Ruthe 4 - Bhaibheri Rakachena muChindau

Bhoazi Unoroora Ruthe

¹ Naapo Bhoazi wakakwira kumusiwo, akagara pashi apo, wakaona hama yaakaereketa ndiyo Bhoazi yakapindapo. Ndizvo Bhoazi wakadaidzira echiti, “Here iwe! Uya pano, hama yangu. Gara pashi pano.” Naye wakaenda, akagara pashi.

² Zvino Bhoazi wakatora vamuna gumi vevakuru vedhorobha, akati, “Garai pashi pano.” Navo vakagara pashi.

³ Wakati zvino kuhama iyo, “Naomi, uwo wakauyazve kubva kunyika yeMoabhi, unotengesa chigurwa chenyika, icho chaiya chaErimerekhi hama yedu.

⁴ Ndizvo ndapinimidza kuti ndierekete kwouri ndechiti, ‘Itenge, uri pamberi paava vakagara pano, nepamberi pevakuru vevanhu vangu. Kudai wechida kuiripira, iripire; asi kudai usikazoiripiri, ndironzere, kuti ndizie; ngokuti akuchina umweni ungairipira ngepabanze pako, neinini ndiri sure kwako.’ ” Ndizvo wakati, “Ndinozoiripira.”

⁵ Zvino Bhoazi wakati, “Zuva rounozotenga iyo nyika kubva munyara yaNaomi, unozotora Ruthe muMoabhi, mukadzi wouwo wakafa, kuti umusire zina rouwo wakafa munhaka yake.”

⁶ Pane izvi, hama yakati, “Andikoni kuiripira inini pachangu, ngokuti ndingazoshaishira nhaka yangu. Tora iwewe kutenderwa kwangu kwokuripira kuita nhaka yako, ngokuti inini andingairipiri.”

⁷ Zvino uyu ndiwo mutoo ngomukuwo wekare muIsuraeri ngendaa yokuripira, nendaa yokuita matenganiswa, kuti kugwinyiswe zviro zveshe; munhu waizokhumura gwada rake, echiripa kunoumweni wake. Iyi ndiyo njira yevaiita ndiyo muIsuraeri.

⁸ Ndizvo hama iyo yakati kunaBhoazi, “Itenge iwewe pachako.” Ndizvo wakakhumura gwada rake.

⁹ Zvino Bhoazi wakati kuvakuru nokuvanhu veshe, “Imwimwi muri zvapupu nyamashi, kuti ndatenga izvo zveshe zvaiya zvaErimerekhi, nazveshe zvaiya zvaKhirioni nezvaiya zvaMahironi, kubva munyara dzaNaomi.

¹⁰ Zve, Ruthe muMoabhi mukadzi waMahironi, ndamutora kuti aite mukadzi wangu, kuti rimusirwe zina rouwo wakafa munhaka yake, kuti zina rouwo wakafa risazodzimwa kubva pakati pehama dzake, nokubva pamusiwo wendau yake; imwimwi muri zvapupu ngeiri zuva.”

¹¹ Zvino vanhu veshe vaiya pamusiwo, nevakuru vakati, “Tiri zvapupu. Mambo Mwari ngaamuite uwo mukadzi unopotera mumhatso mwako kuti adai ndiRacheri naRea, avo vairi pamwepo vakaaka mhatso yaIsuraeri; ugare nhaka muEfratha, uite unembiri muBhetherehema.

¹² Nemhatso yako ngaidai ngemhatso yaPherezi, waakamubarira Thamari kunaJudha, ngorudzi rwaanozokupa Mambo Mwari ngouyu mudzimai mutsva.”

Bhoazi neMibarirwana yake

¹³ Ndizvo Bhoazi wakatora Ruthe, naye wakaita mukadzi wake. Naapo apotera kwaari, Mambo Mwari wakaita kuti aite mimba, naye wakabereka mukororo.

¹⁴ Zvino madzimai akati kunaNaomi, “Ngaatendwe Mambo Mwari, uwo usikazi kukusiya nyamashi usina hama, kuti zina rake riirikire muIsuraeri!

¹⁵ Naye unozoita kwouri muunziri wokupona kwako, nomureri wousharuka hwako; ngokuti muzakazi wako, uwo unokuda, wakapinda kunaka kwouri kunevakororo vanomwe, ndiye wamubereka.”

¹⁶ Zvino Naomi wakatora mwana uwo, akamukwambatira paditi rake, akaita mureri kwaari.

¹⁷ Nemadzimai vaakirwana vake vakamududza zina vechiti, “Kwakaberekwa mukororo kunaNaomi.” Vakadudza zina rake kuti Obhedhi; ndiye baba aJesi, baba aDhavhidha.

¹⁸ Zvino iyi ndiyo mibarirwana yaPherezi: Pherezi wakabara Hezironi.

¹⁹ Hezironi wakabara Ramu, naRamu wakabara Aminadhabhi.

²⁰ Aminadhabhi wakabara Nashoni, naNashoni wakabara Sarimoni.

²¹ Sarimoni wakabara Bhoazi, naBhoazi wakabara Obhedhi.

²² Obhedhi wakabara Jesi, naJesi wakabara Dhavhidha.