Revhi 5 - Bhaibheri Rakachena muChindau

Ndaa Dzinoda Midiro yoKushaisha

¹ “Kudai munhu echishaisha ngokuti aadi kupupura apo azwa ndaa inoda kuti apupure ngechiro chaakaona nokuti chaakazwa, unozotwara ndaa yake.

² Nokuti kudai umwe wenyu echibata chiro chakasvipiswa, kunyazwi muiri wemhuka yakasvipiswa nokuti muiri wechifuyo chakasvipiswa, nokuti muiri wechiro chinotamanda chakasvipiswa, nokudai chakafishika kubva kwaari; unozoita usikazi kusukika, unozoa nendaa.

³ Nokuti kudai echibata kusikasukika kwomunhu, kunyazwi ngokuri kusikasukika kwakadini, ukwo kwaanosvipiswa ndikwo munhu, nokudai chakafishika kwaari, apo azochizia unozoa nendaa.

⁴ Nokuti kudai umwe wenyu echipika, echiereketa kuita zvakashata ngomuromo wake, nokuti kuita zvakanaka, kunyazwi chiinyi chaanoereketa munhu ngokupika, nacho chechifishika kwaari, apo azochizia unozoa nendaa.

⁵ Naapo pounozia kuti unendaa yechimwe cheizvi, unozotenda chishaishi icho chaakaita.

⁶ Unozounza kunaMambo Mwari mudiro wokupauka kwake, wechishaishi chake chaakashaisha, thukazi regwai nokuti rembudzi kuti riite mudiro wokushaisha kwake; nomupristi unozoita muripo ngendaa yechishaishi chake.

⁷ “Asi kudai asikakoni kuunza gwai, unozounza kunaMambo Mwari ngendaa yechishaishi chake chaakashaisha magora mairi, nokuti njia mbiri, imwe yomudiro wechishaishi, neimwenizve yomudiro wokupisha.

⁸ Unozozviunza kunomupristi, iye unozopira kutanga kuita mudiro wokushaisha, ashongorore soro rayo kubva pamutsipa wayo, asi asazoiadza.

⁹ Unozofafaza ngazi yomudiro wokushaisha parutii rwearita; nengazi imweni inozodururwa pashi pearita; uri mudiro wokushaisha.

¹⁰ Unozopira yechipiri kuita mudiro wokupisha, kudai ngomuitiro wacho. Ndizvo mupristi unozoita muripo ngendaa yechishaishi chake chaakashaisha, naye unozorekererwa.

¹¹ “Asi kudai asikakoni kuunza magora mairi nokuti njia mbiri, unozounza mudiro wekhirogramu rimwe roufu hwakamotseka kuita mudiro wokushaisha. Asazodururira mafuta kwouri, zve, asazoisa makha kwouri, ngokuti mudiro wokushaisha.

¹² Unozohuunza kumupristi, nomupristi unozonokora tsimba kubva kwohuri, kuita chicherechedziso chahwo, ahupishe padera pearita, kudai ngemiitiro yokupira midiro inoitwa ngomuriro kunaMambo Mwari; mudiro wokushaisha.

¹³ Ndizvo mupristi unozoita muripo wechishaishi chake chaakashaisha kunoumwe weizvi, naye unozorekererwa. Kudai ngomudiro wezviyo uhwo hunosara hunozoita hwomupristi.”

Kuripwa kweMidiro

¹⁴ NaMambo Mwari wakaereketa kunaMosi echiti,

¹⁵ “Naapo umwe wenyu echizoita chishaishi chokupauka, echishaisha ngokusikazia kuneizvo zvakachena zvaMambo Mwari; naapo unozounza kunaMambo Mwari kuita mudiro wechishaishi chokupauka kwake, gondohwe risina kuremara kubva mumitanga, zvinoshandurwa kuita zvigurwa zvesirivha, kudai ngechipimo chinoshandiswa mundau yakachena, kuita mudiro wechishaishi chokupauka.

¹⁶ Unozoripa kushata kwaakaita ngendaa yeicho chiro chakacheneswa, unozotutsira rupande rwechishanu, unozozvipa kunomupristi. Unozoita muripo ngendaa yechishaishi chake, naye unozorekererwa.

¹⁷ “Kudai umwe wenyu echizoshaisha asikazii echiita nokuti ngechiri cheizvi zviro zvakapangwa ngezvironzo zvaMambo Mwari kuti zvisazoitwa; waanendaa, naye unotwara kushata kwake.

¹⁸ Unozounza kunomupristi gondohwe risina kuremara kubva mumitanga, nokuti zvakaedzana kuita mudiro wechishaishi chokupauka; nomupristi ngokudaro unozoita muripo ngendaa yokusikazia kwake kwaakapauka asikazi kuzia, naye unozorekererwa.

¹⁹ Uyu mudiro wokushaisha; ngegwinyiso wakashaisha ngokupauka pamberi paMambo Mwari.”