Neh. 6 - Bhaibheri Rakachena muChindau

Bangano roKurwisa Nehemia

¹ Zvino apo zvaronzwa kunaSanibharati naThobhia naGeshemu muArabhia, nokunevamweni vemagaa edu, kuti ndaiya ndaakisa rukumbati nokuti paiya pasina neburi rakasara peruri (kunyazwi kugumira panguva iyi ndaiya ndisati ndaemesa zvivhayo mumisiwo),

² Sanibharati naGeshemu vakatumira izwi kwendiri vechiti, “Uyai tishongane pamwepo murimwe remaguta ari muRubaya rweOno.” Asi vakapinimidza kundiitira zvakashata.

³ Ndizvo ndakatuma nhumwa kwevari ndechiti, “Ndinoshanda mushando mukurutu, neni andingakoni kudzakeyo. Mushando ungarekererwenyi pendinousiya kudzaka kwomuri?”

⁴ Vakatumira kwendiri karongomuna ngenjira yakadai, neni ndakavapingura ngenjira ndiyo ndiyo.

⁵ Munjira imweyo Sanibharati wakatumira muranda wake kwendiri kashanu anetsamba yakabeuka munyara mwake.

⁶ Mukati mwakanyorwa kuti, “Kwakaronzwa pakati pevemadzinza, naGeshemu unoronzawo kudaro, kuti iwewe nevaJudha munopinimidza kumukira; ndiyo ndaa mwechiakisa rukumbati, nokudai ngemazwi aya iwewe unodisa kuita mambo wavo.

⁷ Iwewe wakaemesazve vaprofeti kuti vachumaire ndiwe muJerusarema vechiti, ‘Uriyo mambo muJudha!’ Nazvino kunozoronzwa kunamambo kudai ngemazwi aya. Ndizvo zvino, uya, kuti tipangane pamwepo.”

⁸ Zvino ndakatumira izwi kwaari ndechiti, “Akuna zviro zvakadaro zvakaitwa kudai ngokuronza kwako, asi iwewe unozvironga mumusoro mwakomwo.”

⁹ Ngokuti veshe vaida kutityisidzira, vechipinimidza kuti, “Nyara dzavo dzinozopera simba mumushando, kuti usachazoshandwa.” Asi zvino, A Mwari wangu, gwinyisa nyara dzangu.

¹⁰ Zuva rimweni apo pendakapotera mumhatso yaShemaia mukororo waDheraia mukororo waMehetabheri, uwo waiya akadzikonyera mumhatso yake, wakati, “Ngatishongane pamwepo mumhatso yaMwari, mukati mwetemperi, tikonye misiwo yetemperi, ngokuti vanouya kuti vakuuraye; ngegwinyiso, vanozoguma usiku uhwu kookuuraya.”

¹¹ Asi ndakati, “Munhu wakadai ndini ungasisira kuti atize here? Munhu wakadai ndini ungatenda kupotera mutemperi kuti adziponese umwo here? Andipoterimwo!”

¹² Zvino ndakaringira, ndakaona kuti Mwari waiya asikazi kumutuma; asi kuti wakaereketa kuprofeta uku ndini, ngokuti Thobhia naSanibharati vaiya vakamubhadhara ngemare.

¹³ Ndizvo wakabhadharirwa kuita iri biningidzo kundityisidzira nokundiita kuti ndishaishe, ngokuita kudaro, vanozondiitira ndaa yokuereketa zvakashata ndini, kuti vanditsverudze.

¹⁴ Mwari wangu, pinimidzai ndiThobhia naSanibharati kudai ngezviito zvavo izvi, zve nokumuprofeti womukadzi Noadhia, nevamweni vevaprofeti, avo vaiya nechidisiso chokundityisidzira.

Kupera kwoMushando

¹⁵ Ndizvo rukumbati rwakapera ngezuva remakumi mairi nemashanu romwedzi unozwi Eruri, muzuva remakumi mashanu nemairi.

¹⁶ Naapo magaa edu eshe azwa ndizvo, madzinza eshe akatitendenedza vakatyiswa, vakapera simba kakurutu mukuona kwavo; ngokuti vakaona kuti uyu mushando wakaitwa ngokudetserwa ndiMwari wedu.

¹⁷ Zve, ngemazuva awo vakuru vaJudha vakatumira tsamba dzakawanda kunaThobhia, netsamba dzaThobhia dzakauyawo kwevari.

¹⁸ Ngokuti vakawanda muJudha vaiya vakasungwa ngemhiko kwaari, ngokuti iye waiya mukwambo waShekania mukororo waAra; nomukororo wake Jehohanani waiya aroora mwanasikana waMeshuramu mukororo waBherekhia.

¹⁹ Vakaereketawo ngezviito zvake zvakanaka pamberi pangu, vakashuma mazwi angu kwaari. NaThobhia wakatumira tsamba dzokundityisidzira.