Ruthe 2 - Bhaibheri Rakachena muChindau

Ruthe Unoshanda muMunda waBhoazi

¹ Zvino Naomi waiya nehama yomwamuna wake, munhu waiya nesimba aneupfumi, wemhuri yaErimerekhi; nezina rake raiya Bhoazi.

² NaRuthe muMoabhi wakati kunaNaomi, “Nditendere zvino ndiende mumunda kuti ndinongeredze mitsonzoti yekoroni, ngesure kwouwo wendinozoona nyasha mukuona kwake.” Naye wakati kwaari, “Enda, mwanasikana wangu.”

³ Ndizvo wakaenda, akaguma, akanongeredza mumunda sure kwevacheki. Echinongeredza kudaro wakaguma kurupande rwomunda waBhoazi, uwo waiya wemhuri yaErimerekhi.

⁴ Zvino apapo Bhoazi wakaguma echibva Bhetherehema, wakati kuvacheki, “Mambo Mwari ngaa nemwi.” Navo vakamupingura kuti, “Mambo Mwari ngaakufumise.”

⁵ Zvino Bhoazi wakati kumuranda wake waiya mukuru wevacheki, “Ngowani uyu mudzimai uchiri mudoko?”

⁶ Muranda uwo waiya mukuru wevacheki wakapingura, akati, “Mudzimai weMoabhi uwo wakauya naNaomi kubva kunyika yaMoabhi.

⁷ Wakati, ‘Ndinokupota, nditendere kuti ndinongeredze ngesure kwevacheki pakati pemwanda.’ Ndizvo wauya, naye waangirira kubvira mangwanani ano metsa kuguma zvino, kwega wagara kanguva kadodoko mudumba.”

⁸ Zvino Bhoazi wakati kunaRuthe, “Zvino izwa, mwanasikana wangu. Usaenda koonongeredza kumunda umweni, zve, usabva pano, asi gara pano pasinde nevarandakadzi vangu.

⁹ Madziso ako ngaaringire kumunda wevanokukura, uteere ngesure kwavo. Ndapanga majaha, kuti vasazokutambudza. Naapo wechizwa nyota, enda kuzvidziyo, umwe iyo yakacherwa ngemajaha.”

¹⁰ Zvino wakawa ngehope yake, akakotamisa hope yake pashi, wakati kwaari, “Ngenyi ndaona nyasha mukuona kwako, kuti iwewe undiringire wechiona kuti ndiri mupara?”

¹¹ Asi Bhoazi wakamupingura, akati kwaari, “Kwakashumirwa kweshe kwendiri izvo zvewakaitira mazvarira ako iwewe kubvira pakufa kwemwamuna wako, nokusiya kwowakaita baba ako namai ako, nenyika yokubarwa kwako, wechiuya kuvanhu vousikazi kumbozia ngekaretu.

¹² Mambo Mwari ngaaunzidzire mushando wako, nomusharo wakazara ngaupuwe kwouri ndiMambo Mwari, Mwari waIsuraeri, uwo pashi pemaphaphiro ake iwewe wakauya koohwara kwaari.”

¹³ Zvino wakati, “Ngandiangire kuona nyasha mukuona kwako, mambo wangu, ngokuti iwewe wandiembedzera, waereketa ngokuiyanisa kunemurandakadzi wako, kunyazwi ndisikazi kudai ngaumwe wevarandakadzi vako.”

¹⁴ Ngomukuwo wokudya Bhoazi wakati kwaari, “Uya pano, udye chingwa, useye chingwa chako muvhini rinozhazha.” Ndizvo wakagara pasinde pevacheki, akamupa ngokuwanza koroni yakakochwa, wakadya, metsa aguta, nokusiya zvimweni.

¹⁵ Naapo amiruka kunongeredza, Bhoazi wakapanga majaha ake echiti, “Ngaanongeredze nepakati pemwanda yakaemeswa, musamurambidza.

¹⁶ Muvhomore imweni yemwanda maune kuitira iye, muisiye, kuti ainongeredze, musamukaraidza.”

¹⁷ Ndizvo wakanongeredza mumunda uwo metsa madeekoni. Zvino wakapura izvo zvaaiya anongeredza, nazvo zvakada kuita makhirogramu gumi ebhare.

¹⁸ Wakazvitora akaenda nazvo mudhorobha; namazvarira vake vakaona izvo zvaaiya anongeredza. Zvino wakabudisa akapa kwaari izvo zvaaiya akangwarira zvakasara adya akaguta.

¹⁹ Mazvarira vake vakati kwaari, “Wainongeredza pari nyamashi? Newe waishanda pari? Ngaafumiswe uwo wakuringira.” Ndizvo wakaronzera mazvarira ake ngouwo waaishanda naye echiti, “Zina romwamuna wendaishanda naye nyamashi ndiBhoazi.”

²⁰ Zvino Naomi wakati kunomuzakazi wake, “Ngaafumiswe ndiMambo Mwari uwo usikazi kurekera nyasha dzake kunevanopona nevakafa.” Naomi wakatizve kwaari, “Uwo munhu ihama yedu, woukama hwedu hwepasinde.”

²¹ Zvino Ruthe muMoabhi wakati, “Watizve kwendiri, ‘Newe unozogara uri pasinde pevaranda vangu, metsa vapedze kukukura kwangu kweshe.’ ”

²² NaNaomi wakati kunaRuthe muzakazi wake, “Zvakanaka mwanasikana wangu, kuti iwewe ubude nevarandakadzi vake, kuti usazotambudzwa newe kumunda umweni.”

²³ Ndizvo wakabatirira kunevarandakadzi vaBhoazi kuti anongeredze metsa kumagumo kwokukukura bhare nekoroni; naye wakagara namazvarira ake.