Revhi 10 - Bhaibheri Rakachena muChindau

Chishaishi chaNadhabhi naAbhihu

¹ Zvino Nadhabhi naAbhihu vakororo vaAroni vakatora vari vairi umwe ngoumwe chidziyo chake chokupishira mutombo unegwema rakanaka, vakaisa muriro mukati mwazvo, vakaisa mitombo inegwema rakanaka umwo, vakapira muriro usaitenderwa pamberi paMambo Mwari, uwo waasikazi kuvapanga.

² Kwakabuda muriro kubva pamberi paMambo Mwari wakavapedza, navo vakafa pamberi paMambo Mwari.

³ Zvino Mosi wakati kunaAroni, “Ichi ndicho chaakaereketa Mambo Mwari echiti, ‘Ndinozocheneswa mukati mweavo vanokwedzera kwendiri, nepamberi pevanhu veshe ndinozoirikidzwa.’ ” NaAroni wakanyarara.

⁴ Mosi wakadaidza Mishaeri naErizafani, vakororo vaUzieri sekuru vaAroni, wakati kwavari, “Kwedzerai, muduse hama dzenyu kubva pamberi pendau yakachena muvaise kubanze kwekamba.”

⁵ Vakakwedzera pamberi, vakavatwara ngemabhachi avo kuenda kubanze kwekamba, kudai ngezvaakaronza Mosi.

⁶ NaMosi wakati kunaAroni nokunaEreaza nokunaIthama, vakororo vake, “Musadusa ngundu dzenyu kubva pamasoro enyu, zve, musabaura zvokusimira zvenyu, kuti musafa, nokuti ushungu husazodzaka padera pevanhu veshe; asi hama dzenyu, mhatso yeshe yaIsuraeri vangachema uku kupisha kwaakabasa Mambo Mwari.

⁷ Nemwi musazobuda kubva pamusiwo wetende romushongano, kuti musafa; ngokuti mafuta okudzodzwa aMambo Mwari ari padera penyu.” Navo vakaita kudai ngokupanga kwaMosi.

Zviemeso zveVapristi

⁸ Mambo Mwari wakaereketa kunaAroni echiti,

⁹ “Usazomwa vhini nokuti zvinoradzisa, iwewe nokuti vakororo vako, apo munopinda mutende romushongano, kuti musafa; chinozoita chiemeso chemhera nariini kwomuri nomumibarirwana yenyu yeshe.

¹⁰ Munosisira kuita muparadzaniso pakati pezvakachena nezvisikazi kuchena, nepakati pezvakasukika nezvisikazi kusukika;

¹¹ zve, kuti mudzidzise vanhu vaIsuraeri zviemeso zveshe zvakaereketa Mambo Mwari kwavari kubudikidza ndiMosi.”

¹² Mosi wakaereketa kunaAroni nokunaEreaza nokunaIthama, vakororo vake vaiya vasara, “Torai mudiro wezviyo wakasara wemidiro yaMambo Mwari inoitwa ngomuriro, muudye usina mumera muri pasinde pearita, ngokuti uri wakachenesesa.

¹³ Nemwi munozoudya pandau yakachena, ngokuti uri chikoaniswa chako nechikoaniswa chevakororo vako, chemidiro yaMambo Mwari inoitwa ngomuriro; ngokuti ndakapangwa kudaro.

¹⁴ Asi chifuba chakazunguzwa nechityu chokumirudzwa munozozvidya pandau yakasukika, iwewe nevakororo vako nevanasikana vako mweshe. Ngokuti zviri zvikoaniswa zvako nezvevakororo vako, zvinopirwa kubva kumidiro yokuiyana yevanhu vaIsuraeri.

¹⁵ Vanozounza chityu chokumirudzwa nechifuba chokuzunguzwa pamwepo nemidiro inoitwa ngomuriro yemafuta, kuti zvizunguzwe kuita mudiro wokuzunguzwa pamberi paMambo Mwari; nazvo zvinozoita zvako iwewe nevakororo vako, ngechiemeso chemhera nariini, kudai ngezvaakapanga Mambo Mwari.”

¹⁶ Zvino Mosi wakatsvakisisa mbudzi yokuita mudiro wokushaisha, penya, yaiya yapishwa; naye wakatsenekera Ereaza naIthama, vakororo vaAroni avo vaiya vachapona echiti,

¹⁷ “Amuzi kudya ngenyi mudiro wokushaisha kundau yakachena? Ngokuti chiri chakachenesesa, naMwari wakachipa kwomuri kuti mubvise kushaisha kwembungano, kuita muripo wevanhu pamberi paMambo Mwari.

¹⁸ Ngazi yacho aizikuunzwa mukati mwendau yakachena. Ngegwinyiso mwaisisira kuidyira mundau yakachena, kudai ngezvendakamupanga.”

¹⁹ Aroni wakati kunaMosi, “Ringira, nyamashi vapira mudiro wavo wokushaisha nomudiro wokupisha pamberi paMambo Mwari, asi zviro zvakadai zvaitika kwendiri! Kudai ndaiya ndadya mudiro wokushaisha nyamashi, chaizoashirika here mukuona kwaMambo Mwari?”

²⁰ Naapo Mosi azwa izvi wakatenderana nazvo.