Revhi 13 - Bhaibheri Rakachena muChindau

Zvironzo ngendaa yeNhenda yepaGanda roMuiri

¹ Mambo Mwari wakaereketa kunaMosi naAroni echiti,

² “Kudai munhu echimera mota pamuiri wake, nokuti chiparambudzi, nokuti gumwa, nacho chinozoita pamuiri wake kudai ngenhenda yemapere, naapo unozounzwa kunaAroni mupristi, nokuti kunoumwe wevakororo vake mupristi.

³ Mupristi unozoringira ara riri mumuiri wake; kudai mviri iri apo panenhenda yechikunukuka kuchena, neara rechioneka rechidzama kuenda mumuiri wake, riri ara remapere; nomupristi unozomuringira, nokuronza kuti wakasvipiswa.

⁴ Asi kudai ara iro riri rakachena mumuiri wake, naro rinooneka kuti aridzaki pashi munyama yomuiri wake, nemviri iripo aikunukuki kuchena, naapo mupristi unozokonyera uwo uneara mazuva manomwe.

⁵ Nomupristi unozomuringirazve ngezuva rechinomwe; kudai ara rechioneka kuti ariendi mberi kukura, naro ariparariri mumuiri wake naapo mupristi unozomukonyerazve mazuva amweni manomwe.

⁶ Nomupristi unozomuringirazve ngezuva rechinomwe; penya, kudai ara rinonga rakasvipa, neara risikaparariri mumuiri, mupristi unozomuronzera kuti wakasukika; chiri chiparambudzi chega; naye unozosuka zvokufuka zvake, unozoita wakasukika.

⁷ Asi kudai ara rechipararira kakurutu mumuiri wake, ngesure aiya aonwa ngomupristi kuti uri wakasukika, unozooniwazve ngomupristi.

⁸ Nokudai mupristi unozomuringirazve, kudai echiona kuti chiparambudzi chinopararira mumuiri wake naapo mupristi unozomuronzera kuti uri wakasvipiswa; mapere.

⁹ “Naapo kudai nhenda yemapere yabatira pamunhu, ngaaiswe kunomupristi.

¹⁰ Nomupristi unozomuringira; kudai panemota yakachena iri mumuiri wake, nayo yakunukudza mviri kuti ichene, nokudai iripo nyama isina urwa yakatsvuka mumota,

¹¹ mapere ekare ari pamuiri wake. Mupristi unozomuronzera kuti uri wakasvipiswa; naye aazomukonyeri, ngokuti uri wakasvipiswa.

¹² Nokudai mapere echipararira mumuiri, nemapere echizara muiri weshe wouwo uneara kubvira kusoro rake metsa kutsoka, mundau dzeshe mumuiri apo paanoringira mupristi,

¹³ zvino mupristi unozomuringisisa, kudai gumwa razadza muiri wake weshe, unozomuronzera kuti uri wakasukika; uwo uneara rakakunukuka kuita rakachena kundau dzeshe, wakasukika.

¹⁴ Asi apo kunozooneka nyama mbishi yakatsvuka kwaari, unozoita wakasvipiswa.

¹⁵ Nomupristi unozoringira nyama mbishi, unozoronza kuti wakasvipiswa.

¹⁶ Asi kudai nyama mbishi yakatsvuka inozokunukukazve, iitwe yakachena, unozouyazve kunomupristi.

¹⁷ Mupristi unozomuringira, nokudai gumwa rakunukuka kuita rakachena, naapo mupristi unozomuronzera kuti uri wakasukika kwaari waiya negumwa.

¹⁸ “Naapo muiri uwo waiya nemota munyama yawo, nayo yapora,

¹⁹ nepandau yechironda paiya nemota yakachena, nokuti ara rakachena nokutsvukuruka, naro rinozopangidzwa kumupristi.

²⁰ Mupristi unozoriringira, kudai mukuoneka kwaro rinodzaka pashi mumuiri, nemviri yaro yakunukuka kuchena, mupristi ngaamuronzere kuti wakasvipiswa; riri gumwa remapere rakamera kubva muchironda chemota.

²¹ Asi kudai mupristi echizoringira, nemviri iri padera pawo isikazi kuchena, nokudai risikadzaki pashi mumuiri, asi rapumhuruka, naapo mupristi unozomukonyera mazuva manomwe.

²² Nokudai rechipararira kakurutu mumuiri, naapo mupristi unozomuronzera kuti uri wakasvipiswa; iri igumwa remapere.

²³ Asi kudai ara rinogara pandau yaro, risikaparariri, iara remota. Mupristi unomuronzera kuti wakasukika.

²⁴ “Nokuti kudai kuripo mumuiri rupande rwakatsva, nenyama mbishi yakatsva ineara rakachena nokutsvukuruka, nokuti kuchena,

²⁵ mupristi unozoriringira. Kudai mviri iri paara yakakunukuka kuchena, nayo yadzaka pashi mumuiri, iyi inhenda yemapere; akabuda kubva ngepakatsva; ndizvo mupristi unozomuronzera kuti wakasvipiswa. Iyi inhenda yemapere.

²⁶ Asi kudai mupristi echiringira nokuona mviri isikazi kuchena, naro risikadzaki pashi munyama, asi rapumhuruka, mupristi unozomukonyera mazuva manomwe.

²⁷ Mupristi unozomuringirazve ngezuva rechinomwe; kudai rechipararira kakurutu mumuiri, naapo mupristi unozomuronzera kuti wakasvipiswa. Iyi inhenda yemapere.

²⁸ Asi kudai ara rechigara pandau yaro, risikaparariri mumuiri, asi rapumhuruka, iri mota yakamera pakatsva, nomupristi unozomuronzera kuti wakasukika; ngokuti iara rokutsva.

²⁹ “Naapo mwamuna nokuti mukadzi anenhenda pasoro nokuti mumurebvu,

³⁰ mupristi unozoringira nhenda iyo. Kudai yechioneka yechidzaka pashi munyama nokudai inebvudzi dete rakatsvuka nokucheneruka, naapo mupristi unozomuronzera kuti wakasvipiswa; chiri chironda chakaoma, eya, mapere ari musoro nokuti pamurebvu.

³¹ Kudai mupristi echiringira nhenda inovava, nayo yechioneka yechidzaka pashi peganda mumuiri, risina bvudzi rakasvipa, mupristi unozomukonyera mazuva manomwe uwo unenhenda inovava.

³² Ngezuva rechinomwe mupristi unozoringira nhenda inovava; kudai nhenda inovava isikazi kupararira, nomukati mwayo musina bvudzi rakatsvukuruka nokucheneruka, nenhenda inovava ichioneka isikaparariri, isikadzaki pashi peganda mumuiri,

³³ unozoparwa bvudzi, asi panenhenda inovava pasazoparwa. Mupristi unozomukonyerazve uwo unenhenda mazuva manomwe.

³⁴ Ngezuva rechinomwe mupristi unozoringira nhenda inovava, kudai isikaparariri muganda mumuiri, nokusikadzaka pashi, mupristi unozomuronzera kuti uri wakasukika. Unozosuka machira ake, unozoita wakasukika.

³⁵ Asi kudai nhenda inovava yechipararira kakurutu muganda mumuiri mwake ngesure kwokushambidzwa kwake,

³⁶ mupristi unozomuringira. Kudai nhenda inovava yechipararira muganda mumuiri, mupristi asazotsvaka bvudzi rakatsvukuruka; uri wakasvipiswa.

³⁷ Asi kudai kwechioneka kuti nhenda inovava aiparariri, nobvudzi dema rakura mukati mwayo, nhenda yapora, uri wakasukika; nomupristi unozomuronzera kuti wakasukika.

³⁸ “Naapo kudai mwamuna nokuti mukadzi anemaara paganda pamuiri, maara akachena, kudai maara ari paganda romuiri akachena anojeka,

³⁹ mupristi ngaamuringire; kudai maara ari muganda mumuiri ari akasvipirika akachena, kuri kurwarwauka ukwo kwabuda kunokura mumuiri; wakasukika.

⁴⁰ “Kudai munhu unebvudzi rinotapuka musoro mwake, unoita mhanza, uri wakasukika.

⁴¹ Kudai unebvudzi rinotapuka kubva pahuma yesoro rake, ngokuhope, iye unemhanza yepahuma, asi wakasukika.

⁴² Asi kudai kuripo mukati mwemhanza, nokuti mhanza iri muhuma resoro, chironda chakachena nokutsvukuruka, ari mapere abuda mumhanza yake, nokuti mumhanza yehuma yake.

⁴³ Mupristi unozomuringira; kudai chironda chiri chakachena nokutsvukuruka mumhanza yesoro rake, nokuti mumhanza yehuma yake, kudai ngenjira yaanoamba ndiyo mapere muganda romuiri wake,

⁴⁴ munhu unemapere, wakasvipiswa. Mupristi unozomuronzera kuti uri wakasvipiswa; nhenda iri musoro rake.

⁴⁵ “Munhu unenhenda yemapere unozopfeka mbatya dzakabaurwa nebvudzi resoro rake risakamwa, naye unozofukidza muromo wake wedera, echidaidzira kuti, ‘Ndiri wakasvipiswa, ndiri wakasvipiswa.’

⁴⁶ Eshe mazuva aanenhenda, unozogara ari wakasvipiswa; uri wakasvipiswa. Unozogara ega; unozogara kubanze kwekamba.

Mipango ngendaa yeGumwa

⁴⁷ “Ngendaa yezvokusimira: naapo nhenda yemapere yaoneka munezvokusimira zvemviri nokuti zvorukangaza,

⁴⁸ kunyazwi iri mutambo dzokuemesa mukurukwa, kunyazwi iri mutambo dzokuchinjika mukurukwa, orukangaza nokuti emviri, kunyazwi iri doo nokuti muchiro chakaitwa ngedoo,

⁴⁹ kudai nhenda yechionesa kusvipirika nokuti kutsvukuruka muchokufuka, nokuti mudoo, nokuti mutambo dzokuemesa mukurukwa, nokuti mutambo dzokuchinjika mukurukwa, nokuti iri mudoo kunyazwi ngeriri, iri nhenda yemapere, nayo inozopangidzwa kumupristi.

⁵⁰ Nomupristi unozoringira nhenda iyo, echikonyera chiro chinenhenda iyo mazuva manomwe.

⁵¹ Naye unozoringira nhenda ngezuva rechinomwe. Kudai nhenda yechipararira muchokufuka icho, nokuti mutambo dzakaemeswa mukurukwa, nokuti mutambo dzakachinjikwa mukurukwa, nokuti mudoo, nokuti muzviro zvakaitwa ngedoo, nhenda iyo yemapere inopararira; chiri chakasvipiswa.

⁵² Ndizvo unozopisha chokufuka icho chinenhenda iri mutambo dzakaemeswa mukurukwa, nokuti mutambo dzorukangaza, kunyazwi iri muchiro chakaitwa ngedoo, ngokuti inhenda yemapere inopararira; chinozopishwa ngomuriro.

⁵³ “Kudai mupristi echiringira, isikaparariri muchokufuka, nokuti mutambo dzakaemeswa mukurukwa, nokuti mutambo dzakachinjikwa mukurukwa, nokuti ngechiri chakaitwa ngedoo,

⁵⁴ naapo mupristi unozovapanga kuti vasuke icho chiro chinenhenda, naye unozochikonyerazve mazuva manomwe.

⁵⁵ Mupristi unozoringira chiro chinenhenda iyo ngesure kwokusukwa kwacho. Kudai nhenda isikakunukudzi muara wayo, nhenda isikaparariri, chiri chakasvipiswa; ngachipishwe ngomuriro, iyi inhenda inodya ngomukati nokuti ngokubanze.

⁵⁶ “Kudai mupristi echiringira, nhenda iri yakasvipa ngesure kwokurishamba, naapo unozoribaura kubva pachokufuka, nokuti kubva kunedoo, nokuti kubva kunetambo dzokuemesa mukurukwa, nokuti kubva kunetambo dzokuchinjika mukurukwa.

⁵⁷ Kudai rechiangira kuoneka muchokufuka, nokuti mutambo dzokuemesa mukurukwa, nokuti mutambo dzokuchinjika mukurukwa, nokuti muchiro chakaitwa ngedoo, inhenda inopararira; ngachipishwe ngomuriro chiro chinenhenda iyo.

⁵⁸ Asi kudai nhenda yabva muchokufuka, nokuti mutambo dzokuemesa mukurukwa, nokuti mutambo dzokuchinjika mukurukwa, nokuti chiro chakaitwa ngedoo, apo chakasukwa, naapozve chinozosukwa mukuwo wechipiri, chinozoita chakasukika.”

⁵⁹ Ichi ndicho chironzo chenhenda yemapere muchokufuka chemviri nokuti chorukangaza, kunyazwi iri mutambo dzokuemesa mukurukwa, nokuti iri mutambo dzokuchinjika mukurukwa, nokuti muchiro chakaitwa ngedoo, kuti kuronzwe kuti chiri chakacheneswa, nokuti kuronza kuti chiri chakasvipiswa.