Neh. 12 - Bhaibheri Rakachena muChindau

Mazina eVapristi neVaRevhi

¹ Ava ndivo vapristi nevaRevhi vakakwira naZerubhabheri mukororo waShearitieri, naJeshua: Seraia, Jeremia, Ezura,

² Amaria, Marukhi, Hatushi,

³ Shekania, Rehumu, Meremothi,

⁴ Ido, Ginethoi, Abhija,

⁵ Mijamini, Maadhia, Bhiriga,

⁶ Shemaia, Joiaribhi, Jedhaia,

⁷ Saru, Amoki, Hirikia naJedhaia. Ava ndivo vaiya vatungamiriri vevapristi nevehama dzavo mumazuva aJeshua.

⁸ NevaRevhi: Jeshua, Bhinui, Kadhimieri, Sherebhia, Judha naMatania, uwo nehama dzake waiya mutungamiriri wengoma dzokupa kubonga.

⁹ NaBhakibhukia naUno, hama dzavo, vakaema vakaringirana navo mumudiro.

Mibarirwana yoMupristi Mukuru Jeshua

¹⁰ Jeshua ndiye baba vaJoiakimu, Joiakimu baba vaEriashibhi, Eriashibhi baba vaJoiadha,

¹¹ Joiadha baba vaJonathani, naJonathani baba vaJadhua.

Vakuru veDzinza reVapristi

¹² Mumazuva aJoiakimu, vapristi, vakuru vemhatso dzemadzibaba: vaSeraia, Meraia; vaJeremia, Hanania;

¹³ vaEzura, Meshuramu; vaAmaria, Jehohanani;

¹⁴ vaMarukhi, Jonathani; vaShebhania, Josefa;

¹⁵ vaHarimu, Adhina; vaMeraiothi, Herikai;

¹⁶ vaIdho, Zekharia; vaGinethoni, Meshuramu;

¹⁷ vaAbhija, Zikhiri; vaMiniamini nevaMoadhia, Phiritai;

¹⁸ vaBhiriga, Shamua; vaShemaia, Jehonathani;

¹⁹ vaJoiaribhi, Matenai; vaJedhaia, Uzi;

²⁰ vaSarai, Karai; vaAmoki, Ebha;

²¹ vaHirikia, Hashabhia; vaJedhaia, Nethaneri.

Mazina eMhuri dzeVapristi neVaRevhi

²² VaRevhi mumazuva aEriashibhi, Joiadha, Johanani naJadhua, kwakanyorwapo mazina evakuru vemhatso dzemadzibaba; neevapristiwo ngokudaro, metsa pakutonga kwaDhariusi muPhesia.

²³ VaRevhi, vakuru vemhatso dzemadzibaba avo, vakanyorwa mazina mubhuku remishando yezuva ngezuva, metsa mazuva aJohanani mukororo waEriashibhi.

Kuemeswa kweMajana muTemperi

²⁴ Nevatungamiriri vevaRevhi: Hashabhia, Sherebhia naJeshua mukororo waKadhimieri, nehama dzavo vakaema vakaringirana navo, vechiemba kukudza nokubonga, kudai ngokupanga kwaDhavhidha munhu waMwari, chikwata chakaringirana nechikwata.

²⁵ Matania, Bhakibhukia, Obhadhia, Meshuramu, Tarimoni naAkubhi vakaema vechingwarira misiwo yemhatso yokungwarira upfumi.

²⁶ Ava ndivo vaiyapo mumazuva aJoiakimu mukororo waJeshua, mukororo waJozadhaki, nomumazuva aNehemia mutongi, nomumazuva aEzura mupristi nomunyori.

Nehemia Unopira Rukumbati rweDhorobha

²⁷ Zvino pakupirwa kwerukumbati rweJerusarema, vakatsvaka vaRevhi mundau dzavo dzeshe, kuti vavaunze Jerusarema, kuita dhiri rokupirwa ngokudakara, ngokubonga, ngokuemba, nengoma dzesimbi, magitari nezvidangari.

²⁸ Zvikwata zvevaembi zvakaungana pamwepo, zvechibva kunharaunda dzinotendenedza Jerusarema, nokubva kumaguta evaNetofa;

²⁹ nokubvawo Bhethigirigari, nokubva kunharaunda yeGebha neyeAzimavhethi; ngokuti vaembi vaiya vakadziakira maguta aitendenedza Jerusarema.

³⁰ Naapo vapristi nevaRevhi vakadzichenesa pachavo; navo vakachenesa vanhu, misiwo norukumbati.

³¹ Zvino ndakakwidza vatungamiriri vaJudha padera perukumbati, ndikaemesa zvikwata zvikuru zviiri zveavo vaibonga, vechihamba mumusara. Chikwata chimwe chazvo chakakwira padera porukumbati rwokumudyo, urwo rwakaringira paMusiwo weMadisa;

³² ngesure kwavo kwakaenda Hoshaia, norupande rwevakuru vaJudha,

³³ naAzaria, Ezura, Meshuramu,

³⁴ Judha, Bhenjamini, Shemaia, Jeremia,

³⁵ nevamweni vevapristi vatsva vanemagwama: Zekharia mukororo waJonathani, mukororo waShemaia, mukororo waMatania, mukororo waMikhaia, mukororo waZakuri, mukororo waAsafi;

³⁶ nehama dzake, Shemaia, Azareri, Mirarai, Girarai, Maai, Nethaneri, Judha naHanani, vane zvokuemba ndizvo zvokuridza zvaDhavhidha munhu waMwari; naEzura munyori waiya pamberi pavo.

³⁷ PaMusiwo weChinyuka pamberi pavo, vakakwira vakarurama pamakwiro omudhorobha raDhavhidha, pamukwidzwa worukumbati, padera pemhatso yaDhavhidha, metsa kuguma paMusiwo weMvura wokumabvazuva.

³⁸ Chikwata chimweni cheavo vaibonga chakaenda kumuoshwe, neni ndakateera sure kwavo, norupande rwevanhu padera porukumbati, padera peThawa reZvoto, metsa kuguma kuRukumbati Rwakapamhama,

³⁹ nepadera poMusiwo waEfuremu, nepasinde poMusiwo weKare, nepasinde poMusiwo weHove, nokuThawa raHananeri, neThwa reZana, metsa kuguma kuMusiwo weMakwai; navo vakaema paMusiwo weVarindi.

⁴⁰ Ndizvo zvikwata zviiri zveavo vaibonga vakaema mumhatso yaMwari, neni norupande rwevakuru vaiya neni;

⁴¹ nevapristi Eriakimu, Maaseia, Miniamini, Mikhaia, Erioenai, Zekharia naHanania, nemagwama;

⁴² naMaaseia, Shemaia, Ereaza, Uzi, Jehohanani, Marikhija, Eramu naEza. Nevaembi vakaemba, naJezirahia echiita mutungamiriri wavo.

⁴³ Ngeiro zuva vakapira midiro yakakura, navo vakadakara, ngokuti Mwari wakavaita kuti vadakare ngokudakara kukurutu; vakadzi nevana vakadakarawo. Bope rokudakara muJerusarema rakazwika kuretu.

Kunasirira Kuita Midiro muTemperi

⁴⁴ Pairo zuva vamuna vakaemeswa kuti vangwarire makamera okungwaririra upfumi, nepadera pezvipo zvemidiro, padera pemichero yokutanga, nepadera pezvegumi, kuti vaunganidze pamwepo mukati mwazvo zvikoaniswa zvinodiwa ngemipango, zvakaemeserwa vapristi nevaRevhi zvechibva muminda yemadhorobha; ngokuti vaJudha vakadakara ngendaa yevapristi nevaRevhi vaishanda.

⁴⁵ Vakaita mushando waMwari wavo nomushando wokuchenesa, kudaiwo ngevaembi nevangwariri vemisiwo, kudai ngokupanga kwaDhavhidha naSoromoni mukororo wake.

⁴⁶ Ngokuti mumazuva aDhavhidha naaAsafi vekaretu waiyapo mutungamiriri wevaembi vokuemba nduyo dzokukudza nokubonga kunaMwari.

⁴⁷ Mumazuva aZerubhabheri nomumazuva aNehemia, vaIsuraeri veshe vakapa zvikoaniswa kuvaembi nokuvarindi zvezuva ngezuva. Vakapaura izvo zvakacheneswa zvevaRevhi; nevaRevhi vakapaura izvo zvaiya zvemibarirwana yaAroni.