Revhi 23 - Bhaibheri Rakachena muChindau

Madhiri eMidiro

¹ Mambo Mwari wakaereketa kunaMosi echiti,

² “Ereketa kunavanhu vaIsuraeri, wechiti kwavari, ‘Aya ndiwo madhiri akaemeswa aMambo Mwari omunozodaidzira kuti mishongano yakachena, ndiwo madhiri angu akaemeswa.’

Sabatha, Phasika neChingwa Chisina Mumera

³ “Mazuva matanhatu munozoshanda; asi zuva rechinomwe iSabatha rokuzorora yaamho, mushongano wakachena; ngeiro zuva musazoita mushando nokuti ngouri; riri Sabatha kunaMambo Mwari muugaro hwenyu hweshe.

⁴ “Aya ndiwo madhiri akaemeswa aMambo Mwari, mishongano yangu yakachena, omunozopemberera ngenguva yawo.

⁵ Ngomwedzi wokutanga, ngezuva regumi namarongomuna rawo madeekoni iPhasika raMambo Mwari.

⁶ Ngezuva regumi namashanu romwedziwo iDhiri reChingwa chisina Mumera kunaMambo Mwari; mazuva manomwe munozodya chingwa chisina mumera.

⁷ Ngezuva rokutanga munozoa nomushongano wakachena; musazoshanda mushando ngeiro zuva.

⁸ Asi munozopira mudiro kunaMambo Mwari unoitwa ngomuriro kupedza mazuva manomwe; ngezuva rechinomwe unozoapo mushongano wakachena; musazoshanda mushando ngeiro zuva.”

⁹ Mambo Mwari wakaereketa kunaMosi echiti,

¹⁰ “Ereketa kunevanhu vaIsuraeri, wechiti kwavari, ‘Apo mwazoguma kunyika yendinozomupa, mwechizokukura zviyo zvayo, munozounza kunomupristi mwanda wemichero wokutanga wezviyo zvenyu.

¹¹ Unozozunguza mwanda uwo pamberi paMambo Mwari, kuti muashirike; nechimangwani ngesure kweSabatha mupristi unozouzunguza.

¹² Nemwi munozopira gondohwe rinegore rimwe risina kuremara, ngeiro zuva raanozozunguza ndiro mwanda, kuti riite mudiro wokupisha kunaMambo Mwari.

¹³ Nomudiro wezviyo unozoita makhirogramu mairi oufu hwakakumanidzwa namafuta, kuita mudiro unoitwa ngomuriro kunaMambo Mwari, wegwema rakanaka; nomudiro wokumwa unozoita ritha rimwe revhini.

¹⁴ Musazodya chingwa nokuti koroni yakakochwa, nokuti mushosho, risati raguma zuva romunozounza ndiro mudiro kunaMwari wenyu. Chinozoita chiemeso chemhera nariini kumibarirwana yenyu muugaro hwenyu hweshe.’

Dhiri roKukukura

¹⁵ “Munozoerenga kwomuri kubvira ngezuva rinoteera reSabatha, kubvira kuzuva remwakaunza mwanda, womudiro wokuzunguzwa, metsa maSabatha manomwe apere.

¹⁶ Eya, kuzuva rinoteera ngesure kweiro Sabatha rechinomwe, munozoerenga naro kuita mazuva makumi mashanu; munozopira mudiro wezviyo zvitsva kunaMambo Mwari.

¹⁷ Munozounza kubva kuugaro hwenyu zvingwa zviiri zvokuzunguzira zvinemakhirogramu mairi oufu hwakamotseka; zvinozobikwa nomumera, zviri michero yomutanguro kunaMambo Mwari.

¹⁸ Munozopira pamwepo nezvingwa, magondohwe manomwe asina kuremara egore rimwe, nomukono umwe mutsva, nemagondohwe mairi kuita mudiro wokupisha kunaMambo Mwari, pamwepo nemidiro yayo yezviyo neyokumwa, mudiro unoitwa ngomuriro, wegwema rakanaka kunaMambo Mwari.

¹⁹ Munozopirawo mubairo wechipongo kuita mudiro wokushaisha, nemagondohwe mairi anegore rimwe kuita mubairo womudiro wokuiyana.

²⁰ Mupristi unozozvizunguza pamwepo nezvingwa zvemichero yokutanga, kuita mudiro wokuzunguza pamberi paMambo Mwari, nemagondohwe mairi: zvinozoita zvakachena kunaMambo Mwari, zviri zvevapristi.

²¹ Naapo munozodaidzira zuva ririro kuti riite zuva romushongano wakachena kwomuri; ngeiro zuva musazoshanda mushando. Chinozoita chiemeso chemhera nariini kwomuri muugaro hwenyu, kumibarirwana yenyu.

²² “Naapo mwokukura zviyo zveminda yenyu, musazokukura kupedzera yaamho makhona eminda yenyu, zve, musazonongeredza zviyo zveminda yenyu; munozozvisiira varombo nevapara; inini ndini Mambo Mwari, Mwari wenyu.”

Dhiri reGore Idzva

²³ Mambo Mwari wakaereketa kunaMosi echiti,

²⁴ “Ereketa kunevanhu vaIsuraeri wechiti, ‘Ngomwedzi wechinomwe, ngezuva rokutanga romwedzi munozoa nezuva rokuzorora, riri chikarakadziso chokuridza magwama, mushongano wakachena.

²⁵ Ngeiro zuva musazoshanda mushando; asi munozopira mudiro unoitwa ngomuriro kunaMambo Mwari.’ ”

Zuva roKuripirwa

²⁶ Mambo Mwari wakaereketa kunaMosi echiti,

²⁷ “Zvino, ngezuva regumi romwedzi uyu wechinomwe, rinozoita zuva rokuripirwa; rinozoita romushongano wakachena kwomuri; nemwi munozotambudza mweya yenyu, nokupira mudiro unoitwa ngomuriro kunaMambo Mwari;

²⁸ nemwi musazoita mushando nokuti ngouri ngeiro zuva; ngokuti riri zuva rokuripirwa, rokuita muripo ngepamsoro penyu pamberi paMambo Mwari, Mwari wenyu.

²⁹ Kunyazwi ngouri munhu usikazodzitambudzi ngeiro zuva, unozogurwa kubva pakati pevanhu vake.

³⁰ Kunyazwi ngouri munhu unozoshanda mushando ngeiro zuva, uwo munhu ndinozomugura kubva pakati pevanhu vake.

³¹ Musazoita mushando; chinozoita chiemeso chemhera nariini kumibarirwana yenyu yeshe muugaro hwenyu hweshe.

³² Rinozoita Sabatha rokuzorora kwomuri, munozotambudza mweya yenyu; ngezuva rechipfumbamwe romwedzi ngenguva yemadeekoni, kubvira madeekoni kuguma madeekoni amweni, munozongwarira Sabatha renyu.”

Dhiri reMichacha

³³ Mambo Mwari wakaereketa kunaMosi echiti,

³⁴ “Ereketa kunavanhu vaIsuraeri wechiti, ‘Ngezuva regumi namashanu rouyu mwedzi wechinomwe unozoita mushongano wokudya wemichacha kunaMambo Mwari kupedza mazuva manomwe.

³⁵ Zuva rokutanga rinozoita mushongano wakachena; amuzoiti mishando yenyu ngeiro zuva.

³⁶ Munozopira mudiro unoitwa ngomuriro kunaMambo Mwari metsa kupere mazuva manomwe; ngezuva rechisere munozoita mushongano wakachena; munozopira mudiro unoitwa ngomuriro kunaMambo Mwari; uri mushongano wakachena; musazoita mushando ngeiro zuva.’

³⁷ “Iyi ndiyo mishongano yokudya yaMambo Mwari, yomunozodaidza kuti mishongano yakachena, kuti mupire mudiro unoitwa ngomuriro kunaMambo Mwari: mudiro wokupisha, nomudiro wezviyo, nomubairo, nemidiro yokumwa, umwe ngaumwe mudiro ngezuva rawo,

³⁸ ngepabanze pemaSabatha aMambo Mwari, nangepabanze pezvipo zvenyu, nangepabanze pemhiko dzenyu, nangepabanze pemidiro yenyu yomunopira ngokuda, zvomunopira kunaMambo Mwari.

³⁹ “Zvino, ngezuva regumi namashanu romwedzi wechinomwe apo mwapedza kuunganidza zveshe zvomuminda yenyu, munozongwarira mushongano wokudya kunaMambo Mwari metsa kupere mazuva manomwe; zuva rokutanga rinozoita zuva reSabatha, nezuva rechisere rinozoita Sabatha.

⁴⁰ Ngezuva rokutanga munozodzitorera matai emiti yakanaka emibvumo, nematai emiti yakavhivha, neemiti yemishambangwena, nemwi munozodakara pamberi paMambo Mwari, Mwari wenyu mazuva manomwe.

⁴¹ Munozoungwarira ngokuita mushongano wokudya kunaMambo Mwari mazuva manomwe mukati mwegore. Chinozoita chiemeso chemhera nariini kumibarirwana yenyu; munozoungwarira ngomwedzi wechinomwe.

⁴² Munozogara mumichacha mazuva manomwe; veshe vari vaIsuraeri ngokubarwa vanozogara mumichacha,

⁴³ kuti mibarirwana yenyu izie kuti ndakaita kuti vanhu vaIsuraeri vagare mumichacha, apo ndakavabudisa kubva munyika yeEgipite; inini ndini Mambo Mwari, Mwari wenyu.”

⁴⁴ Ndizvo Mosi wakaronzera vanhu vaIsuraeri ngemishongano yaMambo Mwari yakaemeswa.