Revhi 1 - Bhaibheri Rakachena muChindau

Mudiro woKupisha

¹ Mambo Mwari wakadaidza Mosi, akaereketa kwaari kubva mutende romushongano echiti,

² “Ereketa kuvaIsuraeri, wechiti kwavari, ‘Naapo umwe wenyu kunyazwi ngouri pakati penyu achizounza mudiro wemhuka kunaMambo Mwari, munozounza mudiro wenyu kubva pakati pomutanga wen'ombe, nokubva pakati pomutanga wemakwai nembudzi.’

³ “Kudai mudiro wake uri mudiro wokupisha wezvifuyo, ngaape yomukono isina kuremara naye unozopa kudai ngokuda kwake pamusiwo wetende romushongano pamberi paMambo Mwari.

⁴ Unozoisa nyara yake padera pesoro romudiro wokupisha, nawo unozoashirika kwaari kuita kuripirwa kwake.

⁵ Unozouraya mukono pamberi paMambo Mwari, nevapristi, vakororo vaAroni, vanozopira ngazi, vechifafaza ngazi kumarutii eshe earita iro riri pasinde pomusiwo wetende romushongano.

⁶ Mudiro wokupisha unozovhiiwa nokugurwagurwa kuita zvigurwa.

⁷ Vakororo vaAroni mupristi vanozoisa muriro paarita nokuronga huni padera pomuriro.

⁸ Vakororo vaAroni vapristi vanozoronga zvigurwa izvo, soro nemafuta, padera pehuni dzomuriro wearita.

⁹ Asi maura ayo nemadondova ayo unozozvisuka ngemvura. Zvino mupristi unozopisha zveshe paarita, kuti uite mudiro wokupisha, mudiro unoitwa ngomuriro, unegwema rakanaka kunaMambo Mwari.

¹⁰ “Kudai mudiro wake wokupisha wechibva pazvifuyo, makwai nembudzi, mudiro wake wokupisha unozoita wegondohwe negotokoto zvisina kuremara.

¹¹ Unozoriuraya ngokurutii rwedera rwearita pamberi paMambo Mwari nevapristi, vakororo vaAroni, vanozofafazira ngazi yaro kumarutii eshe earita.

¹² Unozoritematema kuita zvigurwa, zveshe soro nemafuta aro, nomupristi unozozvironga padera pehuni dzomuriro wearita.

¹³ Asi unozosuka maura nemadondova aro ngemvura. Zvino mupristi unozopira zveshe, nokuzvipisha padera pearita; uyu mudiro wokupisha, mudiro unoitwa ngomuriro, wegwema rakanaka kunaMambo Mwari.

¹⁴ “Kudai mudiro wake wokupisha kunaMambo Mwari uri weshiri, unozounza mudiro wake wegora nokuti wenjia itsva.

¹⁵ Mupristi unozoiunza paarita, nokushongorora mutsipa wayo, nokuipisha padera pearita; nengazi yayo inozodururwa parutii rwearita.

¹⁶ Unozodusa dokoriro rayo pamwepo nemanhenga ayo, nokuzvirasha ngepamberi pearita ngokumabvazuva pandau yemarota.

¹⁷ Unozoibadzura inemaphaphiro ayo, asi asazoiadza kuita zvigurwa. Zvino mupristi unozoipisha paarita, padera pehuni dzomuriro; uyu mudiro wokupisha, mudiro unoitwa ngomuriro, wegwema rakanaka kunaMambo Mwari.