Revhi 24 - Bhaibheri Rakachena muChindau

Kungwarirwa kweZvibani

¹ Mambo Mwari wakaereketa kunaMosi echiti,

² “Panga vanhu vaIsuraeri kuti vaunze kwouri mafuta akaera akanasa kuengwa omuorivhi, okuisa muzvibani kuti zvibani zvigare zvechindobaka.

³ Aroni unozozvinasira ngokubanze kwejira rendau yakachena kuzvijekisa kubvira madeekoni metsa kuedza kwezuva pamberi paMambo Mwari ngokuangirira; ichi chinozoita chiemeso chemhera nariini kwomuri kumibarirwana yenyu.

⁴ Unozonasirira zvibani zviri zvigadzikiro zvezvibani zvomukore wakaperera pamberi paMambo Mwari ngokuangirira.

Chingwa Chinopirwa kunaMwari

⁵ “Unozotora ufu hwakamotseka, ubike zvingwa zviri gumi nazviiri ndihwo; nechingwa chimwe chinozoa nekhirogramu rimwe roufu.

⁶ Newe unozozvironga kuita misara miiri, zvitanhatu mumusara umwe ngoumwe, padera petafura romukore wakaperera pamberi paMambo Mwari.

⁷ Unozoisa mafuta emakha akanaka padera pomusara umwe ngoumwe, kuita chikarakadziso chomudiro wezvingwa, kudai ngomudiro unoitwa ngomuriro kunaMambo Mwari.

⁸ Sabatha ngeSabatha unozozvironga pamberi paMambo Mwari ngokuangirira, zvinopirwa ngepamsoro pevanhu vaIsuraeri kuita chitenderano chemhera nariini.

⁹ Nazvo zvinozoita zvaAroni nezvevakororo vake; vanozozvidyira mundau yakachena, ngokuti zviri zvakachenesesa kwaari, zvemidiro yaMambo Mwari inoitwa ngomuriro, ngechiemeso chemhera nariini.”

Muedzaniso woKururama noKuororwa Kwakanaka

¹⁰ Mukororo womukadzi wevaIsuraeri, uwo baba ake waiya muEgipite, wakabuda kuenda pakati pevanhu vaIsuraeri, nomukororo womukadzi wevaIsuraeri noumweni wevaIsuraeri vakatanga kuambana mukamba.

¹¹ Nouyu mukororo womukadzi wevaIsuraeri wakashoora zina raMambo Mwari, wakatuka; navo vakamuunza kunaMosi; (zvino zina ramai ake raiya Sheromithi, mwanasikana waDhibhiri, wedzinza raDhani.)

¹² Navo vakamukonyera metsa chiri kuda kwaMambo Mwari chipangidzirwe kwavari.

¹³ Mambo Mwari wakaereketa kunaMosi echiti,

¹⁴ “Mubudise kubanze kwekamba uwo wakatuka; naavo veshe vakamuzwa echituka ngavaise nyara dzavo padera pesoro rake, nembungano yeshe ngaimuponde ngemapuwe.

¹⁵ Newe unozoereketa kunevanhu vaIsuraeri wechiti, ‘Uwo unozotuka Mwari wake unozotwara chishaishi chake.

¹⁶ Nouwo unozotuka zina raMambo Mwari ngegwinyiso unozourawa, nembungano yeshe ngegwinyiso inozomuponda ngemapuwe. Uwo uri mupara, kudai ndiye unobarwa munyika, apo echizotuka zina raMambo Mwari, unozopondwa ngemapuwe.

¹⁷ Kunyazwi ndiani unozouraya munhu, ngegwinyiso unozourawa.

¹⁸ Kunyazwi ndiani unozouraya chifuyo unozochiripira, chifuyo ngechifuyo.

¹⁹ Kunyazwi ndiani unozokuvadza muakirwana wake, kudai ngeicho chaaita kwaari, chinozoitwazve kunouwo:

²⁰ Kuguka ngendaa yokuguka, dziso ngendaa yedziso, zino ngendaa yezino; kudai ngokukuvadza kwaaita munhu, ngokudaro ngakuitwewo kwaari.

²¹ Nouwo unozouraya chifuyo, ngaachiripe; asi uwo unozouraya munhu naye unozourawa.

²² Munozoa nechironzo chimwecho kwaari mupara nokuti wenyika yenyu; inini ndini Mambo Mwari, Mwari wenyu.’ ”

²³ Mosi wakaereketa kunavanhu vaIsuraeri kuti vamubudise kubva mukamba uwo wakatuka, nokumuponda ngemapuwe. Vanhu vaIsuraeri vakaita kudai ngezvaakapanga Mambo Mwari kunaMosi.