Revhi 19 - Bhaibheri Rakachena muChindau

Mipango yoKusukika noKururama

¹ Mambo Mwari wakaereketa kunaMosi echiti,

² “Ereketa kumbungano yeshe yevanhu vaIsuraeri, wechiti kwavari, ‘Munozoita vakachena ngokuti inini Mambo Mwari, Mwari wenyu ndiri wakachena.

³ Munhu weshe unozoremeredza mai ake nababa ake, nokungwarira maSabatha angu: ndini Mambo Mwari, Mwari wenyu.

⁴ Musapetukira kumiedzaniso, nokuti kudziitira zvimwari zvakanyunguruswa: inini ndini Mambo Mwari, Mwari wenyu.’

⁵ “Naapo munozopira mubairo yemidiro yokuiyana kunaMambo Mwari, munozopira ngenjira inoita kuti muashirike.

⁶ Munozoidya ngezuva ririro romunozouraya, nokuti nechimangwani; nokunyazwi chiinyi chinosara metsa zuva rechitatu, chinozopishwa ngomuriro.

⁷ Nokudai chechizodyiwa ngezuva rechitatu, chinozoita chinyangadzo; achizoashiriki.

⁸ Munhu weshe unozochidya, unozodzitwarira ndaa yake, ngokuti wakatsverudza icho chiro chakachena chaMambo Mwari; nouwo munhu unozogurwa kubva pakati pevanhu vake.

⁹ “Naapo munozokukura zviyo zveminda yenyu, musazokukura kupedzera makhona eminda yenyu, zve, musazonongeredza izvo zvinosara mukukukura kwenyu.

¹⁰ Nemwi musazozuwa mivhini yenyu kuti isare isina zviro nokuti kunongeredza mavhini akawira pashi; munozozvisiira varombo nevapara: inini ndini Mambo Mwari, Mwari wenyu.

¹¹ “Musazoba, nokuti kuradzikidza, nokuti kunyeperana.

¹² Musazopika ngokunyepa ngezina rangu, zve, musazotsverudza zina raMwari wenyu: inini ndini Mambo Mwari.

¹³ “Musazoradzikidza muakirwana wako, nokuti kumubira; misharo youwo unoshanda isazogara nemwi usiku hweshe metsa nechimangwani.

¹⁴ Musazotuka dziiranzee, nokuti kuisa chipumhuniso munjira yemapofu; asi munozotya Mwari wenyu: inini ndini Mambo Mwari.

¹⁵ “Musazotonga ngokusikaruramisa; musazoa nomutsananguro kumurombo, nokuti kuremeredza uri mukuru; asi munozotonga muakirwana wenyu ngokururamisa.

¹⁶ Musazohambahamba mwechiita tura wakaema pakati pevanhu; musazodetsera kuitira ndaa yengazi yomuakirwana wenyu: inini ndini Mambo Mwari.

¹⁷ “Musazonyenya hama yenyu mumwoyo mwenyu; ngegwinyiso munozopanga muakirwana wenyu, kuti musazogara nechishaishi imwimwi pachenyu ngendaa yake.

¹⁸ Musazounzidzira, nokuti kugara unebundu kunevanhu venyu, asi munozoda muakirwana wenyu kudai ngokudzida kwenyu: inini ndini Mambo Mwari.

¹⁹ “Munozongwarira zviemeso zvangu. Musazotendera kuti zvifuyo zvenyu zvivevedzwe ngeizvo zvembeu imweni; musazokusha munda wenyu ngembeu dzinokumanidzwa nedzimwe; musazopfeka chokusimira chakarukwa ngetambo dzemviri pamwepo netambo dzorukangaza.

²⁰ “Kunyazwi ndiani unozoatana nomukadzi uri hloko, wakaemeserwa mwamuna umweni, asi asikazi kuripirwa, nokuti kusunhurwa, vanozotongwa. Avazourawi, ngokuti iye waiya asati asunhurwa.

²¹ Asi munhuwo unozounza mudiro wake wokupauka kunaMambo Mwari, kumusiwo wetende romushongano, gondohwe kuita mudiro wokupauka.

²² Nomupristi unozomuitira muripo pamberi paMambo Mwari ngegondohwe romudiro wokupauka ngendaa yechishaishi chake chaakaita, nechishaishi chaakaita chinozorekererwa kwaari.

²³ “Naapo mwazoguma munyika iyo, mwazosima mbeu dzeshe dzemiti yemichero, naapo munozoerenga michero yayo kuti iri yakarambidzwa; makore matatu munozoierenga kuti iri yakarambidzwa, aizodyiwi.

²⁴ Mugore rechirongomuna yeshe michero yayo inozoita yakacheneswa kuti mukudze Mambo Mwari ndiyo.

²⁵ Asi mugore rechishanu munozodya michero yayo, kuti kubereka kwayo kuwanzwe kwomuri: inini ndini Mambo Mwari, Mwari wenyu.

²⁶ “Musazodya chiro chinengazi yacho. Zve, musazoshandisa masaramuso nokuti kushandisa uroyi.

²⁷ Musazopara masoro enyu kuita mabaraara kutendenedza soro, zve, musazopara makhona endebvu dzenyu.

²⁸ Musazocheka miiri yenyu kuita nyora ngendaa yewakafa, nokuti kucheka nyora pamuiri yenyu: inini ndini Mambo Mwari.

²⁹ “Musazotsverudza mwanasikana wenyu ngokumuita hure, kuti vanhu venyika vasazodzaka pashi kuita mahure, nenyika izare ngokushata.

³⁰ Munozongwarira maSabatha angu, nokuremeredza ndau yangu yakachena: inini ndini Mambo Mwari.

³¹ “Musakunukukira kwavari vanomweya yokufembera, nokuti kutsvaka vari man'anga kuti musvipiswe ndivo: inini ndini Mambo Mwari, Mwari wenyu.

³² “Munozomirukira uwo waanemvi, nokuremeredza hope yomunhu musharuka, utye Mwari wako: inini ndini Mambo Mwari.

³³ “Naapo munhu mupara echizogara munyika yenyu, musazomutambudza.

³⁴ Mupara unogara pakati penyu unozodai ngoumwe wakabarwa pakati penyu, nemwi munozomuda kudai ngokudzida kwenyu, ngokuti imwimwi mwaiya vapara munyika yeEgipite: inini ndini Mambo Mwari, Mwari wenyu.

³⁵ “Musazobira mukupima, nokuti urebu, uremu nokuti uwandu hwechiro.

³⁶ Munozoa nezvipimo zvakanaka, nemasimbi okupima ndio akanaka, chipimo chezviro, chemafuta chakanaka: inini ndini Mambo Mwari, Mwari wenyu, uwo wakamubudisa kubva kunyika yeEgipite.

³⁷ Ndizvo munozongwarira zveshe zviemeso zvangu, nazveshe zvitongero zvangu, muzviite: inini ndini Mambo Mwari.”