Ruka 14 - Bhaibheri Rakachena muChindau

Jesu Unoponesa Munhu Unorwara ngeZuva reSabatha

¹ Ngezuva reSabatha rimweni Jesu wakapotera mumhatso yomutongi uwo waiya umwe wevaFarisi, koodya, vaimuringisisa.

² Penya, kwaiyapo pamberi pake munhu waiya nenhenda yechizvimbo.

³ NaJesu wakaereketa kunemagweta nevaFarisi echiti, “Kunotenderwa here ngemipango kuponesa ngezuva reSabatha nokuti akutenderwi?”

⁴ Asi ivo vakanyarara. Naye wakamutora, akamuponesa, akamurekera kuti aende.

⁵ Naye wakati kwavari, “Ndiani kwomuri, unemwana nokuti kabi yake yawa muhunza, usikazoibudisi ngokukasira ngezuva reSabatha?”

⁶ Navo avazi kukona kumupingura ngendaa iyi.

Kudzipfaisa noKuitira Vanhu Vamweni Nyasha

⁷ Zvinopano wakavaronzera muedzaniso avo vakakokwa, naapo aona kuti vatsanangura zvigaro zvepamberi echiti kwavari,

⁸ “Naapo wakokwa kunyazwi ngouri munhu kudhiri romuchadho, usazogara pashi pandau yepamberi, ngokuti pamweni munhu mukuru kupinda iwewe wakokwawo ndiye;

⁹ nouwo wakakukoka iwewe naye unozouya echiti kwouri, ‘Taraukira uyu agare panapa,’ naapo unozotanga kutsveruka ngekoogara ndau yesure.

¹⁰ Asi apo wakokwa, enda ugare pandau yesure, naapo uwo wakakukoka ouya, ungazoti kwouri, ‘Shamwari, enda pandau yepamberi;’ naapo unozokuriswa mukuona kwavo veshe vanogara newe pakudya.

¹¹ Ngokuti iye unodzikurisa unozopfaiswa, nouwo unodzipfaisa unozokuriswa.”

¹² Wakati kuneuwozve wakamukoka, “Apo wonasira kudya kwemasikati nokuti kwemadeekoni, usazodaidza shamwari dzako nokuti vakoma vako nokuti hama dzako nokuti makurudza ari vaakirwana vako, kuti pamweni vanozokukokawo, nakwo kuite kuhwirinzirwa kwouri.

¹³ Asi apo woonasira kudya iwewe, koka varombo, vakakuwara nezvirema nemapofu;

¹⁴ newe unozofumiswa, ngokuti avo avana chokuhwirinzira kwouri. Ngokuti iwewe unozohwirinzirwa mukumuka kwevakarurama.”

Muedzaniso weDhiri Guru

¹⁵ Naapo umwe weavo vaigara naye patafura pakudya azwa izvi, wakati kwaari, “Unomuchena uwo unozodya chingwa muumambo hwaMwari!”

¹⁶ Asi iye wakati kwaari, “Munhu wakanasira kudya kwemadeekoni kwakawanda, wakakoka vazhinji;

¹⁷ naye wakatuma varanda vake ngomukuwo wokudya kwemadeekoni kooronza kwavari vakakokwa kuti, ‘Chiuyai; ngokuti zviro zveshe zvanasirwa zvino.’

¹⁸ Asi veshe vakatanga kutendamurandu ngomwoyo umwe. Uwo wokutanga wakati kwaari, ‘Ndakatenga munda, nakwo kunosisira kuti ndiende ndiuone; ndapota ngandirekererwe.’

¹⁹ Noumweni wakati, ‘Ndakatenga kabi dzemajoka mashanu, neni ndinoendayo koodziedza. Ndapota ngandirekererwe.’

²⁰ Noumweni wakati, ‘Ndakaroora mukadzi, ndizvo andingakoni kuuyayo.’

²¹ Nomuranda uwo wakauya akaziisa mambo wake izvi. Naapo mune wemhatso wakatseneka, akati kumuranda wake, ‘Enda ngokukasira mumapato nomunjira dzomudhorobha, uvaunze panapa varombo nevakakuwara nemapofu nezvirema.’

²² Nomuranda wakati, ‘Mambo, icho chewapanga chaitwa, asi ndau ichirimwo.’

²³ Namambo wakati kuno muranda wake, ‘Buda uende munjira nomumarushosha, uite kuti vapotere, kuti mhatso yangu izare.

²⁴ Ngokuti ndinomuronzera kuti, apana munhu naumwe weavo vakakokwa unozoraira kudya kwangu kwemadeekoni.’ ”

Mutengo woKuita Mudzidzi waJesu

²⁵ Zvinopano yaihamba naye mbungano hurutu. Naye wakakunukuka, akati kwavari,

²⁶ “Kudai aripo munhu unoda kuuya sure kwangu, asikanyenyi baba ake namai ake, mukadzi wake, vana vake, vakoma vake, hanzvadzi, eya, nokurarama kwakezve, aangakoni kuita mudzidzi wangu.

²⁷ Iye usikatwari muchinjiko wake nokuuya sure kwangu, aangakoni kuita mudzidzi wangu.

²⁸ Ngokuti ndiani kwomuri echida kuaka rusvingo, asikatangi kugara pashi aerenge mare yarwo, kuti unayo here yokurupedza?

²⁹ Kuti pamweni apedza kuisa madzeyo, asikakoni kurupedza, avo veshe vanoruona vatange kumuitire jee

³⁰ vechiti, ‘Uyu munhu wakatanga kuaka, asikazi kukona kurupedza.’

³¹ Nokuti ndiani mambo, uwo echienda kooshongana namambo umweni mukurwa, asikatangi kugara pashi apangane kuti dani unesimba here ane vanhu makumi emazana gumi kushongana nouwo unouya kurwa naye anemakumi emazana makumi mairi evanhu?

³² Nokuti umweni achikuretu yaamho, atume nhumwa kubvunza chaanoda chokuti vaiyane.

³³ Ndizvo kunyazwi ndiani kwomuri usikasii zveshe zvaanazvo, aangakoni kuita mudzidzi wangu.

Munyu Usikadetseri Chiro

³⁴ “Munyu wakanaka, asi kuti munyu warasha kunaka kwawo, ucharungwa ngenyi?

³⁵ Auchadetseri chiro kuuisa mumunda nokuti kuita mwarira; vanhu vanourasha kubanze. Uwo unenzee dzokuzwa, ngaazwe.”