Revhi 25 - Bhaibheri Rakachena muChindau

Gore reChinomwe

¹ Mambo Mwari wakaereketa kunaMosi, ari paMutunhu weSinai echiti,

² “Ereketa kunevanhu vaIsuraeri, wechiti kwavari, ‘Apo mwopinda munyika yendinomupa, naapo nyika inozongwarira Sabatha kunaMambo Mwari.

³ Makore matanhatu munozorima minda yenyu, nemakore matanhatu munozotongora mivhini yenyu, mwechiunganidza michero yayo.

⁴ Asi gore rechinomwe rinozoita Sabatha rokuzorora renyika, riri Sabatha raMambo Mwari; usazorima munda wako, nokuti kutongora mivhini yako.

⁵ Neizvo zviyo zvemakikizeya ako, usazozvikukura, nokuti kukaya mavhini emivhini yako isikazi kutongorwa; ngokuti riri gore rokuzorora kwenyika.

⁶ Neiro Sabatha renyika rinozoita kudya kwako: kwouri iwewe nokwomuranda wako womwamuna nowomukadzi, nokwomuranda wako unobhadharwa, nokwomupara wako unogara newe;

⁷ nokwen'ombe dzako, nokwezvifuyo zviri munyika mwako, kuwanzirwa kweshe kwayo kunozoita kudya kwezviri.’

Gore roKupetudzwa kweZviro

⁸ “Unozoerenga kwouri maSabatha manomwe, nokuerengwa kwemaSabatha manomwe anozoita kwomuri makore makumi marongomuna namapfumbamwe.

⁹ Zvino munozoridza gwama; ngezuva rechigumi romwedzi wechinomwe, ngezuva rokuripirwa, munozoridza gwama mukati mwenyika dzenyu dzeshe.

¹⁰ Munozochenesa gore rechimakumi mashanu, mudaidzire kusunhurika munyika yenyu kuvanhu veshe vayo. Rinozoita jubiri kwomuri; munozohwirira munhu weshe kunhaka yake nomunhu weshe kumhuri yake.

¹¹ Iro gore remakumi mashanu rinozoita jubiri kwomuri; musazorima nokuti kukukura zvemakikizeya, nokuti kukaya mavhini emivhini yenyu isikazi kutongorwa.

¹² Ngokuti riri jubiri; rinozoita rakachena kwomuri; munozodya zvinozobudiswa kubva muminda zvega.

¹³ “Ngegore iri rejubiri munozohwirira munhu weshe umwe ngaumwe kunhaka yake.

¹⁴ Kudai wechitengesa chiro kunyazwi ngechiri kumuakirwana wako, nokuti wechitenga chiro nokunyazwi ngechiri kunyara yomuakirwana wako, musazobirana.

¹⁵ Kudai ngouwandu hwemakore ngesure kwejubiri unozotenga kudaro kunomuakirwana wako, nokudai ngouwandu hwemakore okubereka michero kwomunda unozotengesera kwouri.

¹⁶ Kudai ngouwandu hwemakore unozowandisa mutengo wayo, nokudai ngoushomani hwemakore unozotsonza mutengo wayo; ngokuti kudai ngouwandu hwemakore okubereka michero kwayo iye unozoitengesa kwouri kudaro.

¹⁷ Ndizvo musazobirana; asi munozotya Mwari wenyu; ngokuti inini ndini Mambo Mwari, Mwari wenyu.

Dambudziko reGore reChinomwe

¹⁸ “Ndizvo munozoita zviemeso zvangu, mungwarire zvitongero zvangu ngokugondeka, muzviite; nemwi munozogara munyika mukugarisika.

¹⁹ Nyika inozobereka michero yayo, nemwi munozodya mwechiguta nokugara umwo mukugarisika.

²⁰ Kudai mwechizobvunza, kuti, ‘Tinozodyenyi ngegore rechinomwe? Ringirai, atizorimi nokuti kuunganidza zvinowanzwa zvedu.’

²¹ Naapo ndinozotutsira chidakadziso changu padera penyu ngegore rechitanhatu, nayo inozobereka kudya kunokwana makore matatu.

²² Naapo munozorima ngegore rechisere, mudye kudya kwomusharu metsa gore rechipfumbamwe; metsa zviyo zvayo zviibve munozodya zvomusharu.

Kupetudzwa kweZviro

²³ “Nyika aizotengiswi kunoti nariini, ngokuti nyika ngeyangu; ngokuti imwimwi muri vapara nevahambi kwendiri.

²⁴ Nokunyika dzenyu dzeshe munozotenda kuti nyika iripirwe.

²⁵ “Kunyazwi ndiani wehama yako akaita murombo, orootengesa rupande rwenhaka yake, nokudai umwe wehama dzake echiuya kuiripira, naapo unozoripira iyo yakatengeswa ngehama yake.

²⁶ Kudai uwo munhu asina hama yokuiripira, asi kuti akabudirira naye ngokwake echikona kuiripira,

²⁷ naapo ngaaerenge makore okutengeswa kwayo, nokuhwirinzira zviri padera pokutengeswa kwayo, kwaari wakaitengeserwa, kuti iye ahwirinzirwe nhaka yake.

²⁸ Asi kudai asikakoni kuihwirinzira kwaari, naapo iyi yakatengeswa inozogara munyara youwo wakaitenga metsa gore rejubiri; ngegore rejubiri inozobva kwaari, naye unozohwirinzirwa nhaka yake.

²⁹ “Kudai munhu echizotengesa mhatso mudhorobha rakashosherwa ngorukumbati, unozotenderwa kuiripirazve kusati kwapera gore; kusati kwapera gore yaamho, unozotenderwa kuti airipire.

³⁰ Nokudai kukapera yaamho gore isati yaripirwa, naapo mhatso iri mudhorobha rakashosherwa ngorukumbati inozoita yake uwo wakaitenga kunoti mhera nariini kumibarirwana yake yeshe; aizobvi kwaari ngegore rejubiri.

³¹ Asi mhatso dzemaguta, dzisina rushosha rworukumbati rwakadzitendenedza, dzinozodai ngeminda yenyika; dzingaripirwa, nadzo dzinozobuda ngegore rejubiri.

³² Kudai ngemadhorobha evaRevhi, nemhatso dzemadhorobha enhaka yavo, vaRevhi vangadziripira nokuti ngouri mukuwo.

³³ Kudai munhu echizotenga mhatso kubva kuvaRevhi, naapo mhatso yakatengeswa nedhorobha renhaka yake zvinozobuda kubviswa kwaari ngegore rejubiri; ngokuti mhatso dzemadhorobha evaRevhi dziri nhaka yavo pakati pevanhu vaIsuraeri.

³⁴ Asi minda yenharaunda yavo aizotengiswi; ngokuti inhaka yavo nariini.

Zvikwereti kuVarombo

³⁵ “Kudai hama yako ikaita murombo, yechipera simba iri kwouri, unozomutseya; eya kunyazwi ari mupara, nokuti muhambi, kuti akone kugara newe.

³⁶ Usatora kubva kwaari uyirwa nokuti zvinowanzirwa, asi unozotya Mwari wako; kuti hama yako igare newe.

³⁷ Usazokweretesa mare yako kwaari kuti uzouyirwa nokuti kukweretesa kwaari kudya kwako kuti uzowanzirwa.

³⁸ Inini ndini Mambo Mwari, Mwari wenyu, uwo wakamukwidza kubva kunyika yeEgipite, kuti ndimupe nyika yeKhenani, zve, ndiite Mwari wenyu.

Kusunhurwa kweHloko

³⁹ “Kudai hama yako inogara pasinde pako akaita murombo, echitengeswa kwouri, usazomushandisa kudai ngomuranda wouhloko.

⁴⁰ Asi ngaaite kwouri kudai ngomuranda unothuswa, nokudai ngomuhambi, naye unozokushandira metsa gore rejubiri.

⁴¹ Zvino unozobuda kubva kwouri, iye nevana vake, unozohwirira kunemhuri yake, nokunhaka yemadzibaba ake.

⁴² Ngokuti ava varanda vangu, vendakabudisa kubva kunyika yeEgipite; avazotengeswi kudai ngehloko.

⁴³ Auzomutongi ngenjira yakakonza, asi unozotya Mwari wako.

⁴⁴ Veshe varanda vevamuna nevevakadzi, vounozoa navo vanozoita vevanhu vasikatendi, vakamutendenedza; kwavari munozotenga varanda vevamuna nevarandakadzi vouhloko.

⁴⁵ Mungazovatengazve kubva kuvapara vanogara pakati penyu, kumhuri dzavo dziri kwomuri, avo vakabarirwa munyika yenyu; navo vanozoita nhaka yenyu.

⁴⁶ Nemwi munozotora kuita nhaka yevana venyu ngesure kwenyu, kuti vazoita nhaka kwavari. Vanozoita hloko dzenyu metsa kufa, asi musazotonga padera pehama dzenyu vanhu vaIsuraeri ngenjira yakakonza.

⁴⁷ “Kudai chigarandimo nokuti mupara echizofumiswa, nehama yako inogara pasinde pako echizoita murombo echidzitengesa kunomupara nokuti kunechigarandimo chiri kwomuri, nokuti kunomubarirwana wouwo mupara,

⁴⁸ ngesure kwokudzitengesa kwake ungazoripirwazve; umwe wehama dzake ungazomuripira.

⁴⁹ Ungaripirwa ndisekuru ake, nokuti ngomukororo wasekuru ake, nokuti kunyazwi ndiani uri wehama yake, wemhuri yake; nokuti kudai iye emene echikona, ungadziripira.

⁵⁰ Naye unozoerengerana nouwo wakamutenga kubvira ngegore raakadzitengesa ndiro kwaari, metsa kuguma kugore rejubiri; nomutengo wokutengeswa kwake unozoedzaniswa ngouwandu hwemakore ake, kudai ngomukuwo wakaemeserwa munhu wakatorwa kuti abhadharwe kunozoita kudaro kwaari.

⁵¹ Kudai akapedza makore akawanda ngaaedzanise mare yokuripirwa kwake kudai ngouwandu hwemakore awo kubva kumare yaakatengwa ndiyo.

⁵² Kudai kwechisara makore mashomani metsa kuguma kugore rejubiri, naapo unozoerengerana naye echihwirinzira kwaari mare yokuripirwa kwake, kudai ngouwandu hwemakore ake.

⁵³ Naye unozogara kwouri kudai ngomuranda unobhadharwa ngegore; noumweni asazomutonga ngenjira yakakonza mukuona kwako.

⁵⁴ Nokudai asikazi kuripirwa ngenjira idzi, unozobuda ngegore rejubiri, iye nevana vake.

⁵⁵ Ngokuti vanhu vaIsuraeri varanda vangu, varanda vangu vendakabudisa kubva kunyika yeEgipite; inini ndini Mambo Mwari, Mwari wenyu.