Ruthe 1 - Bhaibheri Rakachena muChindau

Erimerekhi neMhuri yake Vanoenda Moabhi

¹ Ngemazuva okutonga kwevatongi, kwakaita nzara munyika, nomunhu umweni weBhetherehema muJudha wakaenda akagaramwo munyika yeMoabhi, iye nomukadzi wake, nevakororo vake vairi.

² Zina romunhu uwo raiya Erimerekhi, nezina romukadzi wake raiya Naomi, nemazina evakororo vake vairi aiya Mahironi naKhirioni; vaiya vaEfratha veBhetherehema muJudha. Navo vakauya munyika yeMoabhi vakagaramwo.

³ Asi Erimerekhi mwamuna waNaomi wakafa; naye wakasara nevakororo vake vairi.

⁴ Ava vakadzitorera vakadzi kubva kuvasikana vekuMoabhi; zina roumwe raiya Orpha, nezina roumweni raiya Ruthe. Naapo vakagaramwo makore anoda kuita gumi,

⁵ Mahironi naKhirioni vakafawo veshe; ndizvo mudzimai uwo wakafirwa ngevakororo vake vairi nemwamuna wake.

Naomi naRuthe Vanopetuka Bhetherehema

⁶ Zvino iye wakamiruka kupetuka nevazakazi vake vairi, kubva kunyika yeMoabhi, ngokuti waiya azwa ari munyika yeMoabhi kuti Mambo Mwari wakahambira vanhu vake nokuvapa zvokudya.

⁷ Ndizvo wakabuda kubva kundau yaaigara, iye nevazakazi vake vairi; vakaenda ngenjira yavo yokuhwirira kunyika yaJudha.

⁸ Asi Naomi wakati kuvazakazi vake vairi, “Endai muhwirire umwe ngaumwe wenyu kumhatso yamai enyu. Mambo Mwari ngaamuitire zvakanaka, kudai ngezvemwakaita imwimwi kunevakafa nokwendiri.

⁹ Mambo Mwari ngaape kwomuri kuzorora umwe ngaumwe wenyu kumhatso dzevamuna venyu.” Zvino wakavachingamidza ngomuromo, navo vakaboorera.

¹⁰ Vakati kwaari, “Haiwa, tinozohwirira newe kuhama dzako.”

¹¹ Asi Naomi wakati kwevari, “Hwirirai sure, vanasikana vangu. Ngenyi muchide kuenda neni? Vachipozve here vakororo mundani mwangu kuti vazoita vamuna venyu?

¹² Hwirirai henyu, vanasikana vangu; endai henyu, ngokuti ndaguma andicharoorwi. Kudai ndaironza kuti, kunyazwi ndinegonda rokuti kudai ndingaa nomwamuna usiku huno nokubereka vakororo,

¹³ mungavagarira here metsa vakura? Mungaramba kuroorwa ngevamuna vamweni here? Haiwa, vanasikana vangu; ngokuti kunopinda kundisvipisa mwoyo kakurutu kupinda imwimwi, ngokuti nyara yaMambo Mwari yakandimukira.”

¹⁴ Zvino vakaboorerazve. Orpha wakachingamidza mazvarira ake ngomuromo; asi Ruthe wakanamatira kwevari.

¹⁵ Ndizvo wakati, “Wona, hurwani ako wahwirira kuhama dzake nokuzvimwari zvake; hwirira newe kuteera hurwani ako.”

¹⁶ Asi Ruthe wakati, “Usandiangiridza kuti ndikusiye, nokuti kuhwirira kubva mukukuteera! Apo pounoenda, neni ndinozoendawo; naapo pounogara ndipo pendinozogarawo; vanhu vako vanozoita vanhu vangu, naMwari wako unozoita Mwari wangu.

¹⁷ Apo pounofira, ngependinozofirawo, naapo ndipo pendinozotsirwa. Mambo Mwari ngaaite kudaro kwendiri nokupindazve, kudai chiripo chiro chimweni chinozotiparadzanisa iwewe neinini, kwega kufa!”

¹⁸ Naapo Naomi aona kuti wagwinyisira kuenda naye, wakarekera kuereketa kwaari.

¹⁹ Ndizvo vairi ava vakaenda metsa vaguma Bhetherehema. Naapo vaiya vaguma Bhetherehema, dhorobha reshe rakaita nyongano ndivo nevakadzi, vakati, “Uyu ndiye Naomi here?”

²⁰ Naye wakati kwevari, “Musachandidaidza kuti Naomi, ndidaidze kuti Mara, ngokuti Uwo Unesimbareshe wakandiitira zvinovava.

²¹ Ndakabuda kuenda ndakazara, asi Mambo Mwari wakandipetudza kanyi ndisichina chiro; muchandidaidza ngenyi kuti Naomi, mwechiona kuti Mambo Mwari akandiitira ushungu, noUwo Unesimbareshe wakandiunzira madambudziko?”

²² Ndizvo Naomi wakapetuka pamwepo naRuthe muMoabhi, muzakazi wake, uwo wakapetuka naye kubva kunyika yeMoabhi. Navo vakaguma muBhetherehema ngenguva yokutanga kwokukukurwa kwebhare.