Revhi 2 - Bhaibheri Rakachena muChindau

Mudiro weZviyo

¹ “Naapo munhu peanozopa mudiro wezviyo kunaMambo Mwari, mudiro wake ngauite woufu hwakamotseka; naye unozodurura mafuta padera pahwo, nokuisa makha padera pahwo,

² naye unozohuunza kunevakororo vaAroni vapristi, nomupristi unozonokora tsimba yahwo, hunemafuta nemakha; nomupristi unozohupisha kuita chicherechedziso padera pearita, kuti huite mudiro unoitwa ngomuriro, wegwema rakanaka kunaMambo Mwari.

³ Nouhwo hunozosara hwomudiro wezviyo hunozoita hwaAroni nevakororo vake, chiri chiro chakapinda chakachenesesa chomudiro unoitwa ngomuriro kunaMambo Mwari.

⁴ “Naapo wechizounza mudiro wezviyo wakabikwa, unozoita wezvingwa zvoufu hwakamotseka zvisina mumera, zvakakanywa nemafuta, nokuti zvingwa zvakatetepa zvisina mumera zvakadzodzwa mafuta.

⁵ Kudai mudiro wako uri wezviyo wakabikwa muhari yedongo, ngauite woufu hwakamotseka husina mumera, hwakakanywa nemafuta.

⁶ Unozochigura kuita zvigurwa, nokudurura mafuta padera pazvo; uyu mudiro wezviyo.

⁷ Kudai mudiro wako uri wezviyo wakakangwa muruwenda, unozoita woufu hwakamotseka hunemafuta.

⁸ Newe unozounza mudiro wezviyo wakaitwa ngeizvi zviro kunaMambo Mwari, naapo unozopirwa kunomupristi, iye unozouunza paarita.

⁹ Mupristi unozotora kwouri mudiro wezviyo rupande rwawo kuita chicherechedziso, unozorupisha padera pearita; uri mudiro wakaitwa ngomuriro wegwema rakanaka kunaMambo Mwari.

¹⁰ Neicho chinosara chomudiro wezviyo chinozoita chaAroni nevakororo vake; chiri chakapinda kuchenesesa chemidiro inoitwa ngomuriro kunaMambo Mwari.

¹¹ “Kusazoapo mudiro wezviyo, womunozounza kunaMambo Mwari unozoa nomumera, ngokuti amutongozopishi mumera nokuti uchi mumudiro nokuti ngouri unoitwa ngomuriro.

¹² Asi ngendaa yemidiro yemichero yomutanguro, munozoipira kunaMambo Mwari, asi aizopishwi padera pearita kuita gwema rakanaka.

¹³ Auzorekeri midiro yako yeshe yezviyo yokudya inozorungwa ngomunyu; zve, usazotenda kuti chitenderano chaMwari chitamikirwe ngomunyu; mumidiro yako yeshe yezviyo, unozoipira nomunyu.

¹⁴ “Kudai wechizounza mudiro wezviyo wemichero yokutanga kunaMambo Mwari, unozounza mudiro wezviyo wemichero yako yokutanga, mitsonzoti yekoroni mimbishi yakakochwa ngomuriro, eya koroni yakapurwa kubva kumitsonzoti.

¹⁵ Unozotutsira mafuta padera payo, nokuisa makha padera payo, uyu mudiro wezviyo.

¹⁶ Nomupristi unozopisha chicherechedziso chayo, rupande rwekoroni yakapurwa, norupande rwemafuta ayo, nemakha ayo eshe, uyu mudiro wakaitwa ngomuriro kunaMambo Mwari.