Ruka 4 - Bhaibheri Rakachena muChindau

Kuedzwa kwaJesu

¹ NaJesu, azadzwa ndiMweya Wakachena, wakahwirira kubva Jorodhani, wakasundwa ndiMweya kuenda kushango.

² Wakapedza mazuva makumi marongomuna mushango echiedzwa ndiDhiabhorosi. Naye aazi kudya chiro ngaawo mazuva; naapo apera, wakafukama.

³ Dhiabhorosi wakati kwaari, “Kudai uri Mukororo waMwari, panga buwe iri kuti riite chingwa.”

⁴ Jesu wakamupingura akati, “Kwakanyorwa kuti, ‘Munhu aazoponi ngechingwa chega.’ ”

⁵ Dhiabhorosi wakamukwidza pamutunhu, akamupangidzira umambo hweshe ngekamukuwo kadoko,

⁶ naye wakati kwaari, “Ndinozopa kwouri iri simba reshe nouthende hwazvo, ngokuti rakapuwa kwendiri, kunyazwi ngouri wendinoda ndinozomupa.

⁷ Ndizvo kudai iwewe wechizondidira zveshe zvinozoita zvako.”

⁸ NaJesu wakamupingura akati kwaari, “Kwakanyorwa kuti, ‘Unozodira Mambo Mwari wako, umushandire iye ega.’ ”

⁹ Naye wakamutungamirira kuenda Jerusarema, akamuisa padera pechachungu cheTemperi, akati kwaari, “Kudai uri Mukororo waMwari, dzikandire pashi kubva panapa,

¹⁰ ngokuti kwakanyorwa kuti, ‘Iye unozopanga ngirosi dzake ngepamusoro pako, kuti dzikungwarire,

¹¹ nomunyara dzadzo dzinozokubata, kuti kunyazwi ngouri mukuwo usapumhunwa tsoka yako pabuwe.’ ”

¹² NaJesu wakapingura akati kwaari, “Kwakanyorwa kuti, ‘Usazoedza Mambo Mwari, Mwari wako.’ ”

¹³ Naapo Dhiabhorosi aiya apedza zviedzo zveshe, wakabva kwaari kwekamukuwo.

Jesu Unotanga Mushando wake muGarire

¹⁴ Jesu wakahwirira Garire ari musimba roMweya, nembiri yakateketeswa ngendaa yake munyika dzeshe dzinotendenedza.

¹⁵ Naye wakadzidzisa mumhatso dzavo dzokudira, echikudzwa ngevanhu veshe.

Jesu Unorambwa muNazaretha

¹⁶ Naye wakauya Nazaretha, apo paakakurira; naye wakaenda mumhatso yokudira, kudai ngomushuma wake ngezuva reSabatha, akaema kudzidza.

¹⁷ Kwakapuwa kwaari bhuku romuprofeti Isaya. Naye wakabeura bhuku, akaona apo pakanyorwa kuti,

¹⁸ “Mweya waMambo Mwari uri padera pangu, ngokuti iye wakandidzodza kuchumaira vhangeri kuvarombo. Wakandituma kuteketesa kusunhurwa kumabhanditi nokusvinurwa madziso emapofu, kusunhura avo vakatsikirirwa,

¹⁹ kuteketesa gore rinoashirika raMambo Mwari.”

²⁰ Naye wakakonya bhuku, akarihwirinza kunemuranda, akagara pashi. Nemadziso eavo veshe vaiya mumhatso yokudira akamuringira.

²¹ Naye wakatanga kuereketa kwavari kuti, “Nyamashi ichi chinyorwa chazadzisika munzee dzenyu.”

²² Veshe vakamupupurira zvakanaka, vakashamiswa ngemazwi enyasha akabva kumuromo wake; navo vakati, “Uyu andiyepi here mukororo waJosefa?”

²³ Naye wakati kwavari, “Ngegwinyiso munozoti kwendiri ngeichi chisana kuti ‘N'anga dziponese iwewe. Izvo zvetakazwa kuti wakazviita muKhapernaume, chizviitazve panapa munyika yekwako.’ ”

²⁴ Wakati, “Ngegwinyiso ndinoti kwomuri, akuna muprofeti unoashirika munyika yake.

²⁵ Asi ngegwinyiso ndinoti kwomuri, vaiya vazhinji vaiya shirikadzi muIsuraeri ngemazuva aErija, apo denga rakakonywa makore matatu nemwedzi mitanhatu, kwakaita nzara huru padera penyika yeshe;

²⁶ asi Erija aazi kutumwa kunoumwe wavo, asi kwega kuZarefathi, munyika yeSidhoni, kunedzimai raiya shirikadzi.

²⁷ Vaiyapo vazhinji vaiya namapere muIsuraeri ngomukuwo waErisha muprofeti; kwaiya kusina naumwe wavo wakamhodyoswa, asi Naamani ega muSiria.”

²⁸ Navo vakazara veshe ngoushungu vaiya mumhatso yokudira, apo vazwa izvi zviro.

²⁹ Navo vakamiruka, vakamubudisa kubanze kwedhorobha, vakamukweyera kuruwere rwomutunhu apo paiya pakaakiwa dhorobha ravo, kuti vamukandire pashi ngetsukupinya.

³⁰ Asi iye wakahamba ngepakati pavo akaenda.

Munhu Une Dhimoni

³¹ Naye wakadzaka Khapernaume, dhorobha reGarire. Waivadzidzisa ngezuva reSabatha.

³² Navo vakashamiswa ngokudzidzisa kwake, ngokuti mazwi ake aiya nesimba.

³³ Mumhatso yokudira kwaiyapo munhu unemweya wedhimoni unetsvina; naye wakazhambarara ngeizwi guru,

³⁴ akati, “Iya! Tinenyi isusu newe, iwewe Jesu weNazaretha? Wauya here kutiuraya? Ndinokuzia kuti urianani, ndiwe Wakachena waMwari.”

³⁵ Asi Jesu wakaukaraidza akati, “Nyarara, buda kubva kwaari!” Naapo dhimoni rakamukandira pashi pakati pavo, rakabuda kwaari, risikazi kumuremadza.

³⁶ Vakashamiswa veshe navo vakaereketa umwe noumweni vechiti, “Izwi iri rinoronzenyi? Ngokuti unopanga mweya ine tsvina ngesimba, nayo inobuda.”

³⁷ Mbiri yake yakateketeswa munyika dzeshe dzakatendenedza.

Jesu Unoponesa Vanhu Vazhinji

³⁸ Naye wakamiruka kubuda mumhatso yokudira, akapotera mumhatso yaSimoni. Ambuya vaSimoni vaiya nomutsarara mukuru, navo vakamupota ngepamusoro pavo.

³⁹ Naye wakaema ngedera kwavo, akakaraidza mutsarara, nomutsarara wakavasiya. Paripo vakamiruka, vakavashandira.

⁴⁰ Naapo zuva roopota, avo veshe vaiya nevanorwara ngenhenda dzakaparadzana, vakavaunza kwaari; naye wakaisa nyara dzake padera poumwe ngaumwe wavo, akavaponesa.

⁴¹ Nemadhimoni akabudawo kubva kuvazhinji, echizhambarara echiti, “Iwewe uri Mukororo waMwari!” Asi wakaakaraidza, aazi kuatendera kuti aerekete, ngokuti aimuzia kuti ndiKristu.

Jesu Unochumaira muMhatso yoKudira yeVaJudha

⁴² Naapo kwaedza iye wakabuda, akaenda murubaya musina vanhu. Vanhu vakamutsvaka, vakauya kwaari vechida kumubatiridza kuti asabva kwavari;

⁴³ asi wakati kwavari, “Kunosisira kuti ndichumaire vhangeri roumambo hwaMwari mumadhorobha amweniwo, ngokuti icho ndicho chendakatumirwa.”

⁴⁴ Naye waichumaira mumhatso dzokudira dzeJudhia.