Revhi 6 - Bhaibheri Rakachena muChindau

¹ NaMambo Mwari wakaereketa kunaMosi echiti,

² “Kudai umwe wenyu echishaisha, nokuita chishaishi chokupauka kubva kunaMambo Mwari, echinyepa kunomuakirwana wake ngendaa yeicho chakapuwa kwaari kuti achingwarire, nokuti ngendaa yechibatiso, nokuti ngendaa yokupamba, nokuti ngokuchengedza muakirwana wake,

³ nokudai echizoona chiro chakarashika, echinyepa ngendaa yacho, kudai echipika ngokunyepa ngendaa yeizvi zveshe zviro zvaanoita munhu echishaisha ndizvo,

⁴ naapo washaisha nokuzia kuti unendaa, nokuhwirinzira chaakapamba, nokuti chaakatora ngokuchengedzera, nokuti icho chiro chakapuwa kwaari kuti achingwarire, nokuti chakarashika chaakaona,

⁵ nokuti chaakapika ngokunyepa ndicho, eya, achipetudze, nokututsira chechishanu padera pacho, azvipe kunouwo uri muridzi wazvo.

⁶ Unozounza mudiro wokupauka kwake kunaMambo Mwari, kunomupristi, mudiro wechishaishi chake, gondohwe romutanga, risina kuremara, kudai ngokuedzanisa kwake, kuti uite mudiro wokushaisha.

⁷ Mupristi unozoita muripo pamberi paMambo Mwari naye unozorekererwa kunyazwi ngechiri chaakaita chokupauka ndicho.”

Midiro yoKupisha Zveshe

⁸ Mambo Mwari wakaereketa kunaMosi echiti,

⁹ “Panga Aroni nevakororo vake wechiti, ‘Ichi ndicho chironzo chomudiro wokupisha. Mudiro wokupisha, ngokuti unopishwa padera pearita usiku hweshe metsa kuedze, nomuriro wearita unozogara wechibaka kweriri.

¹⁰ Mupristi unozopfeka chokusimira chake chorukangaza, nokusimira bhuruku rake rorukangaza, naye unozodusa marota okupishwa kwomudiro paarita, aaise parutii rwearita.

¹¹ Naye unozokhumura zvokusimira zvake, echipfeka zvimweni, nokudusa marota nokuarasha kubanze kwekamba, kundau yakanaka.

¹² Nomuriro uri paarita unozogara wechibaka kweriri; usazodzimwa. Mupristi unozotutsira huni padera paro mangwanani eshe, nokuronga mudiro wokupisha padera paro; naye unozopishapo mudiro wemafuta wokunyarara.

¹³ Muriro unogara wechibaka padera pearita; usatongozodzimwa.’

Midiro yeZviyo

¹⁴ “Neichi ndicho chironzo chomudiro wezviyo: vakororo vaAroni vanozoupira pamberi paMambo Mwari paarita.

¹⁵ Vanozonokora tsimba youfu hwomudiro wezviyo, nemafuta ahwo, nemakha ari padera pomudiro wezviyo, unozohupisha padera pearita kuita gwema rakanaka, kuita chicherechedziso chahwo, kunaMambo Mwari.

¹⁶ Nouhwo hunosara hunozodyiwa ndiAroni nevakororo vake; nahwo hunodyiwa husina mumera, mundau yakachena; muruwanze rwetende romushongano vanozohudya.

¹⁷ Husazobikwa nomumera. Ndakahupa kwavari kuita chikoaniswa chavo chemidiro yangu inoitwa ngomuriro; iri yakachenesesa, kudai ngomudiro wokushaisha nokudai ngomudiro wokupauka.

¹⁸ Veshe vevamuna pakati pemibarirwana yaAroni vanozohudya. Chinozoita chiemeso chemhera nariini kumibarirwana yenyu ngendaa yemidiro yaMambo Mwari inoitwa ngomuriro; veshe vanoigwama vanoita vakacheneswa.”

¹⁹ Mambo Mwari wakaereketa kunaMosi echiti,

²⁰ “Uyu ndiwo mudiro waAroni nevakororo vake, wevanozopira kunaMambo Mwari ngeiro zuva raanozodzodzwa; khirogramu rimwe roufu hwakamotseka kuita mudiro wezviyo wezuva rimwe ngarimwe, norupande rwahwo mangwanani, norupande rwahwo madeekoni.

²¹ Hunozobikwa muhari nemafuta; unozohuunza hwakakumanidzwa yaamho nezvigurwa zvomudiro wezviyo hwakabikwa, unozozvipira kuti zviite gwema rakanaka kunaMambo Mwari.

²² Ndizvo mupristi wakadzodzwa kubva pakati pemibarirwana yaAroni unozomuteera ndiye unozounasirira; chinozoita chiemeso chemhera nariini kunaMambo Mwari; unozopishwa weshe.

²³ Mudiro weshe wezviyo womupristi unozopishwa weshe; auzodyiwi.”

Midiro yeZvishaishi

²⁴ Mambo Mwari wakaereketa kunaMosi echiti,

²⁵ “Ereketa kunaAroni nevakororo vake wechiti, ‘Ichi ndicho chironzo chomudiro wokushaisha: Mudiro wokushaisha unozourairwa pamberi paMambo Mwari pandau apo panourairwa mudiro wokupisha; uri wakachenesesa.

²⁶ Mupristi unozoupira ngendaa yokushaisha unozoudya; unozodyirwa kundau yakachenesesa, muruwanze rwetende romushongano.

²⁷ Kunyazwi ndiani unozoigwama iyi nyama unozoita wakacheneswa; naapo ngazi yawo yechifafazwa pajira nokuti ngeriri, unozogeza ndau inemadonhwe mundau yakachena.

²⁸ Chidziyo chedongo cheyakabikwa ndicho chinozoputswa, asi kudai yechizobikwa muhari yethusi, ngarinase kukwizhwa, nokusukisiswa ngemvura.

²⁹ Veshe vamuna vevapristi ngavaidye; iri yakachenesesa.

³⁰ Akuna mudiro wokushaisha unozodyiwa uwo ngazi yawo yakaunzwa mutende romushongano, kuti iripe mundau yakachena; unozopishwa ngomuriro.’