Revhi 14 - Bhaibheri Rakachena muChindau

Kucheneswa kweVanhu Vaiya neMapere

¹ Mambo Mwari wakaereketa kunaMosi echiti,

² “Ichi ndicho chinozoita chironzo chomunhu unemapere ngezuva rokushambidzwa kwake: Unozounzwa kunomupristi.

³ Mupristi unozobuda kubva mukamba nomupristi unozomuringira. Kudai nhenda yemapere yapora kunouwo waiya nemapere,

⁴ mupristi unozopanga kuti atorerwe ngepamsoro pake uwo wodo kushambidzwa, shiri mbiri dzinopona dzakasukika, nomuti womusidhari, netambo tsvuku, nechimwanda chehisopi.

⁵ Nomupristi unozopanga kuti imwe yeshiri iurawe muchidziyo chedongo chakamirudzirwa padera pemvura inoerera.

⁶ Unozotora shiri inopona, pamwepo nomuti womusidhari, netambo yakatsvuka, nechimwanda chehisopi, naye unozozvinyika pamwepo neshiri inopona mungazi yeshiri yakaurawa padera pemvura inoerera.

⁷ Unozoifafazira kanomwe padera pouwo unoda kusukwa kubva kumapere ake; zvino unozoronza kuti uri wakasukika, unozorekera shiri inopona kuti idzimbururukire mushango.

⁸ Uwo unoda kuti acheneswe unozosuka zvokufuka zvake, nokupara bvudzi rake reshe, adzishambidze pachake mumvura, naye unozoita wakacheneswa. Ngesure kweizvo unozouya mukamba, asi unozogara kubanze kwetende rake mazuva manomwe.

⁹ Ngezuva rechinomwe unozopara bvudzi resoro rake reshe nemurebvu wake, netsiyo dzemadziso ake, eya, nebvudzi rake reshe unozoripara. Zvino unozosuka zvokufuka zvake, nokushamba muiri wake ngemvura, naye unozoita wakacheneswa.

¹⁰ “Ngezuva rechisere unozotora magondohwe mairi asina kuremara, nethukazi rimwe regwai rinegore rimwe, risina kuremara, nomudiro wezviyo makhirogramu matatu oufu hwakamotseka, kuita mudiro wezviyo unokumanidzwa nemafuta, nebhesini rendiro yemafuta.

¹¹ Mupristi unozomuchenesa unozomuunza uwo unoda kucheneswa, neizvi zviro pamberi paMambo Mwari, pamusiwo wetende romushongano.

¹² Mupristi unozotora gondohwe rimwe, unozoripira kuita mudiro wechishaishi chokupauka, pamwepo nebhesini rendiro yemafuta, naye unozozvizunguza kuita mudiro wakazunguzwa pamberi paMambo Mwari.

¹³ Unozouraya gondohwe pandau panourairwa mudiro wokushaisha nomudiro wokupisha mundau yakachena; ngokuti mudiro wechishaishi chokupauka kudai ngomudiro wokushaisha ngezvomupristi; wakachenesesa.

¹⁴ Mupristi unozotora imweni yengazi yomudiro wechishaishi chokupauka, nomupristi unozoiisa kumagumo kwenzee yake yokumudyo youwo unoda kucheneswa, nepadera pegunwe renyara yake yokumudyo, nepadera pegunwe guru retsoka yake yokumudyo.

¹⁵ Nomupristi unozotora rupande rwemafuta ari mundiro, nokuadururira pachanza chake chenyara yake yokumuoshwe,

¹⁶ nomupristi unozonyika chinwe chake chenyara yokumudyo mumafuta ari munyara yake yokumuoshwe, unozofafaza ngaao mafuta ngechinwe chake pamberi paMambo Mwari mikuwo minomwe.

¹⁷ Naamweni emafuta ari munyara yake mupristi unozoaisa kumagumo enzee yake yokumudyo, nepadera pegunwe renyara yake yokumudyo, nepadera pechikunwe chake chikuru chorutsoka rwake rwokumudyo, nepadera pengazi yomudiro wokupauka.

¹⁸ Mafuta eshe anosara munyara yomupristi unozoadurura padera pesoro rouwo unoda kucheneswa. Mupristi unozomuitira muripo pamberi paMambo Mwari:

¹⁹ Mupristi unozopira mudiro wokushaisha amuripire uwo unoda kucheneswa kubva kwokusvipiswa kwake. Ngesure kweizvi unozouraya mudiro wokupisha;

²⁰ nomupristi unozopira mudiro wokushaisha, nomudiro wezviyo padera pearita. Mupristi unozomuitira muripo, naye unozoita wakacheneswa.

²¹ “Asi kudai ari murombo, asikakoni kuona zvakawanda kudaro, ngaatore gondohwe rimwe kuti riite mudiro wokupauka kuti uzunguzwe, kuti uitwe muripo kwaari, nekhirogramu rimwe roufu hwakamotseka hwakakumanidzwa nemafuta kuita mudiro wezviyo, nendiro yemafuta,

²² nemagora mairi, nokuti njia mbiri itsva, zvaanokona kuona; imwe inozoita mudiro wokushaisha neimweni inozoita mudiro wokupisha.

²³ Naye unozozviunza ngezuva rechisere kunomupristi, pamusiwo wetende romushongano, pamberi paMambo Mwari;

²⁴ nomupristi unozotora gondohwe romudiro wokupauka, nendiro yemafuta, nomupristi unozozvizunguza kuita mudiro wokuzunguzwa pamberi paMambo Mwari.

²⁵ Mupristi unozouraya gondohwe romudiro wokupauka, unozotora ngazi yomudiro wokupauka, nokuiisa kumagumo kwenzee yokumudyo, nepadera pegunwe renyara yake yokumudyo, nepadera pechikunwe chikuru chorutsoka rwake rwokumudyo.

²⁶ Mupristi unozodurura rupande rwemafuta muchanza chenyara yake yokumudyo,

²⁷ nomupristi unozofafazira ngechinwe chake chokumudyo amweni emafuta ari munyara yake yokumuoshwe kanomwe pamberi paMambo Mwari.

²⁸ Mupristi unozotora amweni emafuta ari munyara yake nokuaisa kumagumo enzee youwo unoda kusukika, nepadera pegunwe renyara yake yokumudyo, nepadera pechikunwe chake chikuru chorutsoka rwake rwokumudyo, kundau yengazi yomudiro wokupauka.

²⁹ Mafuta eshe anosara munyara yomupristi unozoaisa padera pesoro rouwo unoda kucheneswa, kumuitira muripo pamberi paMambo Mwari.

³⁰ Naye unozopira rimwe regora, nokuti imwe yenjia itsva, kudai ngezvaanokona kuona,

³¹ chimwe kuita mudiro wokushaisha, nechimwe kuita mudiro wokupisha, pamwepo nomudiro wezviyo, nomupristi unozomuitira muripo uwo unoda kucheneswa pamberi paMambo Mwari.”

³² Ichi ndicho chironzo chouwo unenhenda yemapere, usikakoni kuona izvo zvakaemeserwa kuita zvokucheneswa kwake.

Maperembudzi muMhatso

³³ Mambo Mwari wakaereketa kunaMosi naAroni echiti,

³⁴ “Naapo mwoguma munyika yeKhenani, nyika yendinozomupa kuita nhaka, neni ndechizoisa nhenda yemapere mumhatso munyika iri nhaka yenyu,

³⁵ mune wemhatso unozouya kunomupristi echiti, ‘Kunooneka kwendiri kunga kunenhenda yemapere mumhatso mwangu.’

³⁶ Mupristi unozopanga kuti kuduswe zviro zviri mumhatso, asati apotera mupristi kuti aone nhenda, kuti zveshe zviri mumhatso zvisazoita zvakasvipiswa. Ngesure kweizvo unozopotera kuti aringire mhatso.

³⁷ Unozoringira nhenda iyo; kudai nhenda iri parukumbati rwemhatso, inemiara yakasvipirika nokuti yakatsvukuruka, nokuti kudai yechioneka yakapinda kudzama iri pashi kuno padera perukumbati,

³⁸ mupristi unozobuda mumhatso kuenda pamusiwo wemhatso, naye unozokonya mhatso mazuva manomwe.

³⁹ Mupristi unozouyazve ngezuva rechinomwe, echiringira; penya, kudai nhenda yechipararira murukumbati rwemhatso,

⁴⁰ mupristi unozopanga kuti mapuwe awo akaoneka anenhenda aduswe, navo vanozorasha kubanze kwedhorobha kundau isikazi kusukika.

⁴¹ Naye unozoita kuti mhatso iparwe ngomukati kundau dzeshe; vanozodurura maondo eshe akaparwa kubanze kwedhorobha kundau isikazi kusukika.

⁴² Vanozotora mapuwe amweni nokuaisa pandau yeao mapuwe akaduswa, vechitorazve madhaka amweni, vechisetazve mhatso ndiwo.

⁴³ “Kudai nhenda yechiuyazve, yechibuda mumhatso iyo, ngesure kwokuduswa kwemapuwe awo, kwokuparwa kwemhatso, nangesure kwokusetwa kwemhatso,

⁴⁴ mupristi unozouya echiringira; kudai nhenda yapararira mumhatso, inhenda yemapere inopararira mumhatso; yakasvipiswa.

⁴⁵ Naye unozopwanyira pashi mhatso, mapuwe ayo, miti yayo, nemaondo eshe emhatso; unozozvitwara kurasha kubanze kwedhorobha kundau isikazi kusukika.

⁴⁶ Veshe vanozopotera mumhatso iyo ngomukuwo wokukonywa kwayo vanozoita vakasvipiswa metsa madeekoni;

⁴⁷ navo veshe vanozoata mumhatso iyo vanozosuka zvokufuka zvavo; navo veshe vanodyira mumhatsoyo vanozosuka zvokufuka zvavo.

⁴⁸ “Kudai mupristi echipotera nokuringira, nenhenda isikazi kupararira mumhatso, ngesure mhatso yakasetwazve, naapo mupristi unozoronza kuti mhatso yakasukika, ngokuti nhenda yapora.

⁴⁹ Kusukika kwemhatso unozotora shiri mbiri, muti womusidhari, jira rakatsvuka nehisopi kuisuka ndizvo.

⁵⁰ Unozouraya shiri imwe muchidziyo chedongo padera pemvura inoerera.

⁵¹ Unozotora muti womusidhari, nehisopi, jira rakatsvuka, neshiri inozwa, nokuzvinyika mungazi yeshiri yakaurawa, nomumvura inoerera, nokufafazira mhatso kanomwe.

⁵² Ndizvo unozosuka mhatso ngengazi yeshiri, ngemvura inoerera, ngeshiri inopona, muti womusidhari, hisopi, nejira rakatsvuka.

⁵³ Asi shiri inopona unozoirekera kubanze kwedhorobha idzimbururukire mushango; ndizvo unozoita muripo wemhatso, nayo inozoita yakasukika.”

⁵⁴ Ichi ndicho chironzo chembeu dzeshe dzenhenda yemapere, anovava,

⁵⁵ nokuti nhenda yemapere yechokupfeka, nenhenda yemhatso,

⁵⁶ neyemota, yechiperembudzi, nechegumwa,

⁵⁷ kuonisa muparadzaniso wechakasvipiswa nechakasukika. Ichi ndicho chironzo chemapere.