Revhi 15 - Bhaibheri Rakachena muChindau

Kusasukika kwoMuiri Une Mubvidza

¹ Mambo Mwari wakaereketa kunaMosi naAroni echiti,

² “Ereketa kuvanhu vaIsuraeri, wechiti kwavari, ‘Apo munhu anomutunda ngazi kubva mumuiri wake, wakasvipiswa ngendaa yomutunda ngazi wake.

³ Uku kunozoita kusikasukika kwake kwomutunda ngazi wake: kunyazwi muiri wake wechibudisa mutunda ngazi, kunyazwi muiri wake wapwa, kuri kusvipiswa kwake.

⁴ Mubhedhi weshe apo paanoata unomutunda ngazi uri wakasvipiswa nechiro cheshe chaanozogara padera pacho chinozoita chakasvipiswa.

⁵ Weshe unobata mubhedhi wake unozosuka zvokufuka zvake, nokudzishamba ngemvura, naye unozoita wakasvipiswa metsa madeekoni.

⁶ Veshe vanogara pachiro nokunyazwi ngechiri chagariwa ngouwo unotunda ngazi, unozosuka zvokufuka zvake, nokushamba muiri wake, unozoita wakasvipiswa metsa madeekoni.

⁷ Veshe vanogwama muiri wouwo unomutunda ngazi vanozosuka zvokufuka zvavo, vashambe muiri wavo, vanozoita vakasvipiswa metsa madeekoni.

⁸ Kudai uwo unomutunda ngazi echipfira mata padera peavo vakasukika, naapo vanozosuka zvokufuka zvavo, nokudzishamba mumvura, vanozoita vakasvipiswa metsa madeekoni.

⁹ Kunyazwi ngechiri chigaro chaanogara ari padera pacho, uwo unomutunda ngazi chinozoita chakasvipiswa.

¹⁰ Veshe avo vanogwama chiro chaiya pashi pake vanozoita vakasvipiswa metsa madeekoni, navo veshe vanotwara chiro chakadaro vanozosuka zvokufuka zvavo nokudzishambidza ngemvura, navo vanozoita vakasvipiswa metsa madeekoni.

¹¹ Kunyazwi ndiani unogwamwa ngouwo unemubvidza, asikazi kushamba nyara dzake ngemvura, unozosuka zvokufuka zvake, nokushamba ngemvura, naye unozoita wakasvipiswa metsa madeekoni.

¹² Chidziyo cheshe chedongo chaanogwama unemubvidza, chinozoputswa; nechidziyo cheshe chakaitwa ngomuti chinozosukwa ngemvura.’

¹³ “Naapo uwo unomubvidza acheneswa kubva kumubvidza wake ngaadzierengere mazuva manomwe okucheneswa kwake, asuke zvokufuka zvake, nokushamba muiri wake mumvura inoerera, naye unozoita wakasukika.

¹⁴ Ngezuva rechisere unozodzitorera magora mairi nokuti njia mbiri itsva, auye pamberi paMambo Mwari kumusiwo wetende romushongano, nokuzvipa kunomupristi.

¹⁵ Mupristi unozopira imwe kuita mudiro wokushaisha, neimweni kuita mudiro wokupisha; nomupristi unozomuitira muripo pamberi paMambo Mwari ngendaa yomutunda ngazi yake.

¹⁶ “Kudai munhu wemwamuna echidzirotera, naye unozoshamba muiri wake weshe ngemvura, unozoita wakasvipiswa metsa madeekoni.

¹⁷ Zvokufuka zveshe, zvakaitwa ngemachira nematoo dzinodonherwa ngembeu yeshe youhwamuna, zvinozosukwa ngemvura, nokuita zvakasvipiswa metsa madeekoni.

¹⁸ Kudai mwamuna echiatana nomukadzi vakadonherwa ngembeu youhwamuna, ngavashambe veshe ngemvura, navo vanozoita vakasvipiswa metsa madeekoni.

¹⁹ “Naapo mukadzi ari kumwedzi, kudai ngomuitiro wake anengazi kubva pamuiri wake, unozoita wakasvipiswa mazuva manomwe, nouwo unomugwama unozoita wakasvipiswa metsa madeekoni.

²⁰ Zviro zveshe zvaanoata padera pazvo ngenguva yokusvipiswa kwake zvinozoita zvakasvipiswa; nezviro zveshe zvaanozogara padera pazvo zvinozoita zvakasvipiswa.

²¹ Kunyazwi ndiani unozogwama mubhedhi wake unozosuka zvokufuka zvake, ashambe muiri wake ngemvura, unozoita wakasvipiswa metsa madeekoni.

²² Kunyazwi ndiani unozogwama chiro chaaigara padera pacho, unozosuka machira ake, nokudzishamba mumvura, naye unozoita wakasvipiswa metsa madeekoni.

²³ Kunyazwi chiinyi, mubhedhi wake nokuti chiro chaanogara padera pacho, kudai munhu echizvigwama, unozoita wakasvipiswa metsa madeekoni.

²⁴ Kudai mwamuna kunyazwi ngouri echiata nomukadzi achiri kumwedzi akadonherwa ngokusikasukika kwake, unozoita wakasvipiswa mazuva manomwe; nomubhedhi weshe waanoatapo unozoita wakasvipiswa.

²⁵ “Kudai mukadzi anomubvidza wengazi mazuva akawanda kudarika mazuva okusikasukika kwake, nokuti kuita mubvidza unopinda mazuva okusikasukika, eshe mazuva omubvidza wake unozoangira kuita wakasvipiswa; kudai ngemazuva okusvipiswa kwake, unozoita wakasvipiswa.

²⁶ Yeshe mibhedhi yaanoatapo mazuva eshe omubvidza wake inozoita kwaari kudai ngomubhedhi wake wakasvipiswa. Kunyazwi ngechiri chaanogara padera pacho chinozoita chakasvipiswa, kudai ngokusvipiswa kwemazuva okusikasukika kwake.

²⁷ Kunyazwi ndiani unozogwama izvo zviro unozoita wakasvipiswa, naye unozosuka zvokufuka zvake, nokudzishamba ngemvura, unozoita wakasvipiswa metsa madeekoni.

²⁸ Kudai mubvidza wake wechizopwa, ngaadzierengere mazuva manomwe, ngesure kweizvo unozoita wakasukika.

²⁹ Ngezuva rechisere unozodzitorera magora mairi, nokuti njia mbiri itsva, nokudziunza kunomupristi, kumusiwo wetende romushongano.

³⁰ Mupristi unozopira rimwe kuita mudiro wokushaisha, nerimweni kuita mudiro wokupisha; nomupristi unozomuitira muripo pamberi paMambo Mwari ngendaa yomubvidza wake.

³¹ “Ngokudaro munozoparadzanisa vanhu vaIsuraeri kubva kwokusikasukika kwavo, kuti vasazofa mukusvipa kwavo, apo vechizosvipisa tende rangu romushongano riri pakati pavo.”

³² Ichi ndicho chironzo chouwo unomubvidza chouwo unobudisa mbeu youhwamuna, naye echisvipiswa ndiyo,

³³ chouwo unorwara ngomubvidza wake, chouwo unomubvidza wevamuna nokuti wevakadzi, nechouwo unoatana nomukadzi wakasvipiswa.