Revhi 9 - Bhaibheri Rakachena muChindau

Aroni Unopira Midiro

¹ Ngezuva rechisere Mosi wakadaidza Aroni nevakororo vake, nevakuru vaIsuraeri.

² Naye wakati kunaAroni, “Tora mukono mutsva kuita mudiro wokushaisha, negondohwe risina kuremara kuita mudiro wokupisha, uzvipire pamberi paMambo Mwari.

³ Unozoereketa kuvanhu vaIsuraeri wechiti, ‘Torai gotokoto rembudzi kuita mudiro wokushaisha, nekonyana nekakwai, zveshe zvinegore rimwe, zvisina kuremara, kuti zviite mudiro wokupisha,

⁴ nomukono negondohwe kuti zviite midiro yokuiyana, kuti zvipirwe pamberi paMambo Mwari, nomudiro wezviyo wakakumanidzwa nemafuta. Ngokuti nyamashi Mambo Mwari unozooneka kwomuri.’ ”

⁵ Vakaunza izvo zvaakapanga Mosi pamberi petende romushongano; nembungano yeshe yakakwedzera yakaema pamberi paMambo Mwari.

⁶ NaMosi wakati, “Ichi ndicho chiro chaakapanga Mambo Mwari kuti muite, nouthende hwaMambo Mwari hunozooneka kwomuri.”

⁷ Zvino Mosi wakati kunaAroni, “Kwedzera paarita, upire mudiro wako wokupisha, upire muripo wako iwewe nevanhu; upire mudiro wevanhu, nokuita muripo wavo, kudai ngezvaakapanga Mambo Mwari.”

⁸ Aroni wakakwedzera kuarita, wakauraya konyana romudiro wokushaisha, waiya wake emene.

⁹ Nevakororo vaAroni vakaunza ngazi kwaari, naye wakanyika chinwe chake mungazi, wakaidzodza padera penyanga dzearita, wakadurura ngazi imweni ngepashi pearita.

¹⁰ Asi mafuta, itsvo, nemafuta ari padera pechiropa omudiro wokushaisha, wakazvipisha padera pearita, kudai ngokuronza kwaMambo Mwari kunaMosi.

¹¹ Nyama nedoo wakazvipisha ngomuriro kubanze kwekamba.

¹² Zvino wakauraya mudiro wokupisha. Vakororo vaAroni vakaunza ngazi kwaari, yaakafafaza paarita kuritendenedza.

¹³ Vakaunza kwaari mudiro wokupisha, pamwepo nezvigurwa zvawo, nesoro, naye wakazvipisha paarita.

¹⁴ Wakasuka maura nemadondova, wakazvipisha padera pomudiro wokupisha paarita.

¹⁵ Wakaunza mudiro wevanhu. Wakatora mbudzi, yaiya yomudiro wokushaisha kwevanhu, wakaiuraya, wakaipira kuita mudiro wokushaisha, kudai ngeyokutanga.

¹⁶ Wakaunza mudiro wokupisha, akaupira kudai ngomuitiro wacho.

¹⁷ Wakaunza mudiro wezviyo wakanokora tsimba yawo, wakaupisha padera pearita, ngepabanze pomudiro wokupisha wemangwanani.

¹⁸ Naye wakauraya mukono negondohwe kuita mudiro wokuiyana, waiya wevanhu. Vakororo vaAroni vakamuunzira ngazi, yaakafafaza paarita kuritendenedza,

¹⁹ nemafuta omukono neegondohwe, nomuswe wakapamhama, nemafuta anofukidza maura, netsvo, nemafuta ari padera pechiropa.

²⁰ Navo vakaisa mafuta padera pechifuba, wakapisha mafuta padera pearita.

²¹ Aroni wakazunguza chifuba nechityu chokumudyo kuita mudiro wokuzunguzwa pamberi paMambo Mwari, kudai ngezvaakapanga Mosi.

²² Aroni wakatambanudzira nyara yake kunevanhu, akavafumisa, wakadzaka pashi apo aiya apira mudiro wokushaisha, nomudiro wokupisha, nemidiro yokuiyana.

²³ Mosi naAroni vakapotera mutende romushongano, vakabuda, vakafumisa vanhu; nouthende hwaMambo Mwari hwakaoneka kuvanhu veshe.

²⁴ Kwakabuda muriro kubva pamberi paMambo Mwari, wakapedza kupisha mudiro wokupisha nemafuta, zvaiya paarita; uwo wakaoneka ngevanhu veshe, vakadaidzira, vakawa pashi ngehope dzavo.