Ruka 3 - Bhaibheri Rakachena muChindau

Kuchumaira kwaJohani Mubhabhatidzi

¹ Ngegore regumi namashanu rokutonga kwaThibheriusi Siza, Phontiusi Piratu mutongi weJudhia, naHerodhi sadunhu weGarire, nomunun'una wake Firipu sadunhu wenyika yeIturia neyeTrakhonitisi, naRusaniasi sadunhu weAbhirene,

² Anasi naKaiafasi, vari vapristi vakuru, izwi raMwari rakauya kuna Johani mukororo waZekharia ari mushango;

³ naye wakauya kunyika yeshe inotendenedza Jorodhani, echichumaira rubhabhatidzo rwokutenderuka kwokurekererwa kwezvishaishi.

⁴ Kudai ngezvezvakanyorwa mubhuku remazwi aIsaya muprofeti kuti, “Izwi rounodaidzira mushango kuti: Nasirirai njira yaMambo Mwari, ruramisai makwara ake.

⁵ Mapani eshe anozozadzwa, nemitunhu yeshe nezvimitunhu zvinozodzaswa pashi, nezvakashongoroka zvinozoruramiswa, nenjira dzakaita marindi dzinozoserereswa;

⁶ nevanhu veshe vanozoona ruponeso rwaMwari.”

⁷ Ndizvo wakati kuvazhinji avo vakabuda kuuya kuzobhabhatidzwa ndiye, “Imwimwi vana vemabuura! Ndiani wakamunyowedza kuti mutize ushungu hunouya?

⁸ Ndizvo mwechibara michero inoonisa kutenderuka, musatanga kukarakadza mukati mwenyu kuti, tina Abrahama baba edu, ngokuti ndinoti kwomuri, Mwari unesimba kumusira vana kunaAbrahama ngaaya mapuwe.

⁹ Kunyazwi zvinopano sanho ratoiswa panzinde dzemiti; ndizvo muti weshe usikabari michero yakanaka unotemerwa pashi nokukandirwa mumwoto.”

¹⁰ Nembungano yakamubvunza yechiti, “Ndizvo tinozoitenyi?”

¹¹ Naye wakapingura, akati kwavari, “Uwo unemabhachi mairi, ngaakowane nousina; nouwo unezvokudya ngaaitewo kudaro.”

¹² Nevabharisi vechibharo vakauyawo kuti vazobhabhatidzwa, vakati kwaari, “Mudzidzisi, isusu tinozoitenyi?”

¹³ Wakati kwavari, “Musapamba zviro zvinopinda izvo zvakaemeserwa kwomuri.”

¹⁴ Majoni nawo akamubvunzawo, akati, “Nesuwo tinozoitenyi?” Naye wakati kwavari, “Musazotorera munhu chiro ngesimba nokuti musazoitira munhu ndaa yokunyepa, asi mwechigutiswa ngemisharo yenyu.”

¹⁵ Naapo vanhu vachakarira, navo veshe vaidzibvunza mumwoyo ngendaa yaJohani, kuti pamweni ndiye Kristu,

¹⁶ Johani wakapingura echiti kwavari veshe, “Inini ndinomubhabhatidza ngemvura, asi unouya uwo unondipinda ngesimba, uwo wendisikasisiri nokusunhura rusinga rwemagwada ake. Unozomubhabhatidza ndiMweya Wakachena nemwoto.

¹⁷ Aye unerutsero rwake munyara yake, kuti anase kutsvaira mbuwa yake nokuunganidza koroni mudura rake; asi makoto unozoapisha ngomwoto usikadzimi.”

¹⁸ Ndizvo wakachumaira mashoko akanaka nezviro zvimweni zvakawanda kuvanhu echivapanga.

¹⁹ Asi Herodhi sadunhu, arambidzwa ndiye ngendaa yaHerodhiasi, mukadzi womunun'una wake, zve ngendaa yezveshe zvakashata zvaaiya akaita Herodhi,

²⁰ wakatutsira ichi chiro padera pazvo zveshe, kuti wakakonyera Johani mutirongo.

Kubhabhatidzwa kwaJesu

²¹ Naapo vanhu veshe vakabhabhatidzwa, naapo Jesu wakabhabhatidzwawo, achakumbira, denga rakabeurwa,

²² noMweya Wakachena, wairingirika wakadai ngenjia, wakadzaka padera pake, neizwi rakauya rechibva mudenga rechiti, “Iwewe uri Mukororo wangu, unodikanwa, ndinonasa kudakara ndiwe.”

Madzibabamukuru aJesu

²³ Jesu wakaamba kudzidzisa anemakore anoda kuita makumi matatu, ari mukororo waJosefa, mukuona kwevanhu, uwo waiya mukororo waHeri,

²⁴ mukororo waMathati, mukororo waRevhi, mukororo waMereki, mukororo waJanai, mukororo waJosefa

²⁵ mukororo waMatatiasi, mukororo waAmosi, mukororo waNahumi, mukororo waEsiri, mukororo waNagai,

²⁶ mukororo waMaathi, mukororo waMatathiasi, mukororo waSemeini, mukororo waJoseki, mukororo waJodha,

²⁷ mukororo waJohanani, mukororo waResa, mukororo waZerubhabheri, mukororo weShearatieri, mukororo waNeri,

²⁸ mukororo waMereki, mukororo waAdhi, mukororo waKhosami, mukororo waEramadhamu, mukororo waEri,

²⁹ mukororo waJoshua, mukororo waErieza, mukororo waJorimu, mukororo waMathati, mukororo waRevhi,

³⁰ mukororo waSimeoni, mukororo waJudha, mukororo waJosefa, mukororo waJonamu, mukororo waEriakimu,

³¹ mukororo waMerea, mukororo waMena, mukororo waMatatha, mukororo waNathani, mukororo waDhavhidha,

³² mukororo waJesi, mukororo waObhedhi, mukororo waBhoazi, mukororo waSara, mukororo waNashoni,

³³ mukororo waAminadhabhi, mukororo waAdhimini, mukororo waArni, mukororo waHezironi, mukororo waPerezi, mukororo waJudha,

³⁴ mukororo waJakobe, mukororo waIsaka, mukororo waAbrahama, mukororo waThera, mukororo waNahori,

³⁵ mukororo waSerugi, mukororo waReu, mukororo waPheregi, mukororo waEbha, mukororo waShera,

³⁶ mukororo waKhenani, mukororo waArifakisadhi, mukororo waShemu, mukororo waNoa, mukororo waRameki,

³⁷ mukororo waMethusera, mukororo waEnokhi, mukororo waJaredhi, mukororo waMaharareri, mukororo waKhenani,

³⁸ mukororo waEnosi, mukororo waSethi, mukororo waAdhamu, mukororo waMwari.