Neh. 13 - Bhaibheri Rakachena muChindau

Kupaurwa Kubva kuVapara

¹ Pairo zuva vakadzidza kubva mubhuku raMosi mukuzwa kwevanhu; mwakaoneka pakanyorwa kuti apana naumwe wevaAmoni nevaMoabhi unozopotera mumushongano waMwari mhera nariini,

² ngokuti avazi kushongana nevaIsuraeri nechingwa nemvura, asi vakabhadhara Bharamu kuti avatuke; asi Mwari wedu wakashandura chituko kuita chifumiso.

³ Naapo vanhu vazwa mazwi omupango, vakapaura kubva kuvaIsuraeri veshe avo vaiya mibarirwana yevapara.

Nehemia Unonasirisa Mitemo

⁴ Zvino izvi zvisati zvaitwa, Eriashibhi mupristi, uwo waiya akaemeswa padera pemakamera emhatso yaMwari wedu, uwo waiya hama yaThobhia,

⁵ wakanasirira Thobhia kamera guru, apo pevaisimbongwaririrapo midiro yezviyo, yemitombo inegwema rakanaka, zvidziyo, chegumi chezviyo, chevhini idzva, nechemafuta, izvo zvaiya zvakapangwa kuti zvipuwe vaRevhi, vaembi, varindi vemisiwo, nezvipo zvevapristi.

⁶ Naapo izvi zvechiitika ndaiya ndisirimwo muJerusarema, ngokuti mugore remakumi matatu nemairi rokutonga kwaArthazekizesi mambo weBhabhuroni ndakaenda kunamambo. Ngesure kwenguva ndakakumbira mambo kuti ndiende,

⁷ ndakapetuka Jerusarema. Zvino inini ndakanasa kuzwisisa ndaa yokushata iyo yakaitwa ndiEriashibhi, yokunasirira Thobhia kamera muruwanze rwemhatso yaMwari.

⁸ Nazvo zvakandisvipisa mwoyo kakurutu; ndizvo ndakakandira kubanze zviro zveshe zvomumhatso zvaiya zvaThobhia kubva mukamera.

⁹ Zvino ndakapanga navo vaichenesa makamera, ndikahwirinzamwo zvidziyo zvemhatso yaMwari, pamwepo nemidiro yezviyo nemitombo inegwema rakanaka.

¹⁰ Ndakaonazve kuti zvikoaniswa zvevaRevhi zvaiya zvisikazi kupuwa kwevari; ndizvo vaRevhi nevaembi, vaishanda mushando, vaiya vapetuka umwe ngaumwe kumunda wake.

¹¹ Naapo ndakaganyira vatongi ndechiti, “Ngenyi mhatso yaMwari yakasiiwa?” Ndakavaunganidza pamwepo ndakavaemesa mundau dzavo.

¹² Zvino vaJudha veshe vakaunza chegumi chezviyo, chevhini idzva nechemafuta mumhatso yokungwaririra upfumi.

¹³ Ndakaemesa vangwariri voupfumi padera pemhatso yokungwaririra upfumi, Sheremia mupristi, Zadhoki munyori, naPhedhaia wevaRevhi, nomudetseri wavo Hanani mukororo waZakuri, mukororo waMatania; ngokuti vakaerengerwa kuita vaigondeka, nomushando wavo waiya wokukovera hama dzavo.

¹⁴ Ndicherechedzei, A Mwari wangu, ngendaa yeichi, usadzima zviito zvangu zvakanaka zvendakaitira mhatso yaMwari wangu nemishando yake.

¹⁵ Mumazuva awo ndakaona muJudha vanhu vechikamura vhini ngezuva reSabatha, vechiunza mwanda yezviyo, nokuitwarisa padera pezvimbongoro; nevhini rakakamurwa, mavhini, maonde, nembeu yeshe yemitwaro yaiunzwa muJerusarema ngezuva reSabatha; neni ndakavanyowedza ngokuvaitira ndaa ngeiro zuva revaitengesa ndiro zvokudya.

¹⁶ VaThirewo, vaigara mudhorobha, vakaunzamwo hove nembeu dzeshe dzezviro zvokutengesa nokuzvitengesa ngezuva reSabatha kuvanhu vaJudha, nomuJerusarema.

¹⁷ Zvino ndakaganyira vakuru vaJudha, ndikati kwevari, “Chiinyi ichi chiro chakashata chomunoita, mwechisvipisa zuva reSabatha?

¹⁸ Madzibaba enyu avazi kuita izvi here, naMwari wedu aazi kutiunzira uku kushata kweshe padera pedu, nepadera pedhorobha iri here? Asi imwimwi munounza ushungu hwakakura padera paIsuraeri ngokusvipisa zuva reSabatha.”

¹⁹ Kwootanga kusvipa pamisiwo yeJerusarema Sabatha risati ratanga, ndakapanga kuti misiwo ikonywe, ndikapanga kuti isabeurwa metsa Sabatha ripere. Ndakaemesa vamweni vevaranda vangu pamisiwo, kuti kusaapo mutwaro unopotedzwamwo ngezuva reSabatha.

²⁰ Ndizvo vatengesi vaitengesa mbeu dzeshe dzezviro vakagara usiku ngokubanze kwedhorobha reJerusarema kamwe nokuti kairi.

²¹ Asi ndakavanyowedza, ndechiti kwevari, “Munoatirenyi usiku hweshe pamberi porukumbati? Kuti mukaitazve kudaro, ndinozomubata.” Kubvira panguva iyo avazi kuzouya ngezuva reSabatha.

²² Neni ndakapanga vaRevhi kuti vadzichenese, kuti vauye, varinde zvimana, kuti vangwarire zuva reSabatha rakachena. Ndicherechedze, A Mwari wangu, ndiitire nyasha, undiponese kudai ngouwandu hworudo rwako.

²³ Mumazuva awo ndakaonazve vaJudha vaiya vakaroora vakadzi veAshidhodhi, veAmoni neveMoabhi;

²⁴ norupande rwevana vavo vaiereketawo ndimi yeAshidhodhi, navo vasikakoni kuereketa ndimi yevaJudha, asi vechiereketa ngendimi dzevanhu vakasiyana.

²⁵ Ndakavaganyira, ndikavatuka, ndikavachaya vamweni vavo, ndikabvita bvudzi ravo, ndikavapikisa mhiko ngezina raMwari ndechiti, “Imwimwi musazoroodza vanasikana venyu kunevakororo vavo, nokuti kutora vanasikana vavo kuroodza vakororo venyu, nokuti muvaroore imwimwi pachenyu.

²⁶ Soromoni mambo weIsuraeri aazi kushaisha here ngokuita zvakadaro? Pakati pemadzinza akawanda paiya pasina mambo wakadai ndiye, naye waidiwa ndiMwari wake, naMwari wakamuita mambo padera paIsuraeri reshe; zvakanyadaro vakadzi vapara vakamuita kuti ashaishe.

²⁷ Ndizvo zvino isusu tinozopurutana kwouri nokuita uku kushata kukuru, kupauka ngourimbwi kubva kunaMwari wedu ngokutora vakadzi vapara here?”

²⁸ Naumwe wevakororo vaJoiadha, mukororo waEriashibhi mupristi mukuru, waiya mukwambo waSanibharati muHoroni; ndizvo ndakamudzinga kubva kwendiri.

²⁹ Vacherechedze, A Mwari wangu, ngokuti vakasvipisa upristi, chitenderano chevapristi nechevaRevhi.

³⁰ Ndizvo ndakavachenesa kubva kuchiro cheshe chipara, ndakaemesa mabingo evapristi neevaRevhi, umwe ngaumwe mumushando wake;

³¹ neni ndakapira huni, ngemikuwo yakaemeswa, neyokupira michero yokutanga. Ndicherechedze, A Mwari wangu, ngokundiitira zvakanaka.