Revhi 3 - Bhaibheri Rakachena muChindau

Mudiro woKuiyana

¹ “Kudai mudiro uri mudiro wokuiyana, kudai wechipira mhuka kubva kumutanga wezvifuyo, kunyazwi uri mukono nokuti tukazi, unozoupira pamberi paMambo Mwari isina kuremara.

² Unozoisa nyara yake padera pesoro romudiro, uiuraye pamusiwo wetende romushongano; nevakororo vaAroni vapristi vanozofafazira ngazi paarita kuritendenedza.

³ Unozopira kubva kumudiro wokuiyana kudai ngomudiro unoitwa ngomuriro kunaMambo Mwari; mafuta awo anofukidzira maura, nemafuta eshe akatendenedza maura.

⁴ Itsvo mbiri nemafuta adzo akadziputira ari pasinde pechigaratsvo, nemafuta ari padera pechiropa, awo anozotorwa pamwepo netsvo.

⁵ Zvino vakororo vaAroni vanozozvipisha padera pearita, ngepadera pomudiro wokupisha, uri padera pehuni dzomuriro, kudai ngomudiro unoitwa ngomuriro wegwema rakanaka kunaMambo Mwari.

⁶ “Kudai mudiro wake wokuita mudiro wokuiyana kunaMambo Mwari wechibva kumakwai nembudzi, ngauite mukono nokuti thukazi, unozopira iyo isina kuremara.

⁷ Kudai echipa hwai kuita mudiro wake, unozoiunza pamberi paMambo Mwari.

⁸ Unozoisa nyara yake padera pomudiro wake. Inozouraiwa pamberi petende romushongano, nevakororo vaAroni vanozofafazira ngazi yayo paarita kuritendenedza.

⁹ Unozopira mudiro wokuiyana unoitwa ngomuriro kunaMambo Mwari; mafuta aro nomuswe waro wakapamhama weshe ugure ngepasinde pegodo romushana waro, nemafuta eshe ari kumaura;

¹⁰ itsvo mbiri, nemafuta adzo, ari ngepadera pechiropa, awo ounozodusa pamwepo netsvo.

¹¹ Zvino mupristi unozozvipisha padera pearita, kudai ngomudiro wokudya wakaitwa ngomuriro kunaMambo Mwari.

¹² “Kudai mudiro wake uri wembudzi, unozoiunza pamberi paMambo Mwari.

¹³ Unozoisa nyara yake padera pesoro rayo, nokuiuraira pamberi petende romushongano; nevakororo vaAroni vanozofafazira ngazi yayo paarita kuritendenedza.

¹⁴ Unozopa kuita mudiro wake unoitwa ngomuriro kunaMambo Mwari; mafuta akafukidza maura, nemafuta eshe akatendenedza maura.

¹⁵ Itsvo mbiri, nemafuta adzo, ari padera pechiropa anozotorwa pamwepo netsvo.

¹⁶ Zvino mupristi unozozvipisha padera pearita, kudai ngomudiro wokudya unoitwa ngomuriro, kuita gwema rakanaka. Mafuta eshe ayo ngaaMambo Mwari.

¹⁷ “Chinozoita chiemeso chinoitwa mhera nariini kunemibarirwana yenyu kundau dzeshe dzokugara: Musazodya mafuta nokuti ngazi.”