Revhi 18 - Bhaibheri Rakachena muChindau

Vanhu Vasikatenderwi Kuroorana

¹ Mambo Mwari wakaereketa kunaMosi echiti,

² “Ereketa kunavanhu vaIsuraeri, wechiti kwavari: ‘Inini ndini Mambo Mwari, Mwari wenyu.

³ Musazoita kudai ngemishando yevanhu venyika yeEgipite kwemwaigara; musazoitazve kudai ngemishando yevanhu venyika yeKhenani, kwendinomuendesa. Musazohamba ngezviitiro zvavo.

⁴ Imwimwi munozoita zvitongero zvangu, mungwarire zviemeso zvangu, muhambe mukati mwazvo: inini ndini Mambo Mwari, Mwari wenyu!’

⁵ Ndizvo munozongwarira zviemeso zvangu, nezvitongero zvangu; izvo kudai munhu echizviita unozopona ndizvo: inini ndini Mambo Mwari.

⁶ “Akuna naumwe wenyu unozokwedzera kuti afukure upunu hwouwo uri hama yake: ngokuti inini ndini Mambo Mwari.

⁷ Usazofukura upunu hwababa ako, nokuti upunu hwamai ako usazohufukura; ngokuti mai ako, newe usazofukura upunu hwake.

⁸ Usazofukura upunu hwomukadzi wababa ako; ngokuti huri upunu hwababa ako.

⁹ Upunu hwehanzvadzi yako, mwanasikana wababa ako, nokuti mwanasikana wamai ako, kunyazwi uwo wakabarwa mukanyi iro, nokuti usikazi kubarwa mukanyi iro, eya, usazofukura upunu hwavo.

¹⁰ Upunu hwomwanasikana womukororo wako, nokuti hwomwanasikana womwanasikana wako, eya, upunu hwavo usazohufukura; ngokuti upunu hwavo huri hwako.

¹¹ Upunu hwomwanasikana womukadzi wababa ako, wakabarwa ndibaba ako uri hanzvadzi yako, newe usazofukura upunu hwake.

¹² Usazofukura upunu hwehanzvadzi yababa ako ngokuti muiri wababa ako.

¹³ Usazofukura upunu hwomunun'una wamai ako; ngokuti muiri wamai ako.

¹⁴ Usazofukura upunu hwomunun'una wababa ako, newe usazokwedzera kuatana nomukadzi wake; ngokuti iye ndimainini ako.

¹⁵ Usazofukura upunu hwomuzakazi wako; ngokuti iye uri mukadzi womukororo wako; usazofukura upunu hwake.

¹⁶ Usazofukura upunu hwomukadzi womunun'una wako; ngokuti huri upunu hwomunun'una wako.

¹⁷ Usazofukura upunu hwomudzimai nohwomwanasikana wake, zve, usazoroora mwanasikana womukororo wake nokuti mwanasikana womwanasikana wake, kuti ufukure upunu hwake; ngokuti ava muiri wako; kushata.

¹⁸ Zve, usazoroora mukadzi nomunun'una wake pamwepo, kumutambudza nokufukura upunu hwake, ngenguva yokupona kwake.

¹⁹ “Usazokwedzera kumukadzi kumufukura upunu hwake, ngemazuva eshe okusvipiswa kwake aari kumwedzi ngokusvipiswa kwake.

²⁰ Zve, usazoatana nomukadzi womuakirwana wako, kuti udzisvipise ndiye.

²¹ Usazopa noumwe worudzi rwako kuti apotye mumuriro kuna Morekhi, zve, usazotsverudza zina raMwari wako: ngokuti inini ndini Mambo Mwari.

²² Usazoatana nomunhu wemwamuna kudai ngokuatana nomukadzi; chiri chinyangadzo.

²³ Zve, usazoatana nemhuka nokuti ngeiri kuti udzisvipise ndiyo; zve, nokuti munhu womukadzi kunyazwi ngouri asazoema pamberi pemhuka kuti aatane nayo; chiri chinyangadzo.

²⁴ “Musazodzisvipisa kunyazwi ngechiri cheizvi zviro, ngokuti ngeizvi zveshe madzinza endakadzinga kubva pamberi penyu vakadzisvipisa ndizvo.

²⁵ Nenyika yakasvipiswa; ndizvo ndakaiorora ngendaa yechishaishi chayo, nenyika yemene yakarutsa vagari vayo.

²⁶ Asi imwimwi munozongwarira zviemeso zvangu nezvitongero zvangu, musazoita kunyazwi ngechiri cheizvi zvinyangadzo, zve, kunyazwi ndiani uri wedzinza renyu, nokuti kunyazwi ngouri wevapara avo vanogara pakati penyu,

²⁷ (ngokuti izvi zveshe zvinyangadzo zvaiitwa ngevanhu venyika, avo vaiya pamberi penyu, nenyika yakasvipiswa,)

²⁸ kuti nyika isazomurutsawo, apo mwechiisvipisa, kudai ngezveyakarutsa madzinza aiya pamberi penyu.

²⁹ Ngokuti kunyazwi ndiani unozoita izvi zvinyangadzo, eya, munhu unozviita unozogurwa kubva pakati pevanhu vake.

³⁰ Ndizvo munozongwarira chiemeso changu, chokuti musazoita nokuti ngechiri chemiitiro iyi inonyangadza, yakaitwa ngepamberi penyu, nokuti musazodzisvipisa ndiyo: ngokuti ndini Mambo Mwari, Mwari wenyu.”