Revhi 16 - Bhaibheri Rakachena muChindau

Zuva roKuripirwa

¹ Mambo Mwari wakaereketa kunaMosi ngesure kwokufa kwevakororo vairi vaAroni, apo pevakauya pasinde pamberi paMambo Mwari, vakafa.

² Mambo Mwari wakati kunaMosi, “Ereketa kunaAroni mukoma wako, kuti asazopotera nguva dzeshe kundau yakachenesesa mukati mwejira pamberi pechigaro chenyasha, chiri padera pebhokisi rechitenderano, kuti asazofa; ngokuti ndinozooneka mugore padera pechigaro chenyasha.

³ Ngenjira yakadai Aroni unozopotera kundau yakachenesesa: anomukono mutsva kuita mudiro wokushaisha, negondohwe kuita mudiro wokupisha.

⁴ Unozopfeka bhachi rorukangaza nokusimira bhuruku rorukangaza, unozodzisimidza ngebhande, unozopfeka ngundu yorukangaza; izvi zviri zvokusimira zvakachena. Ndizvo unozoshamba muiri wake ngemvura, nokuzvipfeka.

⁵ Unozotora kubva kunembungano yevanhu vaIsuraeri zviphongo zviiri kuti zviite mudiro wokushaisha, negondohwe rimwe rokuita mudiro wokupisha.

⁶ “Aroni unozopira mukono wake kuita mudiro wokushaisha, uri wake emene, unozoita muripo wake pachake nowemhatso yake.

⁷ Naye unozotora zviphongo zviiri, nokuzvipira pamberi paMambo Mwari pamusiwo wetende romushongano;

⁸ naAroni unozoita mabhigidha padera pezviphongo zviiri, rimweni bhigidha kupangidzira chiri chaMambo Mwari, nerimweni bhigidha kupangidzira chiri chiphongo chaAzazeri.

⁹ NaAroni unozounza chiphongo chakabatwa ngebhigidha raMambo Mwari, unozochipira kuita mudiro wokushaisha;

¹⁰ asi chiphongo chakabatwa ngebhigidha kuita chaAzazeri, chinozopirwa chechizwa pamberi paMambo Mwari, kumuitira muripo ndicho, nokuchirekera kuti chiende mushango chiite chaAzazeri.

¹¹ “Aroni unozounza mukono wokuita mudiro wokushaisha pachake, adziitire muripo pachake nowemhatso yake; naye unozouraya mukono wokuita mudiro wokushaisha pachake.

¹² Unozotora chidziyo chakazara ngemasimbe omuriro anopisha kubva paarita pamberi paMambo Mwari, nenyara dzake dzakazara ngomutombo unegwema rakanaka wakanasa kukuiwa, unozozviunza mukati mwejira rendau yakachena.

¹³ Naye unozoisa mutombo unegwema rakanaka mumuriro pamberi paMambo Mwari, kuti chiushi chomutombo unegwema rakanaka chitibikire chigaro chenyasha, icho chiri padera pechitenderano, nokuti asazofa.

¹⁴ Unozotora imweni yengazi yomukono, nokufafazira ngechinwe chake padera pechigaro chenyasha, nepamberi pechigaro chenyasha, unozofafazira ngazi ngechinwe chake kanomwe.

¹⁵ “Naapo unozouraya chiphongo chomudiro wokushaisha wevanhu, unozounza ngazi yacho mukati mwejira rendau yakachenesesa, nokuita ngeiyo ngazi kudai ngezvaakaita ngengazi yomukono, afafazire pachigaro chenyasha, nepamberi pechigaro chenyasha.

¹⁶ Ndizvo unozoita muripo wendau yakachenesesa, ngendaa yokusvipiswa kwevanhu vaIsuraeri, nendaa yezvipauka zvavo, nezvishaishi zvavo zveshe; ndizvo zvaanozoita kutende romushongano, iro rinosara navo pakati pokusakasukika kwavo.

¹⁷ Akuzoapo munhu mukati mwetende romushongano apo opotera kuita muripo mundau yakachenesesa, metsa iye abuda adziitira muripo pachake, nowemhatso yake yeshe, nowembungano yeshe yaIsuraeri.

¹⁸ Zvino unozobuda umwo kuenda kuarita riri pamberi paMambo Mwari, nokuriitira muripo; naye unozotora imweni yengazi yomukono, neimweni yechiphongo, nokuiisa padera penyanga dzearita kuritendenedza.

¹⁹ Unozofafazira imweni yengazi padera paro ngechinwe chake mikuwo minomwe, nokurisuka, nokurichenesa kubva kwokusvipiswa kwevanhu vaIsuraeri.

Chiphongo choKurashira muShango

²⁰ “Naapo apedza kuiyanisa ndau yakachena netende romushongano nearita, unozounza chiphongo chichazwa.

²¹ NaAroni unozoisa nyara dzake dzeshe padera pesoro rechiphongo chichazwa, atende padera pacho kushata kweshe kwevanhu vaIsuraeri, nokupauka kwavo kweshe, nezvishaishi zvavo zveshe, echizviisa padera pesoro rechiphongo, naye unozochiendesa ngenyara yomunhu wakaemeswa, kuenda nacho mushango.

²² Nechiphongo chinozotwara padera pacho zvishaishi zvavo zveshe kuenda kunyika isikagarwi ngomunhu; unozorekera apo chiphongo mushango.

²³ “Zvino Aroni unozouya kupotera mutende romushongano, naye unozokhumura zvokusimira zvake zvorukangaza, zvaakapfeka apo apotera mundau yakachenesesa, naye unozozviisa umwo.

²⁴ Unozoshamba muiri wake ngemvura mundau yakachena, nokupfeka zvokusimira zvake, nokubudemwo, nokupira mudiro wake wokupisha, nomudiro wokupisha wevanhu, echidziitira muripo pachake newevanhu.

²⁵ Nemafuta omudiro wokushaisha unozoapisha padera pearita.

²⁶ Nouwo wakaendesa chiphongo chaAzazeri unozosuka zvokufuka zvake, nokugeza muiri wake ngemvura; ngesure kweizvo unozouya mukamba.

²⁷ Mukono wokuita mudiro wokushaisha, nechiphongo chokuita mudiro wokushaisha, ngazi yazvo yakaunzwa mundau yakachenesesa kuti iite muripo, umwewo unozozvibudisa kubanze kwekamba; vanozozvipisha ngomuriro matoo azvo, nenyama yazvo, nemadisa azvo.

²⁸ Nouwo unozozvipisha unozosuka zvokufuka zvake, nokushamba muiri wake ngemvura, ngesure kweizvo unozopotera mukamba.

Kungwarira Zuva roKuripirwa

²⁹ “Neichi chinozoita chiemeso kwomuri chinoti mhera nariini: kuti ngomwedzi wechinomwe, ngezuva regumi romwedzi, munozotambudza mweya yenyu, musazoita mushando nokuti ngouri, kunyazwi vemhuri yenyu nokuti mupara unogara pakati penyu.

³⁰ Ngokuti ngeiro zuva mupristi unozomuitira muripo wokumusuka, kuti musukike kubva kuzvishaishi zvenyu pamberi paMambo Mwari.

³¹ Izuva reSabatha rokuzorora kwomuri, munozotambudza mweya yenyu, ngechiemeso chemhera nariini.

³² Mupristi uwo waanozodzodza, nokuemesa kuti ashandire mundau youpristi paugaro hwababa ake, iye unozomuitira muripo, naye unozosimira zvokusimira zvorukangaza, zvokusimira zvakacheneswa.

³³ Unozoita muripo wendau yakachenesesa, unozoita muripo wetende romushongano newearita unozoita muripo wevapristi nowevanhu veshe vembungano.

³⁴ Neichi chinozoita chiemeso kwomuri chemhera nariini, kuita muripo wevanhu vaIsuraeri wezvishaishi zvavo kamwe ngegore.” Mosi wakaita kudai ngezvaakapanga Mambo Mwari kwaari.