Neh. 5 - Bhaibheri Rakachena muChindau

Kutambudzwa kweVarombo

¹ Zvino kwakabuda kuchema kukurutu kwevanhu nekwevakadzi vavo vechiitira ndaa hama dzavo vaJudha.

² Ngokuti vaiyapo avo vaiti, “Isusu nevakororo vedu, nevanasikana vedu, tiri vazhinji; tinosisira kuona zviyo kuti tidye tipone.”

³ Vaiyapo vamweni avo vaiti, “Tinozogondisa ngeminda yedu, mivhini yedu nemhatso dzedu, kuti tikone kuona zviyo panguva yenzara.”

⁴ Vaiyapo avo vaiti, “Takacheneka mare kuti tibhadhare muthero kunamambo weminda yedu neminda yedu yemivhini.

⁵ Zvino muiri wedu wakadai ngewehama dzedu, vana vedu vakadai ngevana vavo; asi tiri kuangiridza vakororo vedu nevanasikana vedu kuti vaite hloko, nevamweni vevanasikana vedu vakatopirwa vaa muuhloko; atichina simba rokuchavaripira, ngokuti minda yedu neminda yemivhini yakatorwa ngevamuna vamweni.”

⁶ Ndakanyangadzwa kakurutu apo pendakazwa kuchema kwavo nezvichemo izvi.

⁷ Ndapedza kupinimidza ndizvo, ndakaitira ndaa vakuru nevatongi; ndakati kwevari, “Imwimwi mweshe munotora mare yokuuyirwa kubva kuvanhu venyu.” Ndakadaidza mbungano huru kuti ivaitire ndaa.

⁸ Ndakati kwevari, “Kudai ngezvetaikona, takaripira hama dzedu vaJudha, avo vakatengeswa kunevemadzinza amweni; asi zvino imwimwi mwaa kutengesa hama dzenyu, avo zvino vangatengwazve tisu!” Vaiya vakanyarara, avazi kukona kuona izwi rokupingura.

⁹ Ndizvo ndakati, “Chiro icho chomunoita achizi kunaka. Amusisiri here kuti muhambe ngokumutya Mwari wedu, kuti tisazoshoorwa ngevemadzinza, magaa edu?

¹⁰ Zve, inini nehama dzangu, nevaranda vangu takavakweretesawo mare nezviyo. Ngatirekere kutora mare yokuuyirwa yakadaro.

¹¹ Hwirinzai kwevari nyamashi minda yavo, minda yavo yemivhini, minda yavo yemiti yemiorivhi, mhatso dzavo, kuuirwa kwemare yavo, kwezviyo, kwevhini nokwemafuta, zvemwakatora kwevari.”

¹² Zvino vakati, “Tinozohwirinza chiro cheshe, atizodaidzizve chiro kubva kwevari. Tinozoita kudai ngezvewaronza.” Zvino ndakadaidza vapristi, ndikaita kuti vapike mhiko kuti vaite kudai ngokugondisa kwavo.

¹³ Ndakazuwazve kuonyana kwechokusimira changu, ndikati, “Ndizvo Mwari ngaazuwe munhu weshe kubva kumhatso nokubva kupfuma, uwo usikazadzisi ichi chigondiso. Ndizvo ngaazuiwe, asare asina chiro.” Nembungano yeshe yakati, “Ameni,” vakakudza Mambo Mwari. Nevanhu vakaita kudai ngezvevakagondisa.

Kudzipfaisa kwaNehemia

¹⁴ Zve, kubvira panguva yendakaemeswa kuita mutongi munyika yaJudha, kubvira gore remakumi mairi metsa kuguma kugore remakumi matatu nemairi rokutonga kwaArthazekizesi mambo, makore gumi nemairi, inini nokuti hama dzangu atizi kudya kudya kwaipuwa mutongi.

¹⁵ Asi vakatanga pamberi pangu vakaita mutwaro unorema kuvanhu, vakatora kubva kwevari zvokudya nevhini, ngapabanze pezvigurwa zvesirivha makumi marongomuna. Kunyazwi nevaranda vavo vakatwarisa padera pevanhu avo mitwaro inorema. Asi inini andizi kuita kudaro ngokuti ndinomutya Mwari.

¹⁶ Ngegwinyiso ndakadzipira pachangu mumushando wokuaka urwu rukumbati, atizi nokutenga nyika; varanda vangu veshe vaiunganapo kuita mushando.

¹⁷ Zve, vaiyapo nepatafura rangu vaJudha nevatongi zana nemakumi mashanu (150), ngepabanze peavo vaiuya kwetiri vechibva kuvanhu vemadzinza vaititendenedza.

¹⁸ Zvino izvo zvakanasirirwa zuva rimwe zvaiya kabi imwe nemakwai akatsanangurwa matanhatu; huku dzakanasirirwawo inini, nomumazuva gumi eshe nyede dzevhini dzakaunzwa ngokuwanzisa; asi neizvi zveshe andizi kuda kupuwa kudya kwomutwaro womutongi, ngendaa yokurema kwomutwaro womushando padera pevanhu.

¹⁹ Karakadza ngezvakarurama zvangu, A Mwari wangu, zveshe zvendakaitira ava vanhu.