Ruka 19 - Bhaibheri Rakachena muChindau

Jesu naZakheusi

¹ Wakapotera muJerikho echipinda ndimwo.

² Penya, munhu waizwi Zakheusi; iye waiya mukuru wevabharisi, waiya gurudza.

³ Naye wakatsvaka kuona Jesu kuti ndiani, asi waiya asikakoni ngendaa yembungano, ngokuti waiya mufupi.

⁴ Ndizvo wakarumba kuenda mberi, akakwira mumuonde kuti amuone, ngokuti waipinda ngeiyo njira.

⁵ Naapo Jesu agumapo wakaringira mudenga, akati kwaari, “Zakheusi, kasira kudzaka pashi; ngokuti kunosisira kuti ndigare mumhatso yako nyamashi.”

⁶ Ndizvo wakakasira kudzaka pashi, akamuashira ngokudara.

⁷ Naapo vazviona vakavhuruvhuta veshe vechiti, “Wapotera kuita mueni womunhu mushaishi.”

⁸ NaZakheusi wakaema, akati kunaMambo, “Ringira, Mambo, ndinopa hafu youpfumi hwangu kuvarombo; kudai ndakatora chiro kumunhu ngourimbwi, ndinomuhwirinzira zvakapetwa karongomuna.”

⁹ Jesu wakati kwaari, “Nyamashi ruponeso rwaguma kuneiyi mhatso, ngokuti nayewo mukororo waAbrahama.

¹⁰ Ngokuti Mukororo woMunhu wakauya kootsvaka nokuponesa izvo zvakarashika.”

Muedzaniso weZvigurwa zveMukore

¹¹ Naapo vachazwa izvi zviro, wakaangira kuvaronzera muedzaniso, ngokuti waiya pasinde neJerusarema, ngokutizve ivo vaikarira kuti umambo hwaMwari hwaizokasira kuoneka apapo.

¹² Ndizvo wakati, “Munhu mukuru wakaenda kunyika yaiya kuretu kuti andoashira umambo nokupetukazve.

¹³ Wakadaidza varanda vake gumi, akavapa umwe ngaumwe chigurwa chomukore, wakati kwavari, ‘Barisai metsa ndiuye.’

¹⁴ Asi vanhu vomunyika yake vakamunyenya, vakatuma vatumwa sure kwake vechiti, ‘Atidi kuti munhu uyu atonge padera pedu.’

¹⁵ Naapo oopetuka, aashira umambo, wakapanga kuti avo varanda, vaaiya akapa zvigurwa zvemukore, vadaidzwe kwaari, kuti azie zvevakauyirwa ngokuibarisa.

¹⁶ Uwo wokutanga wakauya pamberi pake, akati, ‘Mambo, chigurwa chako chomukore chakauyirwa ngezvigurwa zvimweni gumi.’

¹⁷ Naye wakati kwaari, ‘Wakanasa, iwewe muranda wakanaka! Ngokuti wakagondeka ngezvishomani, wechitonga padera pemadhorobha gumi.’

¹⁸ Newechipiri wakauya akati, ‘Mambo, chigurwa chako chomukore chakauyirwa ngezvigurwa zvimweni zvishanu.’

¹⁹ Naye wakati kwaarizve, ‘Wechitonga padera pemadhorobha mashanu.’

²⁰ Naapo umweni wakauya, akati, ‘Mambo, penya, chigurwa chako chomukore, icho chendakangwarira chiri mudhuku,

²¹ ngokuti ndakakutya, ngokuti uri munhu usikakonwi; unotonhera icho chousikazi kuisa pashi, newe unocheka icho chousikazi kusima.’

²² Wakati kwaari, ‘Ngezvinobuda kubva pamuromo pako ndinozokutonga, iwewe muranda wakashata! Iwewe waitozia kuti ndiri munhu usikakonwi, ndechitonhera icho chendisikazi kuisa pashi, nokucheka icho chendisikazi kusima.

²³ Ndizvo wakarekera ngenyi kuisa chigurwa changu kwavari mubhange, neni mukuuya kwangu ndaizowona icho nokuuyirwa kwacho?’

²⁴ Naye wakati kuneavo vaiema pasinde, ‘Mutorerenyi kubva kwaari icho chigurwa chomukore, mupe kwaari uwo unegumi rezvigurwa zvomukore.’

²⁵ Navo vakati kwaari, ‘Mambo, uwo unegumi rezvigura zvomukore!’

²⁶ Ndinoti kwomuri, ‘Kunemunhu weshe unacho unozopuwa, nokwaari usina, neicho chaanacho chinozotorwa kubva kwaari.

²⁷ Asi ao magaa angu, aiya asikatendi kuti nditonge padera pao, aunzenyi panapa muauraye pamberi pangu.’ ”

Kupinda kwoKunyisa kwaJesu muJerusarema

²⁸ Naapo aronza izvi, wakatungamira pamberi pavo kukwira Jerusarema.

²⁹ Naapo akwedzera pasinde peBhethifaje neBhethani, ngepaMutunhu unozwi wemaOrivhi, wakatumira mberi vairi vevadzidzi vake

³⁰ echiti, “Endai muguta iro remwakaringirana naro, umwo mwopindamwo munozoona tsiru rembongoro rakasungwa, iro risikazi kumbogadhwa ngomunhu. Risunhurenyi muuye naro.

³¹ Kudai aripo unozomubvunza kuti, ‘Munorisunhurirenyi?’ Munozoronza kuti, ‘Mambo unorida.’ ”

³² Ndizvo avo vakatumwa vakaenda, vakaona kudai ngezvaakaronza kwavari.

³³ Naapo vachasunhura tsiru, vanikazi varo vakati kwavari, “Munorisunhurirenyi tsiru?”

³⁴ Navo vakati, “Mambo unorida.”

³⁵ Navo vakariunza kunaJesu, vakaisa zvokufuka zvavo padera petsiru, vakakwidza Jesu padera paro.

³⁶ Naapo agadha tsiru, vakachinga zvokufuka zvavo munjira.

³⁷ Naapo echikwedzera pasinde pokudzaka Mutunhu wemaOrivhi, mbungano yeshe yevadzidzi vakatanga kudakara nokukudza Mwari ngeizwi guru ngendaa yemishando yeshe ine simba yevaiya vaona

³⁸ vechiti, “Unomuchena Mambo uwo unouya ngezina raMambo Mwari! Kunyarara mudenga nouthende mudengadenga!”

³⁹ Vamweni vevaFarisi mukati mwembungano vakati kwaari, “Mudzidzisi, rambidza vadzidzi vako.”

⁴⁰ Naye wakapingura, akati kwavari, “Ndinomuronzera kuti, kudai ava vaizonyarara, mapuwe emene anozodaidzira.”

Jesu Unochemera Jerusarema

⁴¹ Naapo akwedzera pasinde wakaona dhorobha, wakarichemera

⁴² echiti, “Dai waizia ngezuva iri izvo zviro zvingakupa kunyarara kwako! Asi zvinopano zvakafishika kumadziso ako.

⁴³ Ngokuti mazuva anozokugumira, apo magaa ako anozokushoshera rushosha nokukutendenedza, akukonyere mukati kumarutii eshe.

⁴⁴ Anozokupwanyira pashi, nevana vako vari mukati mwako, navo avazosii mukati mwako nebuwe rimwe rakagadzikwa padera perimweni; ngokuti iwewe auzi kuzia mukuwo wokuhambirwa kwako.”

Jesu Unochenesa Temperi

⁴⁵ Naye wakapotera muTemperi, akatanga kuvadzingira kubanze avo vaitengesa

⁴⁶ echiti kwavari, “Kwakanyorwa kuti, ‘Mhatso yangu inozozwi imhatso yomukumbiro;’ asi imwimwi mwaiita bako rembavha.”

⁴⁷ Naye waidzidzisa mazuva eshe muTemperi. Vapristi vakuru nevanyori nevakuru vevanhu vakatsvaka kumuuraya;

⁴⁸ asi avazi kuona chiro chevangaita, ngokuti vanhu veshe vakabatirira kwaari vechipurutana mazwi ake.