Ruthe 3 - Bhaibheri Rakachena muChindau

Ruthe Unoona Mwamuna

¹ Naomi mazvarira ake vakati kwaari, “Mwanasikana wangu, andingakutsvakiri kuzorora here, kuti zvinake kwouri?

² Zvino Bhoazi uripano hama yedu, uwo unevarandakadzi vake vewakashanda navo? Ringira, unorudza bhari usiku uhwu pambuwa yokupurira.

³ Ndizvo dzishambe ngokwako, udzidzodze, upfeke zvokusimira zvako zvakapindisisa kunaka, udzake kumbuwa yokupurira; asi usaita kuti uziikane kunouwo munhu metsa apedze kudya nokumwa.

⁴ Naapo oata pashi, unozonasa kuona pandau paanoata, unozopotera apo, ufukure tsoka dzake, uate pashi; naye unozokuronzera chokuita.”

⁵ Wakati kwaari, “Zveshe zvomunoronza kwendiri ndinozozviita.”

⁶ Ndizvo wakadzaka kumbuwa, wakaita zveshe zvaakaronzerwa ndimazvarira ake.

⁷ Naapo Bhoazi aiya adya nokumwa nomweya wake waidakara, wakaenda kooata kumagumo kwomurwi wekoroni. Zvino Ruthe wakauya ngokunyarara, akafukura tsoka dzake, akaata pashi.

⁸ Pakati pousiku, munhu uwo wakakaruka, wakadzitsanduridza; akaona mudzimai akaata kutsoka dzake.

⁹ Naye wakati kwaari, “Ndiwe ani?” Naye wakapingura, “Ndiri Ruthe murandakadzi wako; fukidza murandakadzi wako ngejira rako, ngokuti iwewe ndiwe hama yepasinde muripiri.”

¹⁰ Naye wakati, “Mambo Mwari ngaakufumise, mwanasikana wangu; ngokuti wapangidzira nyasha kumagumisiro kupinda pakutanga, ngokuti auzi kuteera majaha, vari varombo nokuti vapfumi.

¹¹ Zvino mwanasikana wangu, usatya; ndinozoita kwouri zveshe zvounoda; ngokuti vanhu veshe vedhorobha rangu vanozia kuti uri mudzimai wakarurama.

¹² Asi zvino kunyazwi igwinyiso kuti inini ndiri hama youkama hwepasinde kwouri, asi zvakanyadaro iripo hama yepasinde yaamho kupinda inini.

¹³ Gara usiku uhwu, mangwani mangwanani, kudai iye echizoita kudai ngechinoitwa ngouri hama, zvakanaka; ngaaite izvo zvinoitwa ngouri hama. Asi kudai asikazoiti kudai ngouri hama kwouri, zvino inini ndinozoita kudai ngouri hama kwouri, kudai ngezvaanopona Mambo Mwari. Ata pashi metsa mangwani.”

¹⁴ Ndizvo wakaata ngokutsoka dzake metsa rechimangwani; wakamiruka kuchakasvipa vanhu vasati vakona kuziana umwe noumweni. Ngokuti wakati, “Kusazoziikanwa kuti mudzimai wakapotera kumbuwa yokupurira.”

¹⁵ Zvino, wakati, “Unza jira rowakafuka, uribate.” Ndizvo wakaribata, wakapima zvipimo zvitanhatu zvebhare, wakazvitwikisa padera pake; naye wakaenda mudhorobha.

¹⁶ Wakaguma kunamazvarira ake, avo vakati kwaari, “Zviro zvakaita mahambirei, mwanasikana wangu?” Zvino wakavaronzera zveshe zvaaiya aita uwo munhu kwaari

¹⁷ echiti, “Izvi zvipimo zvitanhatu zvebhare ndiye wandipa; ngokuti wakati kwendiri, ‘Usahwirira kunamazvarira ako usina chiro.’ ”

¹⁸ Wakapingura akati, “Garisika, mwanasikana wangu, metsa uzie magumo endaa, ngokuti uwo munhu aazogarisiki, metsa apedze ndaa iyi nyamashi.”