Sor. 1 - Bhaibheri Rakachena muChindau

¹ Nduyo yaSoromoni.

Nduyo yoKutanga Mukadzi

² Ngaandichingamidze ngokuchingamidza kwomuromo wake! Ngokuti rudo rwako rwakanaka kupinda vhini,

³ mafuta ako okuzora anegwema rakanaka, zina rako rinoita kudai ngemafuta adururwa; ndizvo mhandara dzinokuda.

⁴ Ndikwee sure kwako, tinozokuteera ngokukasira. Mambo wandiunza mumakamera ake. Tinozokudza nokudakara mweuri; tinozokudza rudo rwako kupinda vhini; ngokururama vanokuda.

⁵ Inini ndakasvipa asi ndinoringirika, A imwimwi vanasikana veJerusarema, kudai ngematende eKhedha, kudai ngemachira akatandirwa aSoromoni.

⁶ Musandiringira ngokuti ndakasvipa, ngokuti zuva rakandipisha; vakororo vamai vangu vakandinyangadzirwa; vakandiita mungwariri weminda yemivhini, asi munda wangu wemivhini andizi kuungwarira.

⁷ Ndironzere, iwewe unodikanwa ngomweya wangu, kuti unoushira pari, unozorodzera pari zvifuyo zvako masikati makuru; ngokuti ndinozoita kudai ngewapauka ngenyi pakati pezvifuyo zvevangani vako?

Mwamuna

⁸ Kudai usikazii, iwewe wakapindisisa kunaka pakati pevakadzi, teera zvitsiko zvezvifuyo, uushe zvimbudzana zvemakwai ako pasinde pematende evaushi.

⁹ Ndinokuedzanisa, mudikani wangu, nehachi regadzi pangoro dzaFaro.

¹⁰ Matama ako anoringirika akanaka ane zvinemeso, mutsipa wako unoringirika uneusanga wezvinemeso.

¹¹ Tinozokunasirira chinemeso chomukore chinemboni yesirivha.

Mukadzi

¹² Naapo mambo akagara pasofa rake, mafuta angu emaka akabudisa gwema rawo rakanaka.

¹³ Mudikani wangu wakadai ngenyede yemafuta emhura kwendiri, iyo inogara pakati pemazamo angu.

¹⁴ Mudikani wangu kwendiri wakadai ngechikore chemaruva anozwi chamfiri, chiri muminda yemivhini yeEngedhi.

Mwamuna

¹⁵ A, wakanaka, mudikani wangu; A, wakanaka; madziso ako akadai ngeenjiya.

Mukadzi

¹⁶ A, wakanaka, mudikani wangu, unodikana yaamho. Sofa redu rakasvipirika;

¹⁷ mwamba yemhatso yedu ngeyemisedhare, nhungo dzedu ngedzemiphaini.