Revhi 20 - Bhaibheri Rakachena muChindau

Kujeziswa ngoKusikapurutana

¹ Mambo Mwari wakaereketa kunaMosi echiti,

² “Ereketa kunevanhu vaIsuraeri wechiti, ‘Kunyazwi ndiani wevanhu vaIsuraeri, nokuti wevapara, unogara muIsuraeri, kudai echizopira nokuti ndiani worudzi rwake kuti apotye muriro kunaMorekhi, ngegwinyiso unozourawa; vanhu vaIsuraeri vanozomuponda ngemapuwe.

³ Inini pachangu ndinozoemesa hope yangu kubva kunouwo munhu, ndimugure kubva pakati pevanhu vake; ngokuti wakapa worudzi rwake kuti apotye muriro kunaMorekhi, kusvipisa ndau yangu yakachena, nokutsverudza zina rangu rakachena.

⁴ Nokudai vanhu venyika vechizotswatira madziso avo kubva kunomunhuwo, apo anopa worudzi rwake kupotya mumuriro kunaMorekhi, vasikamuurayi,

⁵ inini pachangu ndinozoemesa hope yangu kubva kunouwo munhu, nemhuri yake, ndimugure kubva kunevanhu vake, naavo veshe vanoita umhombo kumuteera, kuti vaite umhombo naMorekhi.’

⁶ “Nouwo munhu unokunukuka kuenda kune vanomweya wokufembera nokuman'anga, kuita umhombo kuateera, eya, ndinozoemesa hope yangu kurwa nouwo munhu, ndinozomugura kubva pakati pevanhu vake.

⁷ Ndizvo dzichenesenyi ngokwenyu, muite vakachena; ngokuti inini ndini Mambo Mwari, Mwari wenyu.

⁸ Nemwi munozongwarira zviemeso zvangu, nokuzviita; inini ndini Mambo Mwari uwo unomuchenesa.

⁹ Ngokuti munhu weshe unozotuka baba ake nokuti mai ake ngechakwadi unozourawa; uwo unozotuka baba ake nokuti mai ake, ngazi yake inozoa padera pake.

¹⁰ “Kudai munhu echiomba nomukadzi womuakirwana wake, muombi nanyamuombwa ngegwinyiso vanozourawa.

¹¹ Nomunhu unozoatana nomukadzi wababa ake wakafukura upunu hwababa ake; ngegwinyiso veshe vairi vanozourawa; ngazi yavo inozoa padera pavo.

¹² Nokudai munhu echizoatana nomuzakazi wake, ngegwinyiso veshe vairi vanozourawa; vakapauka; ngazi yavo inozoa padera pavo.

¹³ Zve, kudai munhu wemwamuna echizoatana nomunhu wemwamuna umweni kudai ngezvaanoatana nomukadzi, veshe vairi vakaita chinyangadzo; ngegwinyiso vanozourawa; ngazi yavo inozoa padera pavo.

¹⁴ Kudai munhu echizoroora mukadzi namai ake pamwepo, kuri kushata; vanozopishwa ngomuriro, pamwepo iye navo, kuti kusazoapo kushata pakati penyu.

¹⁵ Kudai munhu echizoatana nemhuka, ngegwinyiso unozourawa; nemwi munozouraya mhuka iyo.

¹⁶ Kudai munhu womukadzi echizokwedzera kunemhuka nokuti ngeiri, nokuatwa ndiyo, ngokudaro unozouraya mukadzi uwo nemhuka; ngegwinyiso zvinozourawa; ngazi yazvo inozoa padera pazvo.

¹⁷ “Kudai munhu echizotora hanzvadzi yake, mwanasikana wababa ake, nokuti mwanasikana wamai ake, nokufukura upunu hwake, naye echiona upunu hwake, chiri chiro chakashata, navo vanozogurwa pamberi pokuona kwevanhu vavo; iye wakafukura upunu hwehanzvadzi yake; unozotwara kushata kwake.

¹⁸ Kudai munhu echizoatana nomukadzi uri kumwedzi wake, iye wafukura upunu hwomubvidza wake, naye wafukura upunu hwomubvidza wake; navo vari vairi vanozogurwa kubva pakati pevanhu vavo.

¹⁹ Usazofukura upunu hwamainini amai ako, nohwaatate ako, ngokuti ngokudaro unofukura upunu hwehama yake; vanozotwara kushata kwavo.

²⁰ Kudai munhu echizoatana nomukadzi wasekuru ake, wafukura upunu hwasekuru ake; vanozotwara kushaisha kwavo; navo vanozofa vasina mwana.

²¹ Kudai munhu echizotora mukadzi womunun'una wake, chiro chakasvipiswa; wafukura upunu hwomunun'una wake; navo vanozogara vasina mwana.

²² “Ndizvo imwimwi munozongwarira zviemeso zvangu zveshe nezvitongero zvangu zveshe, muzviite kuti nyika yendinomuendesa kweiri isazomurutsa.

²³ Musazohamba ngemiitiro yevanhu venyika, avo vendakadzinga kubva pamberi penyu. Ngokuti avo vakaita zveshe izvi zviro, ndizvo ndakavanyenya.

²⁴ Asi ndakati kwomuri, ‘Munozogara nhaka yenyika yavo, ndinozopa kwomuri kuti iite yenyu, iri nyika inoerera mukaka nouchi.’ Inini ndini Mambo Mwari, Mwari wenyu, uwo wakamuparadzanisa kubva kunevanhu vamweni.

²⁵ Ndizvo munozoita muparadzaniso pakati pemhuka dzakasukika, neidzo dzakasvipiswa, nepakati peshiri dzakasvipiswa, neidzo dzakasukika; nemwi musazodziunzira chinyangadzo pachenyu ngeidzi mhuka, nokuti ngeidzi shiri, nokuti kunyazwi ngeiri mbeu yezviro zvinotamanda munyika, izvo zvendakamuparadzanisira kuti zviri zvakasvipiswa.

²⁶ Munozoita vakachena kwendiri; ngokuti inini Mambo Mwari ndiri wakachena, neni ndakamuparadzanisa kubva pakati pevanhu vamweni, kuti muite vanhu vangu.

²⁷ “Munhu wemwamuna nokuti womukadzi unomweya wokufembera, nokuti n'anga, ngegwinyiso unozourawa; vanozovaponda ngemapuwe; ngazi yavo inozoa padera pavo.”