Revhi 22 - Bhaibheri Rakachena muChindau

Kucheneswa kweZvipo

¹ Mambo Mwari wakaereketa kunaMosi echiti,

² “Ereketa kuna Aroni nevakororo vake, kuti vadziparadzanise kubva kunezvakachena zvevanhu vaIsuraeri, zve, kuti vasazotsverudza zina rangu rakachena ngeizvo zvevanopira kwendiri; inini ndini Mambo Mwari.

³ Ronza kwavari, ‘Kunyazwi ndiani worudzi rwenyu pakati pemibarirwana yenyu, unokwedzera kunezvipo zvakachena, izvo zvevanopira vanhu vaIsuraeri kunaMambo Mwari, apo ari muchiemo chokusvipiswa kwake, uwo munhu unozogurwa kubva mukuona kwangu; inini ndini Mambo Mwari.

⁴ Akuna noumwe worudzi rwaAroni unemapere nokuti unomubvidza unozodya zvezvipo zvakachena, metsa asukika. Kunyazwi ndiani unozogwama nokuti ngechiri chakasvipiswa ngomuiri wakafa, kunyazwi ngomunhu unoduruka mbeu youhwamuna,

⁵ zve, kunyazwi ndiani unozogwama chiro chinogwezva, chingaita kuti asvipiswe, nokuti munhu ungaita kuti asvipiswe, kunyazwi ngokuri kusvipiswa kwaanakwo,

⁶ munhuwo unozogwama zvakadai unozoita wakasvipiswa metsa madeekoni, asazodya zvipo zvakachena, ngepabanze pokuti ashambe muiri wake ngemvura.

⁷ Naapo zuva rapota, unozoita wakasukika; ngesure kweizvo unozodya zvipo zvakachena, ngokuti kuri kudya kwake.

⁸ Icho chakafa chega, nokuti icho chakabaurwa ngezvikara, asazodzisvipisa ngokuzvidya; inini ndini Mambo Mwari.

⁹ Ndizvo vanozongwarira zviemeso zvangu, kuti vasazotwara ndaa yokushaisha ndizvo, vechifira mukati mwendau yakachena ngendaa yokuisvipisa; inini ndini Mambo Mwari uwo unovachenesa.’

¹⁰ “Akuna munhu usiri wemhuri yevapristi unozodya zvipo zvakachena. Akuna mupfumba womupristi, nokuti mushandi unozodya zvipo zvakachena.

¹¹ Asi kudai mupristi echitenga munhu ngemare yake, unozozvidya; nouwo wakabarwa mumhatso yake, avo vanozodya kudya kwake.

¹² Zve, kudai mwanasikana womupristi echiroorwa ngomupara, aazodyi zvezvipo zvakachena.

¹³ Asi kudai mwanasikana womupristi ari shirikadzi, nokuti wakarambana nomwamuna wake, asina mwana, oroopetuka kumhatso yababa ake, kudai ngepaumhandara hwake, ungadya kudya kwababa ake. Asi akuna usiri mupristi unozokudya.

¹⁴ Kudai munhu echizodya chipo chakachena ngokusikazia, naapo unozotutsira rupande rwechishanu kwechiri, unozopa mupristi pamwepo neicho chakachena.

¹⁵ Navo vasazonyenyeredza zvipo zvakachena zvevanhu vaIsuraeri, izvo zvevanozopira kunaMambo Mwari,

¹⁶ ngokuvatendera kuti vatware kushaisha kwokupauka, apo vanozodya zvipo zvavo zvakachena; ngokuti inini ndiri Mambo Mwari uwo unovachenesa.”

¹⁷ Mambo Mwari wakaereketa kunaMosi echiti,

¹⁸ “Ereketa kuna Aroni nokuvakororo vake, nokwavari veshe vanhu vaIsuraeri, wechiti kwavari, ‘Kunyazwi ndiani munhu wemhatso yaIsuraeri, nokuti wevapara vanogara muIsuraeri, unozopira mudiro wake kuripira mhiko dzake, nokuti yemidiro yaanopira ngokuda kwake, yaanozopira kunaMambo Mwari kuita mudiro wokupisha,

¹⁹ kuti zviashirike kubva kwomuri, nemwi munozopira mikono isina kuremara, yen'ombe, nokuti yemakwai, nokuti yembudzi.

²⁰ Musazopira chiro cheshe chakaremara, ngokuti achizoashiriki kubva kwomuri.’

²¹ “Kunyazwi ndiani unozopira mibairo yemidiro yokuiyana, kuti aripire mhiko dzake, nokuti kuita midiro yokupira ngokuda kwake yemikono, nokuti yemakwai, inozoita yakaperera kuti iashirwe; akuzoapo chakaremara.

²² Amuzopiri kunaMambo Mwari iri bofu, nokuti yakaguka murenje, nokuti yakaremara, nokuti inemota, nokuti inegwembe, nokuti inechikurukuta, zve, musazopira dzakadaro kunaMambo Mwari, kuti dziite mudiro unoitwa ngomuriro paarita kunaMambo Mwari.

²³ N'ombe nokuti hwai inechiro chinembarikidzwa, nokuti chiro chinotamika kweiri, iyo mungapira kuita mudiro ngokuda; asi wokuripira mhiko auzoashirwi wakadaro.

²⁴ Amuzopiri kunaMambo Mwari yakakwengwa, nokuti yakakuvadzwa, nokuti kubvajurwa, nokuti yakachekwa; zve, musazodzipira kuita mubairo nokuti ngouri munyika yenyu.

²⁵ Zve, musazoashira yakadai kubva munyara yomupara kupira kuita kudya kunaMambo Mwari; ngokuti kushata kwayo kuri kweiri, nokuremara kwayo kuri kweiri, isazoashirwa kwomuri.”

²⁶ Mambo Mwari wakaereketa kunaMosi echiti,

²⁷ “Kudai kwechibarwa n'ombe, nokuti hwai, nokuti mbudzi, inozogara namai mazuva manomwe; nokubvira ngezuva rechisere nokuenda mberi inozoashirika kuti iite mudiro unoitwa ngomuriro kunaMambo Mwari.

²⁸ Asi kunyazwi iri tsiru nokuti hwai inobereka, musazouraya mai nomwana pamwepo ngezuva rimwe.

²⁹ Naapo munozopira kunaMambo Mwari mubairo wokubonga, munozopira kuti uashirike kubva kwomuri.

³⁰ Ngezuva ndiro ndiro munozoudya; musazosiya nachimwe chawo metsa mangwani; inini ndini Mambo Mwari.

³¹ Ndizvo munozongwarira mipango yangu, nokuiita; inini ndini Mambo Mwari.

³² Musazotsverudza zina rangu rakachena; asi ndinozoita wakacheneswa pakati pevanhu vaIsuraeri; inini ndini Mambo Mwari uwo unomuchenesa.

³³ Inini ndini ndakamubudisa kubva kunyika yeEgipite, kuti ndiite Mwari wenyu; inini ndini Mambo Mwari.”