Revhi 11 - Bhaibheri Rakachena muChindau

Mhuka Dzingadyiwa

¹ Mambo Mwari wakaereketa kunaMosi nokunaAroni, echiti kwavari,

² “Ereketai kunevanhu vaIsuraeri mwechiti, ‘Idzi ndidzo mhuka dzomungadya pakati pemhuka dzeshe dzomunyika.

³ Idzo dzeshe dzinemadondova akamweswa kuita mairi, nokutsengesa marukurwa, pakati pemhuka idzo mungadzidya.

⁴ Asi pakati peidzi dzinotsengesa marukurwa, nokuti idzo dzinemadondova akamweswa; amuzodzidyi idzi kudai ngekamera kunyazwi rinotsengesa marukurwa asi arina madondova akamweswa, rakasvipiswa kwomuri;

⁵ nembira, kunyazwi inotsengesa marukurwa, asi madondova aazi kumweswa; yakasvipiswa kwomuri;

⁶ netsuro, kunyazwi inotsengesa marukurwa asi aizi kumweswa madondova; yakasvipiswa kwomuri;

⁷ nenguruve, kunyazwi madondova ayo akamweswa, kuita masondo mairi, asi aitsengesi marukurwa; yakasvipiswa kwomuri.

⁸ Nyama yadzo musazoidya, nemiiri yadzo musazoigwama; dzakasvipiswa kwomuri.’

⁹ “Idzi mungadya kwedziri dzeshe dziri mumvura: zviro zveshe izvo zvinemabesu nezvinemagwamba zviri mumvura, nezviri muruandhle, nezviri mumikova, izvo mungadya.

¹⁰ Asi chiro cheshe chisina mabesu nemagwamba chiri muruandhle, nechiri mumikova, cheizvo zveshe zvinogeza mumvura, neizvo zveshe zvinopona mumvura, zvinozoita chinyangadzo kwomuri.

¹¹ Zvinogara zvakaita chinyangadzo kwomuri; musazodya nyama yadzo, asi munozoerenga miiri yadzo kuti zvinyangadzo.

¹² Chiro cheshe chisina mabesu nemagwamba chinogara mumvura, chinozoita chinyangadzo kwomuri.

¹³ “Idzi munozodzierenga kuita chinyangadzo pakati peshiri; musazodzidya, ngadziite zvinyangadzo: madorambudzi, makwanga, chapungu,

¹⁴ gwakura mapande, nechiatsi, nembeu yacho yeshe;

¹⁵ nemakungu eshe ngembeu dzao dzeshe;

¹⁶ nemhowani, nekwekwi, nechikodzi nembeu yacho yeshe;

¹⁷ nechimwaduku, nehwazi, nezizi guru;

¹⁸ nenonera, nezvinyamundanda, nenjerere,

¹⁹ nomukwasi, neriti, mbeu yaro yeshe, netsungururu, nechinyamuremwaremwa.

²⁰ “Mbeu dzeshe dzezviro zvinemaphaphiro zvinohamba ngemirenje mirongomuna, zvinozoita chinyangadzo kwomuri.

²¹ Asi pakati peizvi mungadya kwezviri zveshe zvinemaphaphiro, zvinotamanda ngemirenje mirongomuna, zvinemirenje inenhengo padera petsoka dzazvo, kuti zvitomuke ndiyo padera penyika.

²² Ndizvo izvi mungadya pakati pazvo; ndongwe ngembeu dzadzo, nemabupwe ngembeu dzao, nemandere ngembeu dzao, nemakwiza ngembeu dzao.

²³ Asi zvimweni zviro zvinemaphaphiro, zvinotamanda, zvinetsoka murongomuna, zvinozoita chinyangadzo kwomuri.

²⁴ “Ngeizvi munozoita vakasvipiswa ndizvo: kunyazwi ndiani unozogwama miiri yazvo unozoita wakasvipiswa metsa madeekoni.

²⁵ Nouwo unozotwara nokuti ngechiri chomuiri wazvo unozosuka zvokusimira zvake, unozoita wakasvipiswa metsa madeekoni.

²⁶ Mhuka dzeshe dzinetsoka dzakaparadzana asi dzinemadondova asikazi kumweswa, nokuti kutsengesa marukurwa, dziri dzakasvipiswa kwomuri; veshe vanodzigwama vanozoita vakasvipiswa.

²⁷ Dzeshe dzinohamba ngendwara, pakati pemhuka dzeshe dzinohamba ngemirenje mirongomuna, dzakasvipiswa kwomuri. Uwo unogwama miiri yadzo unozoita wakasvipiswa metsa madeekoni.

²⁸ Nouwo unotwara miiri yadzo unozosuka zvokusimira zvake, nokuita usikazi kusukika metsa madeekoni; idzi dzinoita dzisikazi kusukika kwomuri.

²⁹ “Izvi zvinozoita zvisikazi kusukika kwomuri kwezviri zviro zvinotamanda munyika: chikoo, nembeya, gwavava nembeu dzaro dzeshe,

³⁰ gwama, nerwaivhi, nomukodyo, mukodyo womujecha.

³¹ Izvi zviri zvakasvipiswa kwomuri pakati peizvo zvinotamanda; nouwo unozvigwama, apo zvafa, unozoita wakasvipiswa metsa madeekoni.

³² Kunyazwi chiinyi chezvinowira padera pazvo, apo zvafa, chinozoita chakasvipiswa; kunyazwi chiri chidziyo chomuti, nokuti chokusimira, nokuti doo, nokuti saka, nokuti ngechiri chinoshandiswa, kunotamika kuti chiiswe mumvura, chinozoita chakasvipiswa metsa madeekoni; ngokudaro chinozoita chakasukika.

³³ Nezvidziyo zveshe zvedongo apo pezvinozowiremwo, kunyazwi chiri mukati mwazvo chinozoita chakasvipiswa; nemwi munozozviputsa.

³⁴ Kudya kweshe kungadyiwa, kunozoita kwakasvipiswa apo kwagwamiwa ngemvura iyi; nazvo zveshe zvinomwiwa zvinozoita zvakasvipiswa kudai zvaiya muzvidziyo izvi.

³⁵ Naapo peshe peinozowa miiri yazvo panozoita pakasvipiswa kunyazwi pachoto, nokuti pandau dzinogadzikwa hari, zvinozoputsirwa pashi; ngokuti zviri zvisikazi kusukika kwomuri.

³⁶ Asi apo pane chinyuka chemvura nokuti gandwa, apo peiri mvura yakawanda, panozoita pakasukika; asi uwo unobata iyo miiri yakafa unozoita usikazi kusukika.

³⁷ Kudai miiri yazvo zvechiwira padera pembeu dzokukusha, dzinoda kukushwa, dzinozoita dzakasukika kwomuri.

³⁸ Asi kudai mvura yechidururirwa padera padzo, dzinozoita dzisikazi kusukika kwomuri.

³⁹ “Kudai mhuka yechifa, kunyazwi ngeiri, yomungadya, uwo unogwama muiri wayo unozoita wakasvipiswa metsa madeekoni.

⁴⁰ Avo vanozodya muiri wayo vanozosuka zvokusimira zvavo, navo vanozoita vakasvipiswa metsa madeekoni. Naavo vanotwara muiri wayo vanozosuka machira avo, vanozoita vakasvipiswa metsa madeekoni.

⁴¹ “Zvisikwa zveshe zvinotamanda padera penyika zvinozoita chinyangadzo; azvizodyiwi.

⁴² Kunyazwi chiinyi cheizvo zvinogwezva ngendani, nokuti zvinohamba ngetsoka murongomuna, nokuti zvinemirenje yakawanda pakati pezviro zveshe zvinotamanda padera penyika, izvo musazodya, ngokuti zviri chinyangadzo.

⁴³ Musazodziita chinyangadzo ngezviro zvinogwezva, zve, musazodzisvipisa ndizvo; kuti musvipiswe ndizvo.

⁴⁴ Ngokuti inini ndini Mambo Mwari, Mwari wenyu; ndizvo munozodzichenesa, munozoita vakachena, ngokuti inini ndiri wakachena. Zve, musazodzisvipisa ngezviro zvinogwezva padera penyika.

⁴⁵ Ngokuti ndini Mambo Mwari uwo wakamubudisa kubva kunyika yeEgipite, kuti ndiite Mwari wenyu; ndizvo munozoita vakachena, ngokuti inini ndiri wakachena.

⁴⁶ “Ichi ndicho chironzo chemhuka necheshiri nechezvipuka zveshe zvinopona zvinohamba mumvura nechezvipuka zveshe zvinogwezva padera penyika,

⁴⁷ kuita muparadzaniso pakati pezvakasvipiswa nezvisikazi kusvipiswa, nepakati pemhuka dzinodyiwa, neidzo dzisikadyiwi.”