Revhi 21 - Bhaibheri Rakachena muChindau

Kucheneswa kweVapristi

¹ Mambo Mwari wakati kunaMosi, “Ereketa kunavapristi vakororo vaAroni, wechiti kwavari, ‘Asazoapo noumwe unozodzisvipisa ngendaa yevanhu vakafa pakati pevanhu vake,

² kwega ngendaa yeavo vari hama dzake, ukwo kunoti, mai ake, baba ake, mukororo wake, mwanasikana wake, mukoma wake

³ nokuti hanzvadzi yake, iyo ichimhandara, iri hama yake, uwo waiya asati aanomwamuna; ngepamsoro pouwo ungadzisvipisa.

⁴ Asi asazodzisvipisa pachake kudai ngemwamuna uri pakati pevanhu vake, kuti adzitsverudze pachake.

⁵ Vasazodzipara mabaraara musoro, nokuti kupara makhona endebvu dzavo, nokuti kucheka nyora mumuiri yavo.

⁶ Vanozoita vakachena kunaMwari wavo, vasazotsverudza zina raMwari wavo; ngokuti ndivo vanopira midiro yaMambo Mwari, inoitwa ngomuriro, nokudyazve kwaMwari; ndizvo vanozoita vakachena.

⁷ Vasazoroora mukadzi uri chifebi, nokuti wakasvipiswa; zve, vasazoroora mukadzi wakarambana nomwamuna wake, ngokuti mupristi uri wakachena kunaMwari wake.

⁸ Ndizvo munozovabata kudai ngevakacheneswa, ngokuti ndivo vanopira kudya kwaMwari wenyu; vanozoita vakachena kwomuri, ngokuti inini Mambo Mwari, uwo unomuchenesa, ndiri wakachena.

⁹ Naapo mwanasikana womupristi kunyazwi ngouri, kudai echizotsverudza ngokuita chifebi, unotsverudza baba ake; unozopishwa ngomuriro.’

¹⁰ “Nouwo uri mupristi mukuru pakati pevakoma vake, wakadzodzwa pasoro rake ngemafuta akachena, wakaemeswa kuti asimire zvokusimira zvakacheneswa, iye asazofukura soro rake, nokuti kubaura zvokusimira zvake.

¹¹ Zve, asazopotera kunomuiri wakafa kunyazwi ngowenyi, nokuti kudzisvipisa ngepamusoro pababa ake nokuti mai ake.

¹² Zve, asazobuda kubva kundau yakachena, nokuti kusvipisa ndau yakachena yaMwari wake; ngokuti dzungudza remafuta okudzodza raMwari wake riri padera pake: inini ndini Mambo Mwari.

¹³ Unozoroora mukadzi uchiri mhandara.

¹⁴ Shirikadzi, nokuti mukadzi wakarambana nomwamuna wake, nokuti uwo wakasvipiswa, nokuti chifebi, ava vakadai asazoroora. Unozotora mhandara yorudzi rwevanhu vake kuita mukadzi,

¹⁵ kuti asazotsverudza rudzi rwevanhu vake; ngokuti inini ndini Mambo Mwari uwo unomuchenesa.”

¹⁶ Mambo Mwari wakaereketa kunaMosi echiti,

¹⁷ “Ereketa kunaAroni wechiti, ‘Kunyazwi ndiani uri worudzi rwako, mumibarirwana yavo, uwo uri wakaremara, asazokwedzera kupira kudya kwaMwari wake.

¹⁸ Ngokuti uwo wakaremara, kunyazwi ngouri, asazokwedzera: uwo uri bofu, nokuti unokumhina, nokuti unemiro yakapofoka, nokuti unembarikidzwa nokuti ngepari,

¹⁹ nokuti munhu unetsoka yakaguka, nokuti unenyara yakaguka,

²⁰ nokuti unenunda, nokuti chimwandionandaapari, nokuti unechonjoro redziso, nokuti gwembe, nokuti unemachende akaremara.

²¹ Akuna munhu worudzi rwaAroni, mupristi uri wakaremara unozokwedzera kupira midiro yaMambo Mwari inoitwa ngomuriro; uri wakaremara; aazokwedzeri kuti apire kudya kwaMwari wake.

²² Unozodya kudya kwaMwari wake, kweshe ukwo kwakachenesesa noukwo kwakachena.

²³ Asi kwega asazopinda mukati mwendau yejira rakachena, nokuti kukwedzera kuarita, ngokuti uri wakaremara, kuti asazosvipisa ndau dzangu dzakachena; ngokuti ndini Mambo Mwari unovachenesa.’ ”

²⁴ Ndizvo Mosi wakazvironzera kunaAroni nevakororo vake, nokunevanhu vaIsuraeri veshe.