Revhi 8 - Bhaibheri Rakachena muChindau

Kudzodzwa kwaAroni neVakororo vake

¹ Mambo Mwari wakaereketa kunaMosi echiti,

² “Tora Aroni nevakororo vake, nezvokufuka, nemafuta okudzodza, nomukono wokuita mudiro wokushaisha, nemagondohwe mairi, nechitundu chezvingwa zvisina mumera;

³ uunganidze mbungano yeshe pamwepo pamusiwo wetende romushongano.”

⁴ NaMosi wakaita kudai ngezvaakapangwa ndiMambo Mwari. Naapo mbungano yakaunganidzwa pamwepo pamusiwo wetende romushongano,

⁵ Mosi wakati kunembungano, “Ichi ndicho chiro chaakapanga Mambo Mwari kuti chiitwe.”

⁶ Zvino Mosi wakaunza Aroni nevakororo vake, wakavashambidza ngemvura.

⁷ Naye wakamupfekesa bhachi, wakamupfekesa bhande, wakamusimidza ngegauni, wakaisa efodhi padera pake, wakamusungira bhande rakanemeswa riri reefodhi, wakarisungira kwaari.

⁸ Wakaisa chokungwarira diti; nepechokungwarira diti wakaisa Urimu neThumimu.

⁹ Naye wakaisa ngundu pasoro rake; nepangundu ngemberi kwehope yake, wakaisa dzungudza romukore, dzungudza rakachena, kudai ngezvaakapanga Mambo Mwari kunaMosi.

¹⁰ Zvino Mosi wakatora mafuta okudzodza, wakadzodza tende romushongano nazvo zveshe zvaiya mukati mwaro wakazvichenesa.

¹¹ Naye wakafafaza ndio paarita kanomwe, wakadzodza arita nezvidziyo zvaro zveshe, zveshe nebhavhu nechigadzikiro charo, kuti zvicheneswe.

¹² Naye wakadururira amweni emafuta okudzodza padera pesoro raAroni, wakamudzodza, kuti amuchenese.

¹³ NaMosi wakaunza vakororo vaAroni, wakavapfekesa mabhachi, wakavasungira mabhande, wakasunga ngundu pamasoro avo, kudai ngezvaakapanga Mambo Mwari kunaMosi.

¹⁴ Wakaunza pamberi mukono kuita mudiro wokushaisha; Aroni nevakororo vake vakaisa nyara dzavo padera pesoro romukono womudiro wokushaisha.

¹⁵ Mosi wakauraya mukono; wakatora ngazi yawo, akaidzodza padera penyanga dzearita ngechinwe chake kuritendenedza, wakachenesa arita, akadururira ngazi pashi pearita, wakarichenesa, kuti aite kuiyanisa padera paro.

¹⁶ Mosi wakatora mafuta eshe aiya mumaura, nemafuta aiya padera pechiropa, netsvo mbiri, nemafuta adzo, naMosi wakazvipisha padera pearita.

¹⁷ Asi mukono pachawo, doo rawo, nyama yawo nemadisa awo, wakazvipisha ngomuriro kubanze kwekamba, kudai ngezvaakapanga Mambo Mwari kunaMosi.

¹⁸ Zvino wakaunza gondohwe romudiro wokupisha. Aroni nevakororo vake vakaisa nyara dzavo padera pesoro raro,

¹⁹ naro rakaurairwa. Mosi wakafafazira arita ngengazi kuritendenedza.

²⁰ Wakatema gondohwe kuita zvigurwa, naMosi wakapisha soro nezvigurwa nemafuta.

²¹ Ngesure kwokusuka maura nemadondova ngemvura, Mosi wakapisha gondohwe reshe paarita; naro rakaita mudiro wokupisha kuita gwema rakanaka, mudiro unoitwa ngomuriro kunaMambo Mwari, kudai ngezvaakapanga Mambo Mwari kunaMosi.

²² Zvino wakaunza pamberi gondohwe rimweni, gondohwe rokudzodzwa. Aroni nevakororo vake vakaisa nyara dzavo padera pesoro regondohwe,

²³ naro rakauraiwa. Mosi wakatora ngazi yaro, wakaiisa kumagumo enzee yokumudyo yaAroni, nokugunwe renyara yake yokumudyo, nepadera pechikunwe chake chikuru chetsoka chokumudyo.

²⁴ Ngesure kwokuunzwa pamberi kwevakororo vaAroni, Mosi wakatora imweni yengazi, akaiisa kumagumo kwenzee dzavo dzokumudyo, nepadera pemakunwe enyara dzavo dzokumudyo nepadera pemakunwe makuru etsoka dzavo dzokumudyo, naMosi wakafafaza ngazi paarita kuritendenedza.

²⁵ Wakatora mafuta, nomuswe wakapamhama, nemafuta eshe akatendenedza maura, nemafuta aiya padera pechiropa, netsvo mbiri, nemafuta adzo, nechityu chokumudyo.

²⁶ Nokubva muchitundu chezvingwa zvisina mumera, zvaiya pamberi paMambo Mwari, wakatora khekhe rimwe risina mumera, nekhekhe rimwe rechingwa chine mafuta, nekakhekhe kadodoko, wakazviisa padera pemafuta, nepadera pechityu chokumudyo.

²⁷ Wakaisa zveshe munyara dzaAroni, nomunyara dzevakororo vake, naye wakazvizunguza kuita mudiro wakazunguzwa pamberi paMambo Mwari.

²⁸ Zvino Mosi wakazvitora kubva panyara dzavo, wakazvipisha paarita kuita mudiro wokupisha. Izvi zvaiya mudiro wokudzodzwa kuita gwema rakanaka, mudiro unoitwa ngomuriro kunaMambo Mwari.

²⁹ Mosi wakatora chifuba, wakachizunguza kuti chiite mudiro wokuzunguzwa pamberi paMambo Mwari, ngokuti gondohwe romudiro wokudzodzwa raiya chikoaniswa chaMosi, kudai ngezvaakapanga Mambo Mwari kunaMosi.

³⁰ Zvino Mosi wakatora amweni emafuta okudzodza, nengazi yaiya paarita, wakazvifafazira padera paAroni, nepadera pezvokufuka zvake, nepadera pevakororo vake, nepadera pezvokufuka zvevakororo vake; ndizvo wakachenesa Aroni, nezvokufuka zvake, nevakororo vake, nezvokufuka zvevakororo vake.

³¹ NaMosi wakati kunaAroni nokuvakororo vake, “Bikai nyama pamusiwo wetende romushongano, muidye apo pamwepo nechingwa chiri muchitundu chomudiro wokudzodzwa, kudai ngezvendakapanga ndechiti, ‘Aroni nevakororo vake vanozozvidya.’

³² Neizvo zvinozosara zvenyama nezvezvingwa munozozvipisha ngomuriro.

³³ Nemwi amuzobudi kubva kumusiwo wetende romushongano metsa kupere mazuva manomwe, metsa mazuva okudzodzwa kwenyu apera, ngokuti zvinotora mazuva manomwe kumudzodza.

³⁴ Kudai ngeizvi zvaitwa nyamashi ndizvo Mambo Mwari wapanga kuti zviitwe, kuita kuripirwa kwenyu.

³⁵ Ndizvo munozogara pamusiwo wetende romushongano mazuva manomwe masikati nousiku, mungwarire kupanga kwaMambo Mwari kuti musafa; ngokuti ndakapangwa kudaro kwomuri.”

³⁶ Ndizvo Aroni nevakororo vake vakaita zveshe zvaakaronza Mambo Mwari kubudikidza ndiMosi.