Revhi 26 - Bhaibheri Rakachena muChindau

Zvifumiso zvoKupurutana

¹ “Musazodziitira miedzaniso nokuti muedzaniso wakatsetswa, zve, musazodziemesera muedzaniso wakaema, zve, musazodziemesera nokuti ngouri muedzaniso webuwe munyika yenyu, kuti mugwadamire kweriri; ngokuti inini ndini Mambo Mwari, Mwari wenyu.

² Munozongwarira maSabatha angu, nokuremeredza ndau yangu yakachena; inini ndini Mambo Mwari.

³ “Kudai mwechizohamba muzviemeso zvangu, nokungwarira mipango yangu, nokuiita,

⁴ ndinozomupa mvura ngenguva yayo, neminda inozowanzira zviyo zvayo, nemiti yomuminda inozobereka michero yayo.

⁵ Kupura kwenyu kunozoguma kunguva yokukaya mavhini, nomukuwo wokukaya mavhini unozoguma kumukuwo wokurima; nemwi munozodya zvokudya zvenyu mwechiguta, nokugara munyika yenyu mwechigarisika.

⁶ Ndinozomupa kunyarara munyika, munozoata pashi, pasina unomutyisidzira; ndinozodzinga zvikara zvakashata kubva munyika, neshoti aizoparuri nyika yenyu.

⁷ Munozorumbirira magaa enyu, anozourawa pamberi penyu ngeshoti.

⁸ Vashanu venyu vanozorumbirira zana, nezana renyu rinozorumbirira gumi remakumi emazana (10,000); nemagaa enyu anozourawa pamberi penyu ngeshoti.

⁹ Ndinozomuringira ngokumuda, ndinozoita kuti mubereke, muwande, ndigwinyise chitenderano changu nemwi.

¹⁰ Munozodya zvomusharu, nokubudisa musharu kuisa zvitsva.

¹¹ Ndinozoemesa tende rangu romushongano pakati penyu, nomweya wangu auzomushoori.

¹² Ndinozohamba pakati penyu ndiite Mwari wenyu, muite vanhu vangu.

¹³ Inini ndini Mambo Mwari, Mwari wenyu, uwo wakamubudisa kubva kunyika yeEgipite, kuti musaizwe hloko ndivo; ndakagura zvisungo zvejoka renyu, ndikaita kuti muhambe ngokururama.

Kuororwa ngendaa yoKusapurutana

¹⁴ “Asi kudai musikazopurutani kwendiri, musikaiti mipango iyi yeshe,

¹⁵ nokudai mwechizoshoora zviemeso zvangu, nokuti kudai mweya yenyu yechizoshoora zvitongero zvangu, musikazoiti mipango yangu yeshe, asi mwechigura chitenderano changu,

¹⁶ ininiwo ndinozoita izvi kwomuri: ndinozoemesa kuti zviuye padera penyu kutyiswa, norufuba, nomutsarara inozopedza madziso enyu, nokudzerera kwomwoyo. Munozokusha mbeu dzenyu nhando ngokuti magaa enyu anozodzidya.

¹⁷ Ndinozoemesa hope yangu kurwa nemwi, munozourawa pamberi pemagaa enyu; avo vanomunyenya ndivo vanozotonga padera penyu, nemwi munozotiza pasina unomurumbirira.

¹⁸ Nokudai musikazondipurutani ngendaa yeizvi, naapo ndinozomuorora kanomwe ngendaa yezvishaishi zvenyu.

¹⁹ Ndinozogura kudzikudza kwesimba renyu, ndikaita denga renyu ridai ngesimbi, nenyika yenyu kuti idai ngethusi.

²⁰ Simba renyu rinozopera nhando; ngokuti nyika yenyu aizobereki michero yayo, zve, nemiti yenyika aizobereki michero yayo.

²¹ “Kudai mwechizohamba kutsvatsvana neni, musikandipurutani, ndinozomuunzira madambudziko akahwirinzirwa kanomwe kudai ngezvishaishi zvenyu.

²² Ndinozotuma zvikara zvomushango pakati penyu, zvinozomutorera vana venyu, zvechiuraya n'ombe dzenyu, zvechiita kuti mushomanike. Nemapato enyu anozoita matongo.

²³ “Kudai musikazopangwi ndini ngeizvi, asi mwechihamba mwechitsvatsvana neni,

²⁴ ndizvo ndinozotsvatsvana nemwi, nokumuorora kanomwe ngendaa yezvishaishi zvenyu.

²⁵ Ndinozomuunzira shoti inozounzidzira kupauka kwokubva muchitenderano changu; naapo munozoungana pamwepo mumadhorobha enyu, ndinozotuma denda pakati penyu; munozopirwa munyara dzemagaa enyu.

²⁶ Naapo ndinozogura mudondoro wechingwa chenyu, vakadzi gumi vanozobika chingwa chenyu pachoto chimwecho, navo vanozomupa chingwa ngokupima; munozodya musikaguti.

²⁷ “Asi kudai ngeizvi zveshe musikazondipurutani, asi mwechihamba ngokutsvatsvana neni,

²⁸ ndinozotsvatsvanazve nemwi ngoushungu; ndinozomurova kanomwe kakahwirinzirwa ngendaa yezvishaishi zvenyu.

²⁹ Nemwi munozodya miiri yevakororo venyu, nemiiri yevanasikana venyu munozoidya.

³⁰ Neni ndinozoparadza ndau dzenyu dzakakwirira, ndiputsire pashi miedzaniso yenyu, ndikandire miiri yenyu yakafa padera pemiiri yemiedzaniso yenyu; nomweya wangu unozomushoora.

³¹ Ndinozoita kuti madhorobha enyu aite matongo, ndiunze ndau dzenyu dzakachena kuti dziite matongo; andizozwi gwema remitombo yenyu inegwema rakanaka.

³² Ndinozoparadza nyika kuti iite mafusi; nemagaa enyu anogara kweiri anozoshamiswa ndiyo.

³³ Ndinozomuparadzira pakati pemadzinza, ndinozomushwamurira shoti padera penyu; nenyika inozoita mafusi, nemadhorobha enyu anozoita matongo.

³⁴ “Zvino nyika inozodakara ngemaSabatha ayo, mukuwo weshe weinogara yakaita mafusi, muri munyika yemagaa enyu; naapo nyika inozozorora, idakare ngemaSabatha ayo.

³⁵ Nguva dzeshe dzeinogara yakaita mafusi inozozorora; ngokuti aizi kuzorora ngemaSabatha enyu apo mwaigara kweiri.

³⁶ Nokwavari vanosara vachapona venyu ndinozotuma kudemera mumwoyo mwaavo vari munyika dzemagaa avo. Vanozotiza ngebope remashakani rinovhuvhuta; vanozotiza kudai ngevanotiza kubva kuneshoti; navo vanozowa kunyazwi vasikazi kurumbirirwa.

³⁷ Vanozowa umwe padera poumweni, kudai ngevanotiza shoti, vasikazi kurumbirirwa. Amuzoa nesimba rokuema pamberi pemagaa enyu.

³⁸ Munozopera pakati pemadzinza, nenyika yemagaa enyu inozomupedza.

³⁹ Naavo vanosara venyu vanozodzeerera mukushata kwavo vari munyika dzemagaa enyu; ngokushata kwemadzibaba avo vanozodzeerera pamwepo navo.

⁴⁰ “Asi kudai vechizotenda kushaisha kwavo nokwemadzibaba avo, pamwepo nokupauka kwevakapauka ndikwo kwendiri, nokuhambazve ngokutsvatsvana kwavo neni,

⁴¹ ndizvo inini ndakatsvatsvana navo, ndakavaunza munyika yemagaa avo; kudai mwoyo yavo isikazi kuchekwa yechipfaiswa, navo varipa muripo wokushaisha kwavo.

⁴² zvino ndinozokarakadza chitenderano changu naJakobe, Isaka, naAbrahama; ndinozokarakadza nyika.

⁴³ Ngokuti nyika inozosiiwa ndivo, inozodakara ngemaSabatha ayo, apo inogara yechiita mafusi, isinavo; navo vanozoashira kuororwa kwokushaisha kwavo, ngokuti ivo vemene vakashoora zvitongero zvangu, ngokutizve mweya yavo yakanyenyeka zviemeso zvangu.

⁴⁴ Asi zvakanyadaro apo vari munyika yemagaa avo, andizovarashi akadi, andizovanyenyizve, kuti ndivapedze yaamho, nokuti kugura chitenderano changu navo; ngokuti ndini Mambo Mwari, Mwari wavo.

⁴⁵ Asi ngepamusoro pavo ndinozokarakadza chitenderano chemadzibaba avo, avo vendakabudisa kubva kunyika yeEgipite mukuona kwemadzinza, kuti ndiite Mwari wavo; inini ndini Mambo Mwari.”

⁴⁶ Izvi ndizvo zviemeso nezvitongero nezvironzo, zvaakaita Mambo Mwari pakati pake navaIsuraeri paMutunhu weSinai ngenyara yaMosi.