Revhi 4 - Bhaibheri Rakachena muChindau

Mudiro weZvishaishi Zvinoitwa ngoMunhu Asikadi

¹ Mambo Mwari wakaereketa kunaMosi echiti,

² “Ereketa kunevanhu vaIsuraeri wechiti, ‘Naapo munhu echishaisha ngokusada ngokugura chironzo kunyazwi ngechiri chaMambo Mwari, ngeicho chiro chisaisisa kuitwa, echipauka kubva kuchironzo kunyazwi ngechiri.’

³ “Kudai mupristi wakadzodzwa echishaisha, ndizvo akaisa vanhu mundaa, naapo ngaaunze kunaMambo Mwari mukono usina kuremara ngendaa yokushaisha kwake kwaakashaisha kuti aite mudiro wokushaisha.

⁴ Unozounza mukono uwo pamusiwo wetende romushongano pamberi paMambo Mwari; unozoisa nyara yake padera pesoro rawo, auuraire pamberi paMambo Mwari.

⁵ Mupristi wakadzodzwa unozotora rupande rwengazi nokuriunza kutende romushongano.

⁶ Mupristi unozonyika chinwe chake mungazi afafazire ndiyo kanomwe pamberi paMambo Mwari, pamberi pejira rendau yakachena.

⁷ Mupristi unozodzodza imweni ngazi panyanga dzearita rokupishira mutombo unegwema rakanaka pamberi paMambo Mwari, riri mutende romushongano; naye unozodurura ngazi yeshe yomukono pashi pearita romudiro wokupisha, riri pamusiwo wetende romushongano.

⁸ Unozodusa mafuta eshe kubva kumukono womudiro wokushaisha: mafuta eshe akafukidza maura nemafuta eshe akatendenedza maura;

⁹ itsvo mbiri nemafuta adzo ari pachigaratsvo; nemafuta ari padera pechiropa, awo aanozodusa pamwepo netsvo,

¹⁰ kudai ngeizvo zvakaduswa kubva kun'ombe yomudiro wokuiyana. Mupristi unozozvitora kuti azvipishe padera pearita romudiro wokupisha.

¹¹ Asi doo romukono, nenyama yeshe yawo, pamwepo nesoro rawo, nemadondova awo, nemaura awo, nemadisa awo,

¹² mukono weshe unozobudiswa kubanze kwekamba kundau yakanaka, apo paanodururwa marota unozoupishira padera pehuni; padera peduthu remarota inozopishwa.

¹³ “Kudai mbungano yeshe yaIsuraeri yechishaisha ngokusikazia, neicho chiro chakafishika kubva mukuona kwembungano yeshe, vakaita chiro chimwe chokugura mupango kunyazwi ngouri waMambo Mwari, icho chisaisisa kuti chiitwe, navo vane ndaa;

¹⁴ naapo chishaishi chevakaita chaziikanwa, mbungano yeshe inozopira mudiro womukono mutsva kuti uite mudiro wokushaisha, nokuunza pamberi petende romushongano.

¹⁵ Vakuru vembungano vanozoisa nyara dzavo padera pesoro romukono pamberi paMambo Mwari, nomukono uwo unozourawa pamberi paMambo Mwari.

¹⁶ Mupristi wakadzodzwa unozounza ngazi imweni yomukono kutende romushongano,

¹⁷ nomupristi unozonyika chinwe chake mukati mwengazi, naye unozofafaza ndiyo kanomwe pamberi paMambo Mwari, pamberi pejira rendau yakachena.

¹⁸ Unozodzodza imweni ngazi panyanga dzearita riri pamberi paMambo Mwari mutende romushongano, unozodurura ngazi imweni yeshe pashi pearita remidiro yokupisha, riri pamusiwo wetende romushongano.

¹⁹ Naye unozodusa mafuta awo eshe, nokuapisha padera pearita.

²⁰ Unozoitazve kumukono uwo kudai ngezvaakaita kunomukono womudiro wokushaisha; nomupristi ngokudaro unozoita muripo ngepamusoro pavo, nakwo kunozorekererwa kwavari.

²¹ Naye unozobudisa mukono uwo kubanze kwekamba, nokuupisha kudai ngezvaakapisha mukono wokutanga; uri mudiro wokushaisha wembungano yeshe.

²² “Naapo mutongi echishaisha ngokusikazia, ngokugura mupango kunyazwi ngouri waMambo Mwari, Mwari wake, icho chisaisisa kuitwa, naye unendaa,

²³ naapo chishaishi chake chaakashaisha chaziikanwa kwaari, unozounza chigotokoto chisina kuremara kuita mudiro wake.

²⁴ Naye unozoisa nyara yake padera pesoro racho, achiuraye apo panourairwa midiro yokupisha pamberi paMambo Mwari; uri mudiro wokushaisha.

²⁵ Mupristi unozotora imweni ngazi yomudiro wokushaisha ngechinwe chake, nokuidzodza panyanga dzearita remidiro yokupisha, unozodurura ngazi imweni yeshe pashi pearita romudiro wokupisha.

²⁶ Naye unozopisha mafuta acho eshe padera pearita, kudai ngemafuta omudiro wokuiyana; ngokudaro mupristi unozoita muripo ngendaa yechishaishi chake, nacho chinozorekererwa kwaari.

²⁷ “Kudai umwe wevanhu nhando echishaisha ngokusikazia, ngokugura mupango kunyazwi ngouri waMambo Mwari, chisaisisa kuitwa, naye unendaa,

²⁸ naapo chishaishi chake chaakashaisha chaziikanwa kwaari, unozounza mudiro wake wethukazi rechimbudzi risina kuremara, ngendaa yechishaishi chake chaakashaisha.

²⁹ Unozoisa nyara yake padera pesoro romudiro wokushaisha, unozouraya uwo mudiro wokushaisha pandau yemidiro yokupisha.

³⁰ Mupristi unozotora imweni ngazi yawo ngechinwe chake, unozoidzodza panyanga dzearita rokupisha midiro, unozodurura ngazi yayo yeshe pashi pearita.

³¹ Naye unozodusa mafuta ayo eshe, kudai ngemafuta anoduswa kubva kumudiro wokunyarara; nomupristi unozoapishira padera pearita kuita gwema rakanaka kunaMambo Mwari; ngokudaro mupristi unozoita muripo ngendaa yake, nakwo kunozorekererwa kwaari.

³² “Kudai echiunza gwai kuti riite mudiro wokushaisha, ngaaunze thukazi risina kuremara.

³³ Unozoisa nyara yake padera pesoro romudiro wokushaisha, nokuriuraya kuti riite mudiro wokushaisha pandau panourairwa midiro yokupisha.

³⁴ Mupristi unozotora imweni ngazi ngechinwe chake yomudiro wokushaisha, nokuidzodza panyanga dzearita remidiro yokushaisha, naye unozodururira ngazi yeshe pashi pearita.

³⁵ Unozotora mafuta aro eshe, kudai ngemafuta egwai anotorwa kubva kumudiro wokuiyana, nomupristi unozoapisha padera pearita, kudai ngezvinoitwa kumidiro yomuriro kunaMambo Mwari. Ndizvo mupristi unozoita muripo ngendaa yechishaishi chake chaakashaisha, nacho chinozorekererwa kwaari.