.

¹² Maruva omera munyika; nguva yokuemba yaguma; neizwi regora rinozwika munyika yedu.

¹³ Muti womuonde unobereka maonde awo akasvipirika, nemivhini inemaruva, inobudisa gwema rakanaka. Muka, mudikani wangu, uuye.

¹⁴ A gora rangu, unogara mumarutwe emapuwe, mundau yakafishika yakaita zvikofiro ngandione hope yako, ngandizwe izwi rako, ngokuti izwi rako rinotapira nehope yako yakanaka.

¹⁵ Tibatire hava, zvihava zvidoko, zvinoshaishira mivhini: ngokuti mivhini yedu inemavhini achimatete.

Mukadzi

¹⁶ Mudikani wangu ngowangu, neni ndiri wake; mutanga wake unofura pakati pemaruva egofa.

¹⁷ Metsa zuva ribude, nemabvute atize, kunukuka, mudikani wangu, udai ngechinyamutai, nokudai ngechiunga chemhara itsva padera pemitunhu yeBhetheri.