Revhi 17 - Bhaibheri Rakachena muChindau

Kuera kweNgazi

¹ Mambo Mwari wakaereketa kunaMosi echiti,

² “Ereketa kunaAroni nevakororo vake, nokwavari vanhu vaIsuraeri veshe wechiti kwavari: ‘Ichi ndicho chiro chaakapanga Mambo Mwari echiti,

³ kunyazwi ngouri munhu wemhatso yaIsuraeri, unozouraya n'ombe nokuti gwai nokuti mbudzi, mukamba, nokuti unoiuraya kubanze kwekamba,

⁴ asikaiunzi kumusiwo wetende romushongano, kuipira kuita mudiro kunaMambo Mwari pamberi petabhenakeri raMambo Mwari, munhu uwo unozoa nendaa yengazi, ngokuti wakaparadza ngazi; unozogurwa kubva pakati pevanhu vake.

⁵ Uku kuitira kuti vaIsuraeri vaunze midiro yavo yevanouraira kubanze, vaiunze kunaMambo Mwari, kumusiwo wetende romushongano, kumupristi nokuipira kunaMambo Mwari kuita midiro yokunyarara.

⁶ Mupristi unozofafaza ngazi paarita raMambo Mwari, riri pamusiwo wetende romushongano, nokupisha mafuta kuita gwema rakanaka kunaMambo Mwari.

⁷ Ndizvo avachazopiri midiro yavo kunemiedzaniso yokudira yembudzi, yevanoteera sure kwao kuita umhombo. Ichi chinozoita chiemeso kwavari kunoti mhera nariini pakati pemibarirwana yavo.’

⁸ “Newe unozoti kwavari, ‘Kunyazwi ngouri munhu pakati pevaIsuraeri, nokuti munhu mupara unogara pakati penyu, unopira mudiro wokupisha nokuti mubairo,

⁹ asikauunzi kumusiwo wetende romushongano, kuti aupire kunaMambo Mwari, uwo munhu unozogurwa kubva pakati pevanhu vake.’

¹⁰ “Kunyazwi ngouri munhu uri wemhatso yaIsuraeri, nokuti wevapara unogara pakati penyu, unozodya ngazi, ndinozoemesa hope yangu kubva kunomunhu uwo unodya ngazi, ndinozomugura kubva pakati pevanhu vake.

¹¹ Ngokuti kupona kwomuiri kuri mungazi; neni ndakaipa kwomuri padera pearita kuti iite muripo womweya wenyu; ngokuti ngazi inoita muripo womweya.

¹² Ndizvo ndakati kunevanhu vaIsuraeri, ‘Akuna munhu kwomuri unozodya ngazi, zve, akuna mupara unogara pakati penyu unozodya ngazi.’

¹³ “Kunyazwi ngouri munhu wevanhu vaIsuraeri, nokuti wevapara unogara pakati penyu, unovhima nokubata mhuka nokuti ngeiri, nokuti shiri inodyiwa, iye unozoparadza ngazi yayo, nokuifushira ngemavhu.

¹⁴ Ngokuti kupona kwenyama yeshe ingazi yayo; ndizvo ndakati kunevaIsuraeri, ‘Musazodya ngazi nokuti ngeyeiri nyama, ngokuti kupona kwemiiri yeshe kuri mungazi yayo; uwo unoidya unozogurwa.

¹⁵ Munhu weshe unozodya muiri wechadzifira chega, nokuti weicho chakabaurwa ngezvikara, kunyazwi umwe wenyika yenyu nokuti umwe wevapara, unozosuka zvokufuka zvake, nokushamba muiri wake ngemvura, naye unozoita wakasvipiswa metsa madeekoni; naapo unozoita wakasukika.

¹⁶ Asi kudai asikazosuki zvokufuka zvake, nokushamba muiri wake, naapo unozoa nendaa yokushata kwake.’ ”