Revhi 7 - Bhaibheri Rakachena muChindau

Midiro yoKuhwirinzira Kuripa Zvishaishi

¹ “Ngokudaro ndicho chiemeso chomudiro wokupauka: uri wakachenesesa.

² Pandau inourairwa mudiro ndipozve panozourairwa mudiro wokupauka; nengazi yawo unozoifafaza kutendenedza arita.

³ Unozopira mafuta awo eshe; muswe wakapamhama, mafuta anofukidzira maura,

⁴ netsvo mbiri, nemafuta adzo, ari pachigaratsvo, nemafuta ari padera pechiropa, anozotorwa pamwepo netsvo.

⁵ Mupristi unozozvipisha padera pearita kuita mudiro unoitwa ngomuriro kunaMambo Mwari; uri mudiro wokupauka.

⁶ Vamuna veshe pakati pevapristi vanozoudya; unozodyirwa mundau yakachena; uri wakachenesesa.

⁷ “Mudiro wokupauka wakadai ngomudiro wokushaisha, ngokuti chironzo chazvo ndichimwecho; mupristi unoita muripo ngowake.

⁸ Ndizvozve mupristi unopira mudiro wokupisha unozotora doo romudiro wokupisha waakapira.

⁹ Nemidiro yeshe yezviyo yakabikwa pachoto, neyakabikwa muhari, neyakakangwa muruwenda, inozoita yomupristi wakaipira.

¹⁰ Asi midiro yeshe imweni yezviyo yakavhenganidzwa nemafuta, nokuti yakaoma, inozoita yevakororo veshe vaAroni, umwe ngoumwe vanozoedzanisirana.

Midiro yoKuiyana

¹¹ “Ichi ndicho chironzo chomudiro wokuiyana, waanozopira kunaMambo Mwari.

¹² Kudai echizoupira kuti uite mudiro wokubonga, unozoupira pamwepo nomudiro wokuiyana, zvingwa zvisina mumera zvakakanywa nemafuta, nezvimakhekhe zvakadzodzwa mafuta, nezvingwa zvoufu hwakamotseka zvakakanywa nemafuta.

¹³ Nomudiro wake wokubonga wokuiyana unozounza mudiro wake nezvingwa zvisina mumera.

¹⁴ Kubva kuneizvi unozopira khekhe rimwe kumudiro umwe kuita chipo kunaMambo Mwari, nawo unozoita womupristi uwo unofafaza ngazi yomudiro wokuiyana.

¹⁵ Nenyama yakapirwa yemidiro yake yokubonga neyokuiyana, ngaidyiwe ngeiro zuva reyakapirwa ndiro, asazoisiya metsa mangwanani.

¹⁶ Asi kudai uri mudiro wemhiko, wokupira ngomwoyo unoda, ngaudyiwe ngeiro zuva rowakapirwa ndiro mudiro wake, zve nechimangwani icho chakasara chinozodyiwa.

¹⁷ Asi nyama inozosara yomudiro metsa zuva rechitatu ngaipishwe ngomuriro.

¹⁸ Asi kudai nyama kunyazwi ngeiri yakapirwa yemidiro yake yokuiyana yechizodyiwa ngezuva rechitatu, aizoashiriki, zve, akuzoerengwi kunouwo wakaipira; asi chinozoita chinyangadzo, nomunhu unozodya kweiri unozotwara kushaisha kwake.

¹⁹ “Nyama inogwama chiro chisikazi kusukika isazodyiwa; inozopishwa ngomuriro. Asi ngendaa yenyama imweni, veshe vakasukika vanozoidya.

²⁰ Asi avo vasikazi kusukika vechizodya nyama yakapirwa kuita mudiro wokuiyana kunaMambo Mwari, uwo munhu unozogurwa kubva pakati pehama dzake.

²¹ Naapo umwe wenyu unozogwama chiro chisikazi kusukika, kudai ngokusikasukiki kwomunhu, nokuti ngeiri mhuka isikazi kusukika, nokuti ngechiri chiro chinonyangadza chisikazi kusukika, oroodya nyama yemidiro yokuiyana iyo yakaemera Mambo Mwari, uwo munhu unozogurwa kubva pakati pehama dzake.”

²² Mambo Mwari wakaereketa kunaMosi echiti,

²³ “Ereketa kunevanhu vaIsuraeri wechiti, ‘Musazodya mafuta nokuti ngaari, en'ombe nokuti egwai neembudzi.

²⁴ Mafuta ezvifuyo zvakadzifira, nemafuta eidzo dzakarumwa ngezvikara, angashandiswa kumishando imweni yeshe, asi musazoadya.

²⁵ Kudai umwe wenyu kunyazwi ndiani echizodya mafuta emhuka kunyazwi ngeiri, dzaanopira munhu kuita mudiro unoitwa ngomuriro kunaMambo Mwari, uwo munhu unozogurwa kubva pakati pehama dzake.

²⁶ Musazodya ngazi kunyazwi ngeiri, yeshiri, nokuti yemhuka, nokuti ngepari pomunogara.

²⁷ Kunyazwi ngouri wenyu unozodya ngazi nokuti ngeiri, uwo munhu unozogurwa kubva pakati pehama dzake.’ ”

²⁸ Mambo Mwari wakaereketa kunaMosi echiti,

²⁹ “Ereketa kunevanhu vaIsuraeri wechiti, ‘Uwo unopira midiro yake yokuiyana kunaMambo Mwari unozounza mudiro wake kunaMambo Mwari wezvinopirwa kuita midiro yokuiyana.

³⁰ Ngenyara dzake unozounza midiro inoitwa ngomuriro yaMambo Mwari; mafuta pamwepo nechifuba unozozviunza kuti chifuba chizunguzirwe kuita mudiro wokuzunguzira pamberi paMambo Mwari.

³¹ Mupristi unozopisha mafuta padera pearita, asi chifuba chinozoita chaAroni nevakororo vake.

³² Nechityu chokumudyo munozochipa kuita mudiro wokumirudzwa wezvinopirwa kuita midiro yokuiyana.

³³ Umwe pakati pevakororo vaAroni, unozopira ngazi yemidiro yokuiyana nemafuta, ndiye unozotora chityu chokumudyo kuita chikoaniswa chake.

³⁴ Ngokuti ndakatora kubva kuvanhu vaIsuraeri chifuba chokuzunguzira, nechizva chokumirudza kubva kwezvinopirwa zvemidiro yavo yokuiyana, neni ndakazvipa kunaAroni mupristi nevakororo vake ngechiemeso chemhera nariini kubva pakati pevana vaIsuraeri.’ ”

³⁵ Ichi ndicho chikoaniswa chokudzodzwa chaAroni, nechokudzodzwa kwevakororo vake, kubva kumidiro inoitwa ngomuriro kunaMambo Mwari.

³⁶ Izvi zvaakapanga Mambo Mwari kuti zvipuwe kwavari ngevaIsuraeri, ngeiro zuva raakavadzodza, ngechiemeso chemhera nariini kumibarirwana yavo yeshe.

³⁷ Ichi ndicho chironzo chomudiro wokupisha, wezviyo, wokushaisha, wokupauka, wokudzodzwa nemidiro yokuiyana.

³⁸ Icho chaakapanga Mambo Mwari kunaMosi paMutunhu weSinai, apo akapanga vanhu vaIsuraeri kuti vaunze midiro yavo kunaMambo Mwari, mushango reSinai.