Ruka 5 - Bhaibheri Rakachena muChindau

Jesu Unodaidza Vadzidzi voKutanga

¹ Naapo mbungano ichamumanika kuti izwe izwi raMwari, iye wakaema pagandwa reGenesareta.

² Naye wakaona ngarava mbiri dzakaema pagandwa, asi vabati vehove vaiya vabuda mungarava vechisuka nhaa dzavo.

³ Naye echipotera kuneimwe yengarava, yaiya yaSimoni, wakamukumbira kuti aisundire mugandwa kadodoko kubva pahumbikumbi. Naye wakagara pashi, akadzidzisa mbungano ari mungarava.

⁴ Naapo apedza kuereketa, wakati kunaSimoni, “Sundira kwakadzama mwechidzasa nhaa dzenyu koobata hove.”

⁵ Simoni wakapingura akati, “Mambo, tashanda usiku hweshe, atizi kubata chiro! Asi ngeizwi rako ndinozodzasa nhaa.”

⁶ Naapo vaita kudaro, vakatendenedza hove zhinji, nenhaa dzavo dzaibauka.

⁷ Vakakopera vamweni vavo vaiya mungarava imweni kuti vauye vavadetsere. Navo vakauya, vakazadza ngarava dzeshe mbiri, nadzo dzakatanga kudzemera.

⁸ Asi Simoni Petro aona wakadzirigira pashi pamabvi aJesu echiti, “Mambo, ibva kwendiri, ngokuti ndiri munhu wakashata.”

⁹ Ngokuti iye wakashamiswa, naavo veshe vaiya naye ngokuwanda kwehove dzevaiya vabata.

¹⁰ Ndizvo zvakaitikawo kunaJakobe naJohani, vakororo vaZebhedhi, avo vaiya shamwari dzaSimoni. NaJesu wakati kunaSimoni, “Usatya; kubvira zvinopano unozobata vanhu.”

¹¹ Naapo vaunza ngarava dzavo kuhumbikumbi, vakasiya zveshe, vakamuteera.

Jesu Unomhodyosa Munhu uneMapere

¹² Naapo ari munerimwe remadhorobha, penya, kwakauya munhu waiya nemapere muiri wake weshe; naapo aona Jesu, wakawa pashi ngehope yake, akamupota echiti, “Mambo, kudai wechida, ungandimhodyosa.”

¹³ Naye wakatambanudza nyara yake, akamubata, akati, “Ndinoda, wechimhodyoka.” Paripo mapere akapera.

¹⁴ Naye wakamupanga kuti asazoronzera munhu naumwe; asi wakati, “Enda, udzipangidzire kumupristi, upe mubairo ngendaa yokumhodyoswa kwako, kudai ngezvaakapanga Mosi, kuita chapupu kwavari.”

¹⁵ Asi mbiri yake yakaangirira kuteketeswa. Nembungano huru yakaungana pamwepo kuzwa nokuponeswa nhenda dzayo.

¹⁶ Asi iye wakadzipaura kuenda murubaya kookumbira.

Jesu Unoponesa Munhu Wakaoma Muiri

¹⁷ Ngerimweni remazuva awo echidzidzisa, vaiyapo vaFarisi nevadzidzisi veMipango vakagarapo, avo vaiya vakauya kubva kumaguta eshe eGarire, Judhia neJerusarema; nesimba raMambo Mwari rokuponesa raiya naye.

¹⁸ Penya, vanhu vakaunza munhu wairwara ngokuoma muiri, ari pamusengere, navo vakatsvaka kuti vamupotedze mukati nokumuradzika pamberi paJesu.

¹⁹ Vasikaoni njira yokumupotedza ndiyo mukati ngendaa yembungano, vakakwira padera vakaita buri padenga remhatso, vakamudzasa pashi ari pamusengere pakati pevanhu pamberi paJesu.

²⁰ Iye echiona kugonda kwavo wakati, “Mwamuna, zvishaishi zvako zvarekererwa kwouri.”

²¹ Vanyori nevaFarisi vakatanga kubvunzana pachavo vechiti, “Ndiani uyu unoereketa zvituko? Ndiani ungakona kurekerera zvishaishi, kwega Mwari?”

²² Asi Jesu echindozia kupinimidza kwavo, wakapingura akati kwavari, “Munobvunzana ngenyi mumwoyo yenyu?

²³ Chiinyi chinopinda kureruka, kuronza kuti, ‘Zvishaishi zvako zvarekererwa kwouri,’ nokuti kuronza kuti, ‘Miruka uhambe?’

²⁴ Asi kuti muzie kuti Mukororo woMunhu unesimba munyika rokurekerera zvishaishi” (wakati kuneuwo waiya nenhenda yokuoma muiri,) “Ndinoti kwouri, miruka utore musengere wako, uende kumhatso yako.”

²⁵ Paripo wakamiruka pamberi pavo, wakatora icho chaaiya akaata padera pacho, akaenda kumhatso yake echikudza Mwari.

²⁶ Navo veshe vakabatwa ngokushamiswa, navo vakakudza Mwari, vakazara ngokutya vechiti, “Taona zvinoshamisa nyamashi.”

Jesu Unodaidza Revhi

²⁷ Ngesure kweizvi wakabvapo, akaona mubharisi zina rake ndiRevhi, akagara pandau yokubharisa chibharo, wakati kwaari, “Nditeere.”

²⁸ Naye wakasiya zveshe, wakamiruka, akamuteera.

²⁹ NaRevhi wakamuitira dhiri guru mumhatso yake; vaiyapo vazhinji vevabharisi nevamweni avo vaaigara navo pakudya.

³⁰ VaFarisi nevanyori vavo vakavhuruvhutira vadzidzi vake vechiti, “Munodya nokumwa ngenyi nevabharisi nevashaishi?”

³¹ Jesu wakapingura, akati kwavari, “Avo vakapona avatami n'anga, asi avo vanorwara;

³² andizi kuuya kudaidza vakarurama akadi, asi vashaishi kuti vatenderuke.”

Mubvunzo ngendaa yoKuera Kudya

³³ Navo vakati kwaari, “Vadzidzi vaJohani vanoera kudya kazhinji vechikumbira, ngokudarozve naavo vevaFarisi, asi vadzidzi vako vanodya nokumwa.”

³⁴ Jesu wakati kwavari, “Mungakona here kuita kuti vemhatso yanyamuroorwa vaere kudya apo mukwambo achinavo?

³⁵ Asi mazuva anozouya apo mukwambo unozoduswa kwavari, naapo vanozoera kudya ngaawo mazuva.”

³⁶ Wakavaronzera muedzaniso echiti, “Akuna munhu unobaura chitembwe pajira idzva kuchitungira pajira ratsakara; echiita kudaro, unozoshaishira jira idzva nechitembwe chitsva achizotodzani nejira rakatsakara.

³⁷ Apana munhu unoisa vhini idzva mukati mwenyede dzatsakara; echiita kudaro, vhini idzva rinozoputisa nyede nevhini rinozorashika nenyede inozotsakatika.

³⁸ Asi vhini idzva rinoiswa munyede itsva.

³⁹ Zve apana munhu wakambomwa vhini rekare, paripo orooemura idzva; ngokuti unoti, ‘Rekare rakapinda kunaka.’ ”