Neh. 1 - Bhaibheri Rakachena muChindau

¹ Mazwi aNehemia mukororo waHakharia. Mumwedzi unozwi Khisirevhi, mugore remakumi mairi, apo ndaiya muSusa mudhorobha guru,

Nehemia Unotambudzikira Jerusarema

² umwe wehama dzangu, Hanani, wakauya nevanhu vaibva kwaJudha; neni ndakavabvunza ngendaa yevaJudha vakapokonyoka, avo vakatiza uhloko, nendaa yeJerusarema.

³ Vakapingura vechiti, “Vakasara munyikemwo vari mukutambudzika kakurutu nokutsverudzwa; rukumbati rweJerusarema rwakaputsikira pashi, nemisiwo yarwo yakapishwa ngomuriro.”

⁴ Naapo pendakazwa mazwi aya, ndakagara pashi ndikachema nokutsumba kwemazuva, ndikaera kudya, ndikakumbira pamberi paMwari womudenga.

⁵ Ndakati, “A Mambo Mwari, Mwari womudenga, Mwari mukuru nounotyisa, uwo unongwarira chitenderano nenyasha kwevari vanomuda nokungwarira mipango yake;

⁶ nzee yako ngaipurutane nemadziso ako ngaabeuke kuzwa mukumbiro womuranda wako, wendinokumbira pamberi pako masikati nousiku, ngendaa yevaranda vako vana vaIsuraeri, ndechitenda zvishaishi zvavo vana vaIsuraeri, zvetakashaisha kwouri. Teshe, inini pamwepo nevemhatso yababa angu, takashaisha.

⁷ Takaita zvakashata kakurutu kwouri; atizi kungwarira mipango, zviemeso nezvitongero zvewakapanga muranda wako Mosi.

⁸ Cherechedza izwi rewakapanga muranda wako Mosi wechiti, ‘Kudai mwechizopauka, ndinozomuparadzira pakati pemadzinza;

⁹ asi kudai mwechizotenderukira kwendiri nokungwarira mipango yangu, mwechiita; kunyazwi varipo vari venyu vakapararira kumagumo enyika, ndinozovaunganidza kubvayo, ndinozovaunza kundau yendakatsanangura kuisa zina rangupo.’

¹⁰ Ava varanda vako nevanhu vako, vewakasunhura ngesimba rako guru nenyara yako yakagwinya.

¹¹ A Mambo Mwari, ndinokupota, nzee yako ngaipurutane kukumbira kwomuranda wako, nemikumbiro yevaranda vako, vanemwoyo inechidisiso chokutya zina rako. Budiririsa muranda wako nyamashi, umuitiire nyasha mukuona kwouyu munhu!” Panguvayo ndaiya mutwari wetsani yamambo.